مرزوق علي

4/1/2010
يعني حنا بالديرة تربينا على ثلاث شغلات مهمة سمعناها وشفناها من ابهاتنا ويدودنا.. وغالبية شباب الكويت بكافة شرايحهم وتوجهاتهم تربوا هالنمونه.. الاولى: احترام الشيوخ.. الثانية: العطف على الصغير.. الثالثة: مساعدة الناس.. هذا اللي يميز أهل الكويت كلهم.. ما تشوف لك كويتي يرضى أحد من عياله أو ربعه أو جيرانه يغلط أو يسفه أو يحاول يحط من قدر الشيوخ.. ولا في كويتي يشوف اللي أصغر منه بموقف سيئ او يبدر منه فعل مو زين الا وتلاقيه نصحه ومنعه وسدد رأيه.. وأهل الكويت كلهم عن بكرة أبيهم يحبون مساعدة الناس.. الغني يساعد الفقير.. الشيخ يساعد كافة شرايح الشعب.. القادر يعطي الضعيف.. وينصف المظلوم مهما كان انتماءه لقبيلة أو عائلة او مذهب أو لون.. وهالحجي أنا بوجهه تحديدا للنائب مرزوق علي.. يا أخي على كثر ما أحترمك واقدرك ومثلي الكثيرين.. استغربت هجومك على كتّاب الصحافة والقنوات اللي سميتهم مدافعين عن الباطل.. واللي قلت عنهم يمثلون الإعلام الهابط بلقاء لك على إحدى القنوات.. يعني مو معقولة اللي يخالفك بالراي تسميه مبطل وهابط.. طيب اذا رضينا بهالمبدأ.. راح يطلع واحد ويقول في نواب بمجلس الامة على باطل.. وطرحهم سوقي.. ومستواهم هابط.. ويعمم وتكون انت واحد منهم بسبب التعميم.. يا مرزوق علي لازم تعرف ان الشجاعة تتمثل بقول الحقيقة والحق ولو على نفسك.. إذا انت شايف كاتب هابط قول اسمه بشجاعة او اسكت.. واذا في قنوات فاسدة أو هابطة على قولتك وما تهمك شحقه تكبرهم وتذكرهم بتعميم؟ يا تكون رجل شجاع وتسميهم أو تبلع لسانك وتتجرع المر مثل غيرك.. بعدين شسالفتك زعلان على اللي يقولون اسمك مثلي (مرزوق علي) بالفعل انت مرزوق علي وتتشرف بكون علي محمد ابوك هذا الرجل سليل المجد وريحة كويت الماضي وابن حامل الدستور محمد ثنيان؟ وين المشكلة اذا قالوا انك مرزوق علي؟ ما انت دايما تقول الاخ احمد الفهد والاخ طلال الفهد.. وساعات بالمجلس وبالمضبطة تقول اسماء الوزراء بدون عوائلهم وبدون ألقابهم؟ يعني حلال عليك وحرام عليهم.. بعدين انا ماني عارف ليش هالحساسية؟ هذي نصيحتي لك يا مرزوق علي تقبلتها كان بها ما تقبلتها مشكلتك.. وعلى فكرة ترى في كلام انت قلته في الإعلام راح تشوف تبعاته السلبية عليك مستقبلاً.. الا اذا كانت قضيتك فقط الرياضة..

• كلمة راس
الشيخ طلال الفهد قال (اعدموني اذا كنت السبب).. اللواء فيصل الجزاف قال (الإيقاف مؤقت) مرزوق علي قال (لن نتنازل عن القانون) ووزير الشؤون الدكتور محمد العفاسي لا حس ولا خبر.. وتقولون لي إصلاح رياضي؟ اي هين.