عراب الفتنة

30/12/2009
اسمع يا عراب الفتنة الكلام اللي يجمد على الشارب.. واقرا الحجي اللي يشق القحفية.. واعرف ان لا أنت ولا مليون عراب مثلك يقدر أو يحق له يتناول موضوع وحدتنا الوطنية.. شوف يا عراب الفتنة.. انت تقول في مقالاتك ان ما عندك شي تخسره.. بالفعل انت ويهك مغسول بكلوركس أصفر.. وذمتك ملعب.. وقلبك ينضح بالنجاسة.. وجسمك متروس مخلفات عمك الشيخ اللي مسويك خروف له ولطموحاته الدايخة.. وبالفعل انت ما عندك شي تخسره.. لأن حتى حلفك وقسمك بعته بأول سومة للي يسوى واللي ما يسوى.. فبالفعل انت ما عندك شي تملكه علشان تخسره.. انت حتى ما خفت الله علشان تخاف على نفسك من النار.. بعدين تعال يا عراب الفتنة.. منو انت وشنو وضعك علشان تشكك بمواقف شيعة الكويت وتقول بكل صفاقة انك اشتقت لمواقفهم الوطنية؟ بالأول راجع روحك وشوف نفسك المريضة وبعدين تعال حاسب الناس.. لأن مواقف الشيعة ما تحتاج لإشادتك المدفوعة الاجر.. ولا تبي حروفك اللي متسلفها من عفن اللغة.. الشيعة في الكويت تاريخ قديم ووجود محتوم وعطاء منقطع النظير.. واذا تبي اذكرك بمسقط راسك ما عندي مانع؟.. واذا تبي أزيدك من الشعر بيوت وعمارات من الذهب اللي انت وأمثالك كنتوا تقضبونه بايدكم هم ما عندي مشكلة.. الشيعة في الكويت مالهم الا راس واحد.. راسهم صباح الأحمد الله يحفظه وقبله جابر الأحمد رحمة الله عليه وقبله حكام الكويت اللي أظافر ريولهم تسواك يا عراب الفتنة.. واذا غاب عنك بقصد دور الشيعة اللي يعتزون بمراجعهم وعلمائهم وسنة الرسول وأهل بيته صلوات الله عليهم.. فأنا أذكرك بمقالاتك اللي كتبتها في التسعينات عنهم وحاولت تتلزق فيهم لكن الشيعة عرفوك واكتشفوا عفنك الفكري وشاتوك ورفسوك لأنهم رجال ماكو لمدعي الرجولة مكان بينهم.. وأخيرا وليس آخرا.. اعرف يا عراب الفتنة المصدي المكشوف.. ان اهل الكويت شيعة وسنة.. بدو وحضر.. يعرفونك زين ويبخصونك زين.. انت واللي وراك.. فلا تشيل بيرق الإصلاح وانت خربان من البيضة.. ولا تدعي شرف الخصومة وانت محد يتشرف بخصومتك.. فدش خيمتك ونام.. وللحديث بقية.

• كلمة راس
لبيك يا صاحب السمو.. تم طال عمرك.. اللي تبيه يصير.. حنا كلنا تحت أمرك.. لا يضيق صدرك من قلة انحرفت بالمسار الديمقراطي.. ولك وعد أحرار ما راح نسكت عن اللي بيهدم بلدنا بالفتنة.. وتم طال عمرك.