سين جيم للمتهرطق

14/12/2009

* سين: ليش بو عمر يعتقد ان «السي آي ايه» و«الكي جي بي» مخلين شغلهم وقاعدين يقرون مقالاته؟
- جيم: لانه متأثر بأفلام رامبو.. تدرون الريال معضل مثله وشواربه مفتولة.. فصدق روحه..
*سين: ليش بو عمر تحدى النيابة العامة وما دفع الكفالة مع انه يدري انه شغله بربسه وتالي دفع؟
- جيم: لانه يدري ان النيابة مهي رادة عليه فقال خلوني اطلع بطل بس يوم شاف الصجية قط قري..
* سين: ليش بو عمر مسوي روحه راسبوتين الكويت ويبي يفكك الاسرة الحاكمة؟
- جيم: بسيطة.. لانه عقب ما انترست خدوده من خير الشيوخ.. حس انه انكشف والبرغي ما بيتحرك عدل للتفكيك.. فحب يصير بطل على حساب تاج راسه آل الصباح.
* سين: ليش بو عمر مو قادر يستوعب اللي يقوله كله خرطي بخرطي؟
- جيم: لانه بو فهد دايما يشهد له وفهيدان يطب له خصوصا اذا تيمعوا ليلة اليمعة يصلون صلاة الليل وصاحبهم مسافر!.
* سين: ليش بو عمر لما يكتب مقالاته يستخدم الرموز «م» و«ع» و«باء»؟
- جيم: هذي سهلة.. بو عمر يتمنى يصير من ربع «ميم» ومو قادر.. و«عين» معطيه طاف وولده زافه .. و«باء» عقب سالفة اللحم المشوي سحب عليه.
* سين: ليش بو عمر مسوي له مدونة يسولف فيها مع ستة مازادوا واحد ولا نقصوا؟
-جيم: لانه ماعنده ربع ويستحي يدش الدواوين لانه ما يعرف علوم الرياييل.. وزيد عليها انه مو راعي سالفة وسوالفه عمية..

• كلمة راس:
أصغر واحد بالكويت يدري ان الكاتب احمد الديين شديد التحالف مع الشيخ ناصر الصباح ويعكس افكاره في مقالاته، وهذا مو عيب.. بس ليش يعورنا بتعابير الحرية والديمقراطية والدستورية وحقوق الانسان وحق تقرير المصير، ويشغل الناس بخطط وسيناريوهات؟ يا اخي شكلوا حزب واعلنوا ببرنامجكم ان طموحكم هو الوصول لرئاسة الوزراء.. صدقوني الناس تحب الموقف الصريح والشجاع.. مو اللف والدوران.