جبح ويوه

1/11/2009
أكثر بلد بالعالم تلاقي فيه تهم معلبة وجذب ينباع بأرفف الجمعيات أهي الكويت وبلا منازع..تبي جذبة صغيرة تلاقيها بدرج أحد الكتّاب جاهزة مجهزة..تبي تهمة على قدك ممكن تحصلها في مخباة نائب أو وزير سابق ما عنده مشكلة موليه..شي يحر شي يغث ..
جنه خلصنا كل شغلنا وما تم عندنا الا توزيع التهم على بعض..الفاظ غريبة عجيبة ..حوار متدني..واتهامات بعدم الوطنية يمين ويسار..علة وابتلينا فيها ولا قادرين نتخلص منها..نظرية المؤامرة عندنا مثل شرب الماي..والله العن ابو السياسة اذا بتفرقنا وتخلينا نتشرذم..بكل قضية لنا هوشة وسالفة ومليون راي..وآخر همنا الكويت..قضايا تربوية وصحية واجتماعية ضاعت والسبة هالنواب الله لا يواريهم العافية..والديرة مشلولة لا مشاريع ولا انجاز الله ينغص عليهم....التفاؤل شال شليلة وانحاش..والعقل ختم جوازه مغادرة وما اظن له رجعة..الديرة كلها بشوت تتخطرف بالاستقبالات على ما ميش..كفرونا بالديمقراطية...عيالنا طقتهم البوهة والخدم يضحكون علينا..وبعد كل هذا تطلع لنا جمعيات وتجمعات تبحث عن دور هدم وخراب..وكأن احنا ناقصين ومو قاصرنا الا خرابهم..كل ثلاث دقايق ينولد مدون يديد يبوق من اللي سبقه..كل ساعة ونص قرار وزاري، كل ساعتين لجنة تحقيق..كل ثلث ساعة تصريح من النواب..شهالديرة؟ هيعوا..ركدوا..سكتو دقيقة وفكروا باللي قاعدين تسوونه بالبلد..كافي..والمصيبة ان بعد كل هذا يدش عليك نائب الديوانية ويقول .. المجلس راح ينحل غير دستوري والحكومة راح تطيح القروض علشان الشارع ما يناكفها وعندها خطة وبرنامج تبني من خلالهم البلد..علشان يكرهون الناس بالمجلس! آمين وبمرة ملك عسى الله يسمع منك.. • كلمة راس اللي يخلي راسي يفتر ان الناخب اللي بايع صوته وقابض يبدي رأيه بكل وقاحة..واللي ألعن منه نائب بايع مواقفه واسئلته يصارخ من قمة راسه يامال راس الكسر بالمجلس.....ويطلع لك آخر شي واحد تافه وسفيه يبي يوزع صكوك الوطنية على العالم..هزلت!
إقرأ المزيد...

طوط.. طوط!

29/10/2009

طلع بادي الدوسري ودخل خالد العدوة.. شالفرق؟ شاللي راح يتغير.. شاللي راح يصير؟ أنا متأكد ان خروج بادي الدوسري بحكم المحكمة الدستورية كان متوقع من بادي الدوسري نفسه.. ودخول خالد العدوة يقين في قلب العدوة من اول يوم للفرز.. لكن الناس في الكويت تدوّر عزا تلطم فيه وتبي خبر علشان تطرشه مسج من زود الفراغ وقلة الانتاجية.. ما علينا.. نرجع لمحور حديثنا.. بعد أول دقايق من اعلان حكم المحكمة الدستورية صرح العدوة وقال انه يدعم اي استجواب وانه وده ينضم للتكتل الشعبي ويتطلع لحل قضية القروض! معاه حق مو احنا عندنا دستور يكفل له هالشي؟ مو احنا اللي عندنا وسائل اعلام تنقل كل شي؟.. مو احنا عندنا شعب يموت على الحجي؟.. مو احنا عندنا ناس تنام وتصحى على.. طوط طوط.. صوت المسجات؟ عيل قلعتنا.. وزين يصير فينا.. حاطين دوبنا دوب الحكومة واهيا اللي تصرف علينا.. مشلخين الوزراء وثلاث أرباع الشعب ما يداوم او يداوم بدون انتاجية.. الطلبة مالهم خلق يداومون ويستغلون اي سبب للغياب واهلهم يشجعونهم.. حتى الوافدين صاروا ألعن منّا لا التزام بالقانون ولا قالها الله.. ويطلع لك عقب كل هذا كاتب مهرج يموت عالشقلبة وكل يوم يكتب بجريدة ويطلع بقناة ويقول سنقرع طبول الحرب لو الحياء.. انت لو تستحي ما كتبتها.. بتقود الحرب على منو؟ ومع منو؟ ضد منو؟.. لكن الشرهة مو عليك.. فليش ما تبون النائب العائد خالد العدوة يقول هالحجي؟ تبون الصج لاعت جبودنا من المعارضين وآخرها اللي معطي مهله لسمو الرئيس لغاية سبعتعش الشهر؟ شفيه بوش متأثر بحرب التحرير؟ شقصته شعلته صارله مليون سنة بالمجلس ويلعب سياسة؟.. لكن على قولة الاوليين كبرت ودبرت!.

• كلمة راس
كل الشكر لرئيس مجلس الوزراء والمسؤولين على تفاعلهم مع الفنان محمد راشد العقروقة «ولد الديرة» اللي اصابه الله ببلاء المرض.. وفزعة المخلصين لنجدة ابناء الكويت ديدنهم عسى الله يتقبل منهم.. وكل الدعاء بالشفاء العاجل للي ادخل البسمة بقلوبنا ولد الديرة.
إقرأ المزيد...

شللي جمع وشللي وفق؟

28/10/2009
ما نقول إلا الله يسامحك يا بو فلان.. ولد ما عنده غير لعبة الغراميات وكتابة المسجات، تروح تجيبه وتنبش عليه وتسويه كاتب وترزه.. وتعطيه أحسن الظروف والبرامج والأوقات.. وهات يا تلميع والا صاحبنا باله هيكل زمانه.. سنعوسي العصر والأوان!
هذا يزعم يدعي إنه من جماعة «التكتل» وما عنده غير قال مسلم، وقال العم بو عبدالعزيز، وسقطوا القروض، وطيحوا المادري شنو، ومعارض للحكومة خير شر، ويهوس لكل استجواب ولو عن الرقي الباكستاني، وهذا يقول إنه ليبرالي، مع الحكومة، ضد المطالب الشعبية، مع الهون أبرك ما يكون، ومتضايق من هجمة القبايل على (الديرة)!! فشللي وفق وجمع راسين بالحلال؟
سمعنا عدة سوالف، منها ان الشباب تالي الليل عندهم قعدة بدت تسوي بينهم التوافق المطلوب، لأن اللي يعرفه كثير من الناس ان صاحبنا لما انقش من مكانه.. وراح بأوامر من فوق لمكانه الجديد هلال القمر، ما جان موافق ولا قابل، بجية الحبيب، إنما مع الوقت صار هذا يخدم على هذا، وعرف هذا مصلحته عند هذا، وجذبة مني.. وجذبة مناك.. والله وكيلك ما انت عارف منو فيهم الحرامي ومنو اللي.. اللي شنو.. اللي بالي بالك.. وباجر نكمل إذا ما تأدبوا الاثنين!..

• كلمة راس
تقعد وسط المحترمين وتقول لازم نحترم بعضنا.. لكن الظاهر انه فيه مسافة كبيرة وايد بينك وبين الاحترام.
إقرأ المزيد...

خلّود الشرير ...صار كومبارس (منع من النشر في الدار)

في الافلام العربيه وفي السينما المصريه بالتحديد جرت العاده ان البطل يكون له شبيه يسمونه اهل الفن " دوبلير" والمشاهدين يسمونه "كومبارس" هذا كثر ما يكسر الخاطر يستاهل اللي يصير له ..وبلهجة اهل الكويت يسمونه ممشة زفر..خاصه اذا صار دوبلير وكومبارس بالسياسه.. وعندنا بشارع الصحافه نماذج من هالكومبارس اللي العمام يمشون فيه الزفر والصدى..منهم خلّود الشرير وهذا قصته قصه..خلود الشرير طبعا قصه الغالبيه يعرفونها..وللتذكير راح اعيدها ..هذا واحد ناعم وهواه زايد صحى من النوم يبي يصير ريال ولما طلع الشارع سألوه ربعه ها خلودي اليوم ويهك محتقن


شسالفتك؟؟فقال لهم ما اسمح لكم ترى من اليوم ورايح انا اسمي خلود الشرير..ولو بالاسامي تهون..ما علينا.. خلود الشرير تحول الى خلود الكومبارس بعد ما رضخ للأمر الواقع وانكشف..وعلى وزن الابطال في السينما اذا المشهد فيه قبله حاره او حضن دافي تشوف البطل يتصدى للدور مع البطله ولأن خلود الكومبارس ما فيه شده يبوس ويحضن حريم..اذا البطل غاب او سافر او استمرض ينطرونه لين يرد..لكن اذا الدور فيه لقطة فيها دناءة نفس او نزلة للمجاري تلاقي خلود الشرير سابقا الكومبارس حاليا يبدع بالدور..وساعات يستعين بالمهرج الخاص بالجريده..هني مصيبتنا كمراقبين وقراء
مصيبتين..الاولى ان خلود الكومبارس يحاول بكل مره يكون شي ويتلون؟؟ اذا حضر عند عمامه وتاج راسه يصير عبود وينزف لين يقول الله حق..واذا راح الدائرة الرابعه ينكر حضارة اهله وعراقة عائلته ويقول آنا قبلي وانتمي للباديه اللي ما يعرف عنها شي..ولو ان الباديه بريئه منه لأن اهلها رجال مو مثله ابد..واذا دش عند ربعه الناعمين..مزون وقتوب يقول حجي ثاني ما اقدر اكتبه ..هذا غير التنهوص اللي يصير بالصالحيه..والمصيبه الثانيه ان خلود الكومبارس يحاول يعلمنا شي اهو نفسه فاشل فيه.. وإلا شنو تفسيركم لواحد ساقط سياسيا يبي يوجه الشارع؟؟؟ وقصة السوري بساحة
الاراده اوقع واوضح مثال..الظاهر ان السوري خدماته جليله بنظر خلود الشرير سابقا الكومبارس حاليا..تبون الصج الشرهه مو عليه على اللي مخليه يلعب بصبع ايده وصبع ريله العود بالجريده ويهاجم خلق الله ويدعي الشرف واهو يخر عهر وعربده اكثر من نتنياهو..اما المهرج فهو فداوي الكومبارس..والمرجله ابعد ما تكون عن الاثنين..واقسم ثم اقسم بالله العظيم اذا ما ركدوا هالاثنين راح اتجه بشكل مباشر حق البطل الحقيقي وراح اكون واقعي جدا ودقيق جدا جدا وموضوعي جدا جدا جدا في كشف سيناريوهات تخلي البطل يقعد ببيتهم من الفشله.
كلمة راس
اسهل شي بالكويت انك تنسب شي للناس مالهم شغل فيه والاسهل انك تجذب وتصدق جذبتك..لكن الصعوبه انك تواصل الجذب على الناس لأنك راح تنكشف..وانا من زاويتي هذي اتحدى خلود الكومبارس؟.. الشرير سابقا والمهرج اللي يبي يحارب عمامه..اذا قدروا يصمدون يوم واحد مو اكثر في مواجهة تاريخهم اللي راح اكشفه للناس..


إقرأ المزيد...

بوجاسم...

27/10/2009
تلقيت العديد من الرسائل الإلكترونية تنادي بتفعيل حملة «نبيه يوقف» الخاصة بهدر المال العام اللي تبنيتها أمس.. وكان اكثرها طرفة إيميل بوجاسم اللي تضمن حواراً صباحياً تم بينه وبين ام جاسم اللي زفته وراحت المطبخ تكمل شغلها لأنه ما قدر يوصل لها الموضوع بصورة سليمة.. والله اعلم الظاهر بوجاسم كان يبي الهدر يوقف بس بطريقته.. والا شمقعده بالبيت الصبح .. ما علينا.. قلتها ستة واربعين مليون مرة.. مو غلط يكون عندنا تجمعات سياسية أو مجاميع ناشطة بكل المجالات.. بالعكس هذا يعكس حالة المجتمع المدني الصحية.. بس الجيلة زادت.. وطفح الكيل.. تدرون ليش؟ شالفرق بين اللي يطلع جريدة يومية بدون ترخيص وبين اللي يؤسس تجمعاً او جمعية مو مشهرة؟ شي غريب في تجاوز القانون والأغرب تهافت النواب على استقبال اصحاب هذي الجمعيات غير المشهرة.. المصيبة الكبيرة أن هالجمعيات تلاقي اسمها يدل على أنها جمعيات نفع عام مجتمعية.. أضرب لكم مثلاً من وحي الخيال.. جمعية التنور لقرص خبز مسمسم.. ما استغرب اذا اعضاء الجمعية افتروا على الخبابيز.. او زاروا شركة المطاحن.. أو سووا ندوة عن أهمية السمسم في القرص المحمش؟ بس يحوشني عقر بقر اذا لقيت الجمعية مسوية ندوة تتناول فيها الاستجوابات ويحضر عضو أو اكثر ويطالبون باستقالة الوزير وعدم حل المجلس! شكو شكو شكو.. هذا مثال من وحي الخيال أخذوه وطبقوه على تسعة وتسعين بالإمية على جمعيات نفع عام بعضها مشهر واغلبها مخالف للقانون.. ومحد من الحكومة راح لهم؟ تبون الصج شي يغث ويسد النفس.. وبالعودة الى صدر المقال.. أنا اتمنى من «بوجاسم» دام انه فاضي الصبابيح يؤسس له جمعية يسميها (لا للنجرة مع أم جاسم) ويسوي ندوة بالحوش ويدعيني لها علشان نناشد مجلس الوزراء يوفق أم جاسم لمزيد من الطبخات الزينة.. شهالعبو.. جبح جمعيات خوارة.. • كلمة راس تلقيت كتاباً من الأستاذ إياد جاسم الخرافي رئيس النادي العلمي الكويتي يتشره فيه عليّ ويقول ان النادي عنده احصائيات راقية ودراسات علمية على عكس باجي جمعيات النفع العام.. وأنا بدوري أقول حق الخرافي الصغير.. كفو هذا دوركم كجمعيات وأندية متخصصه في خدمة المجتمع.. على الطاري ليش الخرافي الصغير ما يخترع للخرافي الكبير محلولاً سحرياً ينوم النواب؟
إقرأ المزيد...

نبيه يوقف

26/10/2009
بمناسبة موضة تشكيل التجمعات والكتل السياسية والاقتصادية مثل كتلة وتجمع 26 و36 والقادم أكبر، أعلن أنا من موقعي هذا عن تشكيل تكتل سياسي يحمل اسم «نبيه يوقف»، وأهداف هذا التكتل أو التجمع تتلخص في التالي:
- نبيه يوقف علشان كل مواطن يكون مأمن على مستقبله.
- نبيه يوقف علشان كل الحريم يحسون بالأمان.
- نبيه يوقف علشان الشعب يكون مرتاح
- نبيه يوقف علشان نأمن مستقبلنا.
- نبيه يوقف علشان نتطور.
- نبيه يوقف علشان الحياة تستمر حلوة.
- نبيه يوقف علشان كل شي ينمو في بلدنا.
كل هذي الأهداف يمكن تحقيقها إذا وقف الهدر في المال العام ووقف الحسد من قلوبنا ووقف الحقد من أعمالنا وهالشي ما يصير الا اذا تكاتفنا ووقفناه.
فعلى كل من يرغب الانخراط في هذا التكتل ما عليه إلا إرسال إيميل على العنوان الإلكتروني التالي: boshi55a@hotmail.com
يذكر فيه الاسم ورقم الهاتف ومتى يرغب أن يوقف كل هذا.

• كلمة راس
لما طبع السكرتير مقالي هذا قال لي وهو يبتسم أنا في البداية فهمت غلط.. لكن بعد ما انتهيت من المقال تأكدت أن الموضوع صح وأنا الغلط ولأن السكرتير فهم قصدي كان أول عضو يسجل موقف وقالها بصوت عالي «نبيه يوقف»..
إقرأ المزيد...

من هنا وهناك

25/10/2009
* هوشة التصريحات بين المواطن والمرشح السابق والناشط السياسي ولد الدائرة الرابعة النائب الفاضل مبارك الوعلان والمعارض السابق والنائب المحظوظ والوزير الأسبق أحمد باقر من خلال خدمة برلماني.. ذكرتني بمشهد حسينو الشري وقحطه صاحب محل النعل – عزكم الله – كان قاصرهم بآخر المسج يحطون كلمة «ياااااو».. وباقر كالعادة عقب ما تشرب مروقها يقول «لن انزل لهذا المستوى»..
* لما تم تعيين اللواء متقاعد فيصل الجزاف.. ما ادري ليش يحطون قبل اسمه لواء متقاعد دام انه تقاعد.. المهم.. لما صار الجزاف رئيس الهيئة استبشرنا خير وقلنا الامور راح تمشي والرياضة تنتعش.. لكن تمينا على طمام المرحوم.. لا طبنا ولا غدا الشر.. ورجعنا بعد تعيين اللاعب المتقاعد حمود الفليطح انتشينا وقلنا أشوه راح تتحلحل المواضيع وهذا احنا صار لنا أسبوعين ناطرين بارقة أمل..
ليش الشعب الكويتي صار يتنرفز من أدناة شي.. ويتحلطم حتى عند طابور الخباز الايراني.. ويضيق صدره اذا الإشارة طولت ثانية.. والطلاق صاير أكثر من الزواج.. والدواوين حنة ورنة.. والموظفين يلبحون على المراجع ان سألهم مرتين.. والمانشيتات كلها إثارة.. والفضائيات كلها حوارات.. سؤال احطه على طبق من الحيرة حق قسم الاجتماع بجامعة الكويت.. نبي دراسات واحصائيات وحقائق علمية لحالة الشعب.. يمكن من القروض؟
* لو رولا تحجبت.. وأسيل تنقبت.. والعنجري ربى لحيته.. وعلي الراشد قصر دشداشته.. ومحمد المطير بطل جت سكي.. هل راح تنحل مشاكلنا؟ لو محمد هايف لبس بدلة.. وجمعان الحربش ملط اللحية.. وصالح عاشور صار سلفي.. وخالد السلطان داوم بسيكل هل راح تنحل مشاكلنا؟ لو سيد القلاف لبس شماغ.. وحسن جوهر قط الخاتم.. وفلاح الصواغ سوا قفل.. وبادي الدوسري داوم بتريننغ سوت.. ومرزوق الغانم ما راح الملعب هل راح تنحل مشاكلنا؟

• كلمة راس
اللي يبي يشوف وضع الديرة هاليومين يروح مركز الفنون ويشتري مسلسل «ديوان السبيل» ويتطمش على الكويت بالوقت الحالي.. ديوان كامل فيه وزير ومدرا وجيش من الموظفين حق السبيل.. وأهم شي ركزوا على بوعدنان لما صار بالديوان.. صج خندريس!
إقرأ المزيد...

حمدي.. على حق

22/10/2009
قبل أسبوع وقت العصاري، قاعد بالحوش أغمس الدرابيل بالشاي، وإذ بي - شرايكم باللغة - سمعت صوت الباب، طق طق طق! افتحت الباب، طلع لي حمدي السباك!
سلمت: هلا حمدي، من وين طلعت لي؟ رد علي حمدي وقال: أنا عاوز اشتغل، أي شغلانة شريفة أصل المدام حامل، وأمي عاوزة دوا ومريضة، وابني بالسجن، وعمي متهم بقتل سوزان تميم.. وكمل بقية سوابق العائلة، المهم قلت له: يا حمدي من عيوني أساعدك، بس أنا الصحي عندي ما فيه شي!
قال لي: وماله إذا مافيش صحي، أشتغل كهربا، أركب اللمبات، وأعمل مساح، وإذا عاوز مساج صيني ممكن، وأصبغ وأكوي وأغسل، وأشتغل سيراميك، وبورسلان، وقرميد، ونجارة، وحدادة، وألعب بلياردو، وشطرنج.. يعني أشتغل كله، وكله بثمنه، جربني مرة، وحتتصل كل مرة!
اعتذرت منه، لأن اللي يعرف كل شي يعني ما يعرف شي - شرايكم بالحكمة -؟
المهم سكرت الباب على حمدي وفتحت جريدة ولا نائب مسوي نفسه يفهم بكل شي،
وواحد ثاني يمسك الميكروفون عشرين ساعة يتكلم ويصارخ ويهدّد، وواحد ثالث يتحدث عن تجاربه في النجاح المتواصل وهو قاعد بالبيت عاطل عن العمل.. وواحد رابع ما يوجه الاسئلة للوزرا الا كل 100 سؤال مع بعض.. وواحد خامس يتحدث عن الامانة والشرف والالتزام بالقانون والمحافظة على اموال الفقراء وهو شريك «مادوف» اكبر نصاب بالتاريخ.. وواحد سادس ما ينشر صورته الا وهو شاب ويعمل ماكياج اكثر من المطربة صباح..
قطيت الجريدة.. وقلت: والله حمدي على حق!..
إقرأ المزيد...

خبر وتعليق

21/10/2009
القبس - الأوقاف: تنفيع ومحسوبية في ترسية بعض مناقصات الكتب الإسلامية.
بوشيخة: اللي يسمع هالخبر يقول ان الناس ذبحه على هالكتب!
الوطن - الفيفا: الانتخابات (بالخمسة) حتى لو تم التعديل على المادة 32!
بوشيخة: يعني الانتقالية تلعب وصلاح حيدر يكسب؟
الراي - «الدفاع الجوي» الأوروبية: نتفاوض مع «نفط الكويت» على عقد حماية منشآت بـ 100 مليون دولار.
بوشيخة: شنو حاجتنا حق عقود حماية دام ما تم تسجيل ولا حالة تعدي على النفط خلال الـ 18 سنة الماضية؟
الأنباء - الفلاح: المساجد بيوت الله ومحل تنافس الخلفاء وموطن اعتكاف المتعبدين ونقطة ارتكاز المجتمع.
بوشيخة: كل هالحجي حلو وبمحله.. بس الفلاح ما يدري ان بعض هالمسايد صارت مكان للأحزاب السياسية؟
عالم اليوم - البراك: الشمالي محترف التضليل والتلاعب.. واستجوابه قضية وطنية.
بوشيخة: أشك ان بومشعل محترف.. ومتيقن ان بو حمود هاوي.. والشعب بالمدرجات نايم..!
الدار - «حزب الله» لـ«الدار»: استخدمنا حقنا بتفجير الجهاز الإسرائيلي.
بوشيخة: ومني لكم كل الاحترام والتقدير على استخدام هذا الحق..
الرؤية - «الخنازير» أخفت مشاريع التطوير من واجهة الاهتمام التربوي.
بوشيخة: ربعنا يدورونها بالسما ياتهم بالارض.. اي تعليم اي بطيخ والعطل أكثر من الدوام..؟
الجريدة - الخلف: ضرورة مواجهة أزمة الأمن الغذائي باعتبارها خطراً على الوضع العربي.
بوشيخة: والله محد يايبنا قري ومودينا بداهية غير البلعة.. يبيلنا مجاعة اسبوعين يمكن نفكر عدل..
النهار - الصبيح لـ «النهار»:أنا من ترك «الكويتية» ولن أعود لها لأنني لا أجيد الخلط بين السياسة والاقتصاد.
بوشيخة: والله يا بو حمد محد خسران غير الكويتية.. اما انت فمكانك زاهب وما عليك الا انك تزهب بشتك!!
الشاهد - أعضاء في التحالف الوطني: سنستقيل إذا انضم الجويهل إلينا.
بوشيخة: أوووف طلعوا مو من عيال بطنها واسمهم مو بالدفتر؟
الصباح - العازمي: المجلس البلدي من أهم أركان عناصر تحقيق السياسات العامة للبلدية.
بوشيخة: ورب الكعبه ندري .. بس شبيدكم وانتوا ما تملكون الا التصريحات

• كلمة راس
مطرب علموه كيف يجفو.. يموت بالاساءة إلى المذاهب الاخرى.. ويتلذذ بمدح أعداء أهل البيت.. ويتفنن بطرح مواضيع تفرق المجتمع.. رسالتي له.. روح عسى الله يحشرك مع المنافقين بالآخرة.. تدري شلون؟ «موت وشوف».
إقرأ المزيد...

مليون و26 نفر

20/10/2009
تعودنا في الكويت نقول ونكرر مقولة « مع احترامي الشديد» قبل ما ننتقد أي شخصيه عامه في البلد..مع علمنا المسبق ان الانتقاد البناء ما يحتاي هالمقدمة مولية...لكن شتقول في شعب يبدع في الكلام مو أكثر.. المهم.. الستة وعشرين نفر اللي حطوا لهم منسق عقب ما تعرضوا للنقد من كافة شرايح المجتمع.. دزوا بيان حق الصحف يبينون فيه حقهم الشرعي في مخاطبة السلطات! مع انهم خاطبوا أبو السلطات..!! ويقولون في بيانهم ان دوافعهم حب الوطن! يعني المليون كويتي اللي ما خاطبوا السلطات يحبون الكويت اقل منهم؟ كل هذا يطوف ويعدي ومانبي ندقق عليه..بس اللي بقوله يا جماعة الخير..حبيتوا الكويت كرهتوها.. شنقتوها صلبتوها دلعتوها دللتوها.. تبقى بلد مؤسسات لا تقبل القسمة على اثنين..واذا تحبونها هالقد ووايد ماخذة عقولكم بمشاكلها وبلاويها.. وين افعالكم؟ ترى الحجي هين وكلنا نقدر عليه..ليش ما سويتوا مثل الشيخه امثال اللي اشتغلت بإيدها ويمعت الشباب شحليلهم وياها؟ ليش ما حاولتو تسوون على الأقل مثل يسوون بعض جمعيات النفع العام بمختلف مسمياتهم؟ وينكم عن دوركم الاجتماعي السياسي؟ والا انتوا عندكم اجندة؟ خلونا نعرفكم لا عندكم موقع وكيان قانوني..لا تملكون مقر..ما عندكم صفحة على الانترنت..طلعتوا علينا مثل الفقع منين ما ندري.. شلون محنا عارفين...واذا مرزوق الغانم يفتخر انكم اساتذته فلا تقصرون بتلميذكم وقولوله اللي تبون واهو يطرحه بالمجلس.. خاصة عقب اقتراح «مراكز الحجامة» بوعلي شسالفة هالاقتراح؟ يقولون سويت حجامة وارتحت من عوار الراس وتقدمت فيه والله الخوف ان اللي سوالك الحجامة خلا راسك يفتر..ما علينا.. المهم والاهم ترى صاحب السمو ابونا كلنا..ويسمع منا كلنا..وامره علينا واجب نطيعه..بس ارجع واقول اللي يبي يشتغل يشتغل محد يرده واللي يبي يتحجى ترى اسهل شي الحجي.. ومن حق كل مواطن أنه يخاطب كل السلطات في الكويت، لكن باسمه، مو باسم الشعب الكويتي..

• كلمة راس
ما اشوف داعي بأن يقوم أي وزير سابق بالانضمام لتجمع او جمعية لأنه اخذ فرصته وزود.. الا اذا يبي يدرّس في الجامعات ما كو شي يمنعه يفيد الناس بتجربته..خصوصا الوزيرين اللي ماكله قلوبهم سالفة القروض.. اللي يسمعهم يقول بيدفعون من جمعيتهم التراثية.. جبح وزرا سابقين.
إقرأ المزيد...

مقال وتعليق

19/10/2009
القبس- أحمد الصراف: وعاش جدي ومات ولم يمنعني من لعب كرة القدم، التي أصبح لعبها محرماً، إلا بشروط سخيفة.
بوشيخة : افهم انك ضد اي واحد عنده لحية..بس كرة القدم حرام ..حرام عليك هالتجني..الا اذا كنت بتلعب بدون فنيلة.
الوطن- فؤاد الهاشم: كثرة الجدل في كل شيء وعلى أي شيء - في الكويت.. هو الذي جعلها تتحول الى.. سيرك كبير تدخله لترى ما فيه وتضحك فإذا به ضحك.. كالبكاء!
بوشيخة: آنا أقول كثرة الكتّاب تخليك تحس انك داش سوق الحمام..لأن الكل وده يكون ديج بزمن الدياي طال عمرك.
الراي - سعد المعطش: هناك أمر يجب أن يعرفه ويفهمه الجميع ومن ضمنهم مجموعة (26) اننا لم نطالب بإسقاط القروض ولكننا نطالب بجدولتها وإيقاف الفائدة.
بوشيخة: هذا وأنت بيتكم على البحر جذيه كلامك..عيل اللي ساكن بقطعة خمسة صوب المقبرة شيقول يا بو صالح.
الأنباء - م.ضاري المطيري: في الختام، نقولها بصوت عال «الحمد لله أن كشفوا بصنيعهم هذا عن قبح وجه الليبرالية تجاه الشريعة الإسلامية.
بوشيخة: يا باش مهندس شكو الليبرالية بالشريعة الاسلامية..جنك تقول ببني بيت بدوار الفحم الله يهدانا وياك.
السياسة - فيصل القناعي: ولا نريد للنائبات العزيزات ان يشغلن انفسهن بالصراعات السياسية فهن لسن بأفضل من النواب الرجال في هذا المجال.
بوشيخة: ويحك يا أبا غازي..طحت فينا انتن اللاتي رضعتن وطبختن..وختمتها بالنواب..جبح نواب..ويا زين النائبات.
عالم اليوم- فهد المنديل: ولكن لفت نظري أن هناك نائبات في مجلس الأمة أقمن الدنيا ضد فتوى الحجاب مع أنها صادرة من جهة رسمية هي وزارة الأوقاف.
بوشيخة: يا فهد نفس الوزارة حرمت دشتهم المجلس وتالي حللت.. ضعنا من الفتاوى السياسية وسلم لي على فيحان.
الدار- عادل دشتي: وكم كنت اتمنى ايضا لو التفتت اي من النائبات الاربع اللاتي حظين بثقة الشعب للمرة الاولى في تاريخ الحياة البرلمانية في الكويت،الى معاناة بيوت الكويتيات المنسيات.
بوشيخة: من صجك يا بوحسن والا تتغشمر..لو المعادلة جذيه جان التفتوا لنا الخمسين ريال قبلهم وانصفوا الرجل الكويتي.
الجريدة- د.ساجد العبدلي: ان جزءاً كبيراً من مشكلتنا السياسية، وتخلفنا على هذا المستوى وانعكاسه على هيئة رداءة كثير من اختياراتنا الانتخابية «والتلبك المعوي» المستمر في المسيرة النيابية، يرتبط بانعدام ما يمكن تسميته «الثقافة الدستورية».
بوشيخة: تبي الصج بوفيصل التلبك المعوي شلخنا يننا ..اذا عندك دوا غير الزنتاك الحق علينا..بلا سياسة بلا نيابة.
الرؤية- وضحة المضف: إنني لو كشفت مناطق الوجع في جسد هذه الفئة وسطرت لك المآسي والهموم فلن تكفي صفحات هذا العدد من جريدة «الرؤية».
بوشيخة: تناسق الجملة يذكرني بمقولة خالد الحربان «قوسية عرضية برازيلية شوفوها شوفوها شزينها» بس ما دشت قووول.
إقرأ المزيد...

كاتب مشوّش

15/10/2009

1).. وفي الوقت نفسه يراهنني على مئة وخمسين ألف دينار «قيمة ارض على ثلاثة شوارع دخلت مزاجي»، فان كانت هناك قضية لها رقم في النيابة فسأدفع وأنا صاغر المئة والخمسين ألف دينار. 2) في الثالث والعشرين من كل شهر، وفي الدقيقة الاولى من بعد منتصف ليل الثاني والعشرين، أتقدم متلثما متبخترا متمخطرا الى فرع البنك، فيأتيني صوت ماكينة السحب الآلي الأجش: «اهب يا وجهك، مايمديهم يحطون معاشك جيتني تركض». الفقرتين اللي فوق مايبتهم من كبت امي الله يطول بعمرها ولا من درج ابوي الله يرحمه.. نقلتهم بأمانة صحفية.. مقتطفات من مقالتين لاحد الكتاب، قلمه لذيذ واسلوبه كارتوني مميز.. طلته كانت بهية بإحدى القنوات.. وصارت مشوشة بقناة ثانية.. هذا الرجل كان ينطر معاشه واهو ضابط والحين مستعد يراهن بامية وخمسين الف دينار ويكعهم كع بكل سهولة؟، وبعد الشفر الادعم اللي جنه هامور ميافر الطبقة.. صار عنده رينج روفر وبيروت ملاذه.. الله يرحم يده.. المصيبة ان الحبيب من حقه يكون عنده طموح ومو غلط انه يتطلع لزيادة دخله.. بس الغريب انه ما باع خريط ولا راح الصين وياب ولاعات ولا تاجر بالشباصات من تايلند.. الغريب انه احد الاعلاميين الكبار سوقه ورتبه وزهلقه بقصد خلق كاتب متزن.. وبعدها شاف انه كوجه تلفزيوني ممكن يكون علامة فارقة لكنه بأول لفة فج المراد ماني مطول عليكم.. اذا كان الحبيب بظرف سنتين صار عنده القدرة يدفع امية وخمسين الف كاش؟ عيل اللي يدافع عنهم شكثر ممكن يقدرون يدفعون؟ اذا الولد هالقد عنده، عيل المعازيب شكثر عندهم؟؟.. وانا اشوف هاليومين ليش الكل يبي يصير كاتب.. وصدق من قال «شكثرهم». • كلمة راس اتمنى ان صاحبنا ما يأخذ هالمقال على محمل الشخصنة.. واتمنى اني اكتفي بهالقدر من التناقضات بمقالاته.. لان مواقفه السياسية ككاتب كانه تنكر ماشي عاليمين ويخرخر مياهه.
إقرأ المزيد...

الانبطاح الفكري

14/10/2009
ما ممكن الإنسان اللي عنده شوية عقل يقبل يكون تابع فكريا لشخص.. مهما كانت درجة ذكاء هذا الشخص وقوة تأثيره.. ولا افتكر مر على الدنيا رجل بمواصفات النبي الأكرم صلى الله عليه وآله وسلم.. ورغم كمال هذا الرجل المطلق.. ومعجزاته الناس كفرت فيه وبعض الكفار قالوا انه ساحر ومجنون وشاعر الى آخر ما جاد فيه كفرهم.. ولا يمكن أن يطالب إنسان عاقل أو شكله يدل على أنه عاقل بالتفاف الكل حول رجل واحد في هالزمن الأغبر.. لكن في عندنا وتحديدا في الكويت كتّاب وأصحاب رأي شغلهم الشاغل مطالبة زملائهم اللي أنا مو منهم.. بضرورة الوقوف مع اللي يشوفه رمز.. شهالرمز ما ندري.. شلون صار رمز مو معلوم.. منو سماه رمز منعرفوش على قولة اهل الاسكندرية.. وبكل صفاقة تلاقي بعض هالكتّاب يسولف عن رمزه الخاص ويزين أفعاله والأدهى والأمر انه يوصفه بصفات ما هو بوارد يكون من أهلها، وينسب له أفعال وإنجازات ماله فيها لا صخلة ولا قطو.. ويتبجح بكل وناسة انه من أتباع هذا الرمز، ويبي الكل يقضب طار ودف مثل ما هو قاضب طبلة ويمشي وراه ويغني مثله النشاز.. شلون يعني؟ ما تبينا نبدي راينا؟ يا أخي من شارع البيبسي لي شارع فهد السالم وتالي شارع تونس وين بتروح؟

• كلمة راس
لكل من يريد تجزئة هذا المجتمع وفق مصالحه.. وحرمان الأقلية من حقوقهم الدستورية.. وفرض آليات تحت مسمى الأعراف.. ومحاربة الفقير في رزقه.. روح الله لا يوفقك ولا يهدي لك بال.. قولوا آمين.
إقرأ المزيد...

شيوخنا..عزنا من عزكم

13/10/2009
التاريخ الكويتي بكل اتجاهاته السياسية والاجتماعية والاقتصادية والثقافية..وتحديدا قبل ميتين وخمسين سنة، كان ولا يزال زاخر بأخلاقيات اهل الكويت حكام ومحكومين..ورغم فلسفة بعض السياسيين الدايخين.. وهرطقاتهم المهفية..ورغم عظرتة بعض الكتّاب وقراءاتهم المريضة اللي تنم عن نفوسهم السقيمة..يبقى تاريخ يضم بين جنباته الاحترام المتبادل بين الكبير والصغير على كافة المستويات..لكن شنقول وشنخلي وشنشيل وشنحط في زمن صار فيه الذيل العوي يسوي روحه راس مرفوع؟ كلنا ككويتيين نفتخر ونفاخر بالتفافنا حول الاسرة الحاكمة من سمو الامير لي أصغر شيخ..ونختلف معاهم بحب ووئام..بايعوهم آباءنا وأجدادنا على الطاعة والشورى..تجارنا ما قصروا ودعموا الحكم بأحلك الظروف..مثقفينا بنوا مجد من خلال توجيهات الحكام لهم..العمل الخيري ازدهر وبشكل خاص في الكويت قبل دول الخليج بفضل حث الاسرة الحاكمة لأهل الخير..الشعب بكافة مستوياته وطبقاته العاملة يكن للحكم حب وولاء مطلق ما ممكن نحصل له مثيل في العالم مجتمع..عيالنا تعودوا ينادون الامير «بابا»..المقيمين على الأرض الطيبة يحتارون من حبنا لحكامنا وتجارنا وشيوخنا ورموزنا..لكن آه والف آه من هالزمن.. اللي رفع خدّام وخلاهم بفضل الديمقراطية أوادم.. واستغلوا طيبة الشيوخ وقاموا يهاجمونهم..عيب وما يجوز ولا يمكن يمر هالشي مرور الكرام..لكن مثل ما قال راعي المثل «اذا ما تستحي العب على ما تشتهي»..وفي ناس الحيا عافهم من زمان..والشرف ما مر عليهم موليه..والسكوت عنهم أمر مرفوض..لازم نتحرك ونحاربهم..لأن الحرامي اذا باق يضر نفسه..والفاسد اذا تجاوز القانون يسيء لنفسه..اما اللي يحول حقده الى رأي ويهاجم الاسرة والتجار يخرب ديره بكبرها، ومالازم نسكت عنه..فهل من مجيب؟

كلمة راس
نحمد الله ونشكره ان القانون يجرم التطاول على الذات الاميرية.. وبنفس الوقت ودي لو اشوف رد فعل على كل من يحاول الزج باسم صاحب السمو..وهذا نداء للديوان ترى هذي مسؤوليتكم.
إقرأ المزيد...

إيجابيات وسلبيات

12/10/2009
كوني كاتب مقال يومي في الصحافة الكويتية غير معروف للجميع أتمتع بميزة أن الناس تسولف عن همومها جدامي بارتياح سواء كانوا مواطنين أو أصحاب قرار أو نواب في مجلس الأمة.. وهالشي يحملني مسؤولية نقل آلام الناس وآمالهم بدون ذكر وقائع تخليهم يعرفون ان اللي وراها بوشيخه وبالتالي كشف شخصيتي.. ويمكن في المنتديات والمدونات وبعض الدواوين والوزارات قرأت وسمعت وشفت شلون أن البعض ينتقد بوشيخة ككاتب كونه متخفيا باسم مستعار.. ولجريدة «الدار» توجه وسياسة في هذا الجانب.. وقبل يومين كنت بمكان عام وسمعت حوارا دار يمي بصوت عال طالب أصحابه بأن على كتّاب الصحافة التركيز على الإيجابيات، مو بس السلبيات.. وأنا بدوري بلبي هالطلب وأكتب لكم الايجابيات اللي نتمتع فيها كمجتمع كويتي وبنفس الوقت سلبيات نفس الموضوع.. عندنا مجلس أمة يراقب وعندنا بوقات بالهبل.. عندنا مجلس أمة يشرع وعندنا ظاهرة تجاوز القوانين وعدم احترامها.. عندنا مجلس يستجوب وعندنا استمرار لنفس المشاكل بنفس الوزارة.. عندنا خطة تنميه وعندنا بنفس الوقت شلل تنموي واضح.. عندنا وزارة للصحة وعندنا كل الأمراض بدون علاج.. عندنا مليوني وافد وعندنا كفيل ظالم.. عندنا جمعيات تعاونية وعندنا جنون بالأسعار.. عندنا هيئة للبيئة وعندنا كوارث بيئية.. عندنا توجه لحل مشاكلنا وعندنا خروج على أدب الحوار.. عندنا 15 جريدة وست فضائيات وإذاعة واحدة وعندنا قصور في التعبير السليم.. عندنا شوارع شزينها وعندنا ناس الله يستر منها.. عندنا أحسن سيارات وأحسن شوارع وأحسن قوانين وعندنا أكبر نسبة حوادث مرورية قاتلة.. يمكن الإيجابية الوحيدة اللي بالكويت ما تقابلها سلبية هي الولاء المطلق للأرض والأسرة الحاكمة.. وهذا أهم من كل سلبيات الدنيا وما فيها.. وعاشت الكويت وعاش الأمير يا أوفى شعب على وجه الأرض.

• كلمة راس
التغني في الوحدة الوطنية يحتاج الى أفعال وأهل الكويت بدوا وحضرا شيعة وسنة مسلمين ومسيحيين، أثبتوا هالشي قولا وفعلا والدور والباجي على السياسيين انهم يحطون هالميثاق جدامهم ويخافون الله فينا وفي الديرة ويتعاونون مع الحكومة علشان نرتقي كلنا..
إقرأ المزيد...

اذكروا محاسنهم !

8/10/2009
القرآن مليء بالقصص ومنها نتعلم.. نقرأه ونتدبره علشان نعرف الامم اللي قبلنا ونتعلم من تجاربهم.. لكن القرآن نموذج كامل كمالاً مطلقاً.. وافق هواك الحدث.. عجبتك القصة ما عجبتك القرآن صح غصب على شواربك.. وغير هذا انت غلطان.. التاريخ كذلك متروس نماذج سلبية وايجابية وفيه ناس حطوا لهم مكانة بالتاريخ.. وساهموا مساهمات راقية كانت كفيلة بأنها تخلي الناس تذكرهم بالخير وتتنطع بذكر أسمائهم في المجالس.. في كل المجالات تشوف العجب من الحكمة والمنطق والتميز التام.. بالطب.. الجغرافيا.. العلوم.. الأدب.. بكل المجالات تشوف إجماع الناس على جمال ورونق وعطاء الشخص.. إلا بالسياسة.. ما ممكن أحد يجمع أو يلتف على شخص سياسي.. مهما سوّا هالشخص راح تلاقي له مخالفين بالرأي وبالحجة وعندهم مبرراتهم.. ود.غانم النجار الناشط في مجال حقوق الانسان.. أكثر واحد حاشه طشّار من السياسيين وتم اتهامه بوطنيته ذيج الأيام.. رغم انه عمله كان انسانياً بحتاً ومثل الكويت في معظم المؤتمرات اللي لها صله بحقوق الانسان وتم اختياره بمواقع مهمة دولية وقارية وإقليمية.. والرجل ينطلق من كونه انساناً يحمل مسؤولية أخيه الانسان بغض النظر عن طوله ولونه ولسانه.. والدكتور من مدة اخذ على عاتقه سرد حقبة من تاريخ الكويت تبين وتبرز دور الراحل عبدالله السالم.. وهذا شي حلو وجميل ورائع.. بس يؤخذ على د.غانم اللي يفترض انه عانى من النقد القاسي بفترة مو بعيدة.. انه ما ينتقد شخوص رجال الكويت اللي صاروا تحت الثرى تجارا كانوا أو مسؤولين حكوميين أو مواطنين تعاطوا مع زمن الراحل عبدالله السالم وفق رؤيتهم.. حتى لو اليوم اكتشفنا فشلهم.. يبقى انهم كانوا عاملاً مهماً لولاه ما قدرنا ننهض بالبلد.. وليش نسمي اختلافهم اختطافاً للبلد.. وليش نحملهم وزر كل اخطائنا احنا كشعب اللي لي الحين نشوف الديمقراطية مجلسا وصراخا مو اكثر؟ اي نعم من عهد مبارك الكبير لغاية عهد صاحب السمو الله يطول عمره.. فيه ممارسات في الدولة على كافة المستويات مو جيدة حالنا حال أي أمة وشعب ودولة في الدنيا.. هل يقبل غانم النجار بعد ستين سنة ان أحفاده يقرون بالجرايد انه خلافه في وجهات النظر مع اللي يحكمه او يدير شؤونه في 2009 نعتبره مخالفة ومناكفة واختطافاً؟ ما اظن..

• كلمة راس
معقولة جمعيات النفع العام على كثرتها وميزانياتها ومواقعها.. ما قدموا ولا دراسة واحدة علمية؟ ولا تقدموا بأي استطلاع رأي مبني على أسس علمية؟ الظاهر ان عدوى الخلاف انتقلت من السياسة الى الجمعيات بتبعيتها للسياسيين.. شهالشعب يتريق سياسة ويتسحر تأزيم.
إقرأ المزيد...

زايد في الوطن

7/10/2009
ألف الحمد لله على سلامتك يا زايد الزيد.. خطاك السو.. ما تشوف شر.. جت سليمة.. والدعاء لك بالشفاء العاجل ولأسرتك الكريمة وأهل بيتك بالصبر واحتساب الأجر عند رب العالمين.. واللي صار لك في كل الاحوال كان شي شخصي والا بسبب رأي ابديته مرفوض جملة وتفصيلا.. وما ممكن نقبل تصرف هذا الأحمق الأثول تحت أي ذريعة.. والحقيقة يا زايد اني لما شفت صورتك تألمت وايد وضاق خلقي وما تمنيت يصير هالشي لأي شخص عزيز عليك وعلي.. واللي ريحني تفاعل أهل الكويت بمختلف توجهاتهم وأطيافهم وياك ورفضهم للي صار.. واللي خلاني ارتاح زود إيد سمو رئيس مجلس الوزرا بوصباح اللي كانت تمسك إيدك بالصورة وانت منسدح على سرير المستشفى.. الحقيقة ان بوصباح رجل قلبه بمساحة الكويت وأكبر.. لكن اللي صار بعد الحادث خلاني أعيد النظر في بعض المواقف.. ومنها استقبال تلفزيون الوطن لك وتغطيته للحادث بتعاطف جميل يبين سمو أخلاق الشيخ علي الخليفة.. رغم انك يا زايد ذيج الأيام كنت مشلخ الشيخ وأدنته وأهو متهم بريء حسب القاعدة القانونية العظيمة.. وحتى يوم برأه القضاء ما دزيت له برقية أو مسج اعتذار عن حكمك المسبق.. تبي الصج شيوخنا يدودوهنا بحنانهم وعطفهم وتفهمهم واحتوائهم حتى لخصومهم.. هذولا أهل الكويت وهذي أفعالهم.. وقت الشدة ما يصيدهم أحد بالصلابة ونسيان الألم.. لكن الدور عليك يا زايد الزيد وعلى كل من يشيل لواء الكلمة أن ينصف الناس اللي خاصمهم بالحق أو بالباطل ويقول كلمته في الوقت المناسب.. ولا أعتقد يا زايد انك جليل وفا.. وانت رجل معروف بكرم أخلاقك.. ولا أفتكر ان أي شخص يبي اعتذار من أحد.. لكن هذا نهج لازم نغيره ولا نحكم على احد ونوصمه بالفساد مهما اختلفنا وياه.. تبي الصج يا بوطلال .. رحابة صدر الوطن لك.. درس لي لأني من اليوم ورايح تعلمت الوفاء والصبر في أحلك الظروف.. والحمد لله على السلامة مرة ثانية.
إقرأ المزيد...

6/10/2009
صعقت بل ذهلت بل دهشت.. إلا انثول مخي لما اللي انكتب على الصفحة الاولى بجريدة «الدار».. على لسان النائب السابق المليفي.. من أن في بيننا في الكويت بعثيين أو بالاحرى بقايا فلول البعث ويبون جناسي ويمارسون العمل الإعلامي؟ على ذمة الشبكة الوطنية وعلى ذمة «الدار» وعلى ذمة المليفي.. ان كان هالحجي صحيح فهذي مو كارثة ولا مصيبة ولا بلوى.. الا هذي أم المصايب خالة الكوارث ويدة البلاوي كلها.. شلون دشوا الديرة؟ شلون تغلغلوا بين اهلها؟ منو اللي قاعد يساعدهم؟ هل احد فيهم صاد الجنسية؟ جم عددهم؟ شنو أهدافهم؟ هذي أسئلة وتساؤلات ما اعتقد طافت على رجال أمن الدولة الأفاضل اللي نثق فيهم.. وما ممكن تكون عدت على رجال الاستخبارات في الجيش.. ولا يمكن تكون معلومات مجردة أو أولية طافت على أجهزتنا الأمنية.. تبون الصج؟ شي يخوف ويخلي الواحد يبقق عيونه ويسمت يبهته ويفرك حنجه.. والله عاد انا بحسي واحساسي كنت منيشن على جم واحد بالمجال الاعلامي وشاك فيهم من اشباههم واسماءهم وحركاتهم.. والله يا خوفي يصدق هالشك ويطلعون كواولة وبعثيين واحنا يا غافلين لكم الله.. وانا اقووول فيه صحفي يسألني عن تويوتا كراون ! لالالا ما اعتقد الظاهر ان راسي افتر وقمت اخوره.. والله تبون الصج احترت.. بس الأمل في الصحافة الحرة والاعلام المسؤول انهم يتصدون حق هالموضوع ويحققون فيه، والدور والباجي على أمن الدولة هذا الجهاز الراقي برجاله، ولا عندي شك واحد بالمليون في يقظتهم .. أشوه اني ما أعرف من الكتّاب إلا اثنين مالهم شغل بالعراق مشاري هواه لبناني وذعار مزاجه فرنسي.. بس عندي شك صغير بمحرر دايما يقول .. هسه اكتلك..

• كلمة راس
الشيخ الوسيم خلقا وخلقا محمد الخالد رئيس جهاز الأمن الوطني أيام ما كان وزير الداخلية كان مطلق اهتمامه في قضايا الأمن الوطني والحين أهو رئيس الجهاز ونتمنى منه يهتم بهالموضوع ويريحنا مثل ما ريحنا من تجار المخدرات.
إقرأ المزيد...

مجلس بوبيان

5/10/2009
شاللي مدودهنا ومضيعنا ومخلينا محتارين؟ شموضوع التأزيم اللي صاير موضة هاليومين؟ والف سؤال مثلهم يدورون بالراس وبكل دورة يقحصون ويغبرون ويخمسون بالمخ.. ملينا.. لاعت جبودنا.. طفحنا.. هلقوا فينا السياسيين في الكويت.. شرموا أم دماغنا.. تاليتها شنو؟ يعني ما يصير ديرة تعداد سكانها مليون يطلع واحد منهم بالحظ ويصير نائب ويوقفهم كللللللللللللللهم على ريل واحدة؟ شوفولنا حل.. حتى الخدم حاشتهم العلة.. الديرة انثولت ما عندهم اهلها حجي غير تأزيم استجواب تأزيم تحقيق تأزيم فساد.. خمستعش جريدة فيها ألفين كاتب ما عندهم شغل غير التشاؤم؟ يخرب بيتها بيئة تلوع الجبد.. يبا ليش ما يطلع قرار ينص على ان النواب الخمسين يروحون بوبيان.. يسوون لهم حكومة ويستجوبونها يوم وترك.. واللي يبي النواب يلحقهم.. ونسميها محافظة النواب.. وبالمرة نأمن جبهتنا مع دول الجوار لأن النواب هناك فأكيد الحرس بيكونون وياهم.. تدرون شلون حتى الجزيرة راح تزدهر لأن بيكون فيها حراك سياسي عسى الله يحركهم قولوا آمين.. وهناك ببوبيان يسوون ما بدالهم.. خل يمنعون الشيشة ويمنعون الاختلاط ويحطون ميتر كهربا سويجه عند رئيس المجلس يطفيه الساعة ثمان وينامون ويفكونا.. واللي يبي يروح معاهم من الكتّاب خل يفارج ويفكنا ويسوون لهم جريدة يسمونها «بوبيان قهر نيوز».. ويكتبون فيها ما بدالهم بس يحلون عن سمانا.. وجان زين الشيخة امثال تسويها «محمية النواب » وكل ما صار الصيف نطل عليهم ونتطمش عليهم.. خلونا نجرب ونشوف شلون الديره راح ترتاح..

• كلمة راس
المدونين هاليومين شابين على كتّاب الصحف.. وكتّاب الصحف مشلخين الحكومة.. والحكومة ساكتة.. والمواطنين يطالبون بإسقاط القروض.. والمقيمين يبون إقاماتهم عليهم.. ومع هذا محد يصرح أربعة وعشرين ساعة إلا النواب.. شكو؟
إقرأ المزيد...

والله.. هايف

4/10/2009
معقولة؟ بعد كل هالتجربة البرلمانية والحياة النيابية وبعد اربعين سنة وأكثر من الانتخابات والحملات الانتخابية.. والجمعيات السياسية.. والتجمعات البرلمانية.. يطلع عندنا بالكويت عقب كل هذا.. واحد بنوعية هايف؟الشك عنده يقين والحقيقة عنده وهم.. والدلاغ الشفاف عنده جيس جمعية؟ هل هذا نوع من الحول السياسي؟ هل حالته السياسية انفلونزا خاصة؟ يا أخي بلفتنا.. تلفتنا.. شلختنا..دوختنا.. جنها الديرة خلصت كل مشاكلها ويات على الجنوس والبويات؟ سويت لنا شنة ورنة على لجنة الظواهر وخبيتنا.. وقابلت الجنوس بالمجلس.. وسويت روحك ابو اليتامى والأرامل للبدون.. وتاليها يوم طلعوا نواب زملاء لك بالديمقراطية وصاروا باللجنة صارت كخة وعوع؟ شفيك؟ علامك.. انتبه حق الأهم من الجنوس والبويات.. اشتغل بذمة بدل مؤتمراتك الصحفية الداثرة.. لعنت ابو الديمقراطية.. سوفت فيها لي قبل .. ناقصنا بس تتحكم بلون ملابسنا الداخلية .. «ديتول» فعاليته أبرك من فعالية سوالفك العمية.. اترك عنك سوء الظن وانتبه لكلامك .. والله يبا ابتلينا فيك.. والا أكو ديرة عندها هالثقافات وشعب حر ومتنعم بالحرية يختارك؟ بس الله يجازي الفرعيات اللي حرمتنا من الكفاءات ويابتك الله لا ييب افكارك ولا يكثرها.. وانت اول من يعاند ولي الامر.. ما اقول الا الله يعين الجنوس اللي قابلتهم شلون تحملوك.. جبح.

• كلمة راس
ماكو فايدة لو اكتب ستمية مقالة عن هايف راح يبقى هو هو هايف ما يتغير.. لأنه نجح بالانتخابات بالحظ.. وصار نائب بالصدفة.. فأكيد مشاريعه وافكاره ما راح تتغير مولية.. وصدق الشاعر اللي قال.. «زعم الفرزدق ان سيقتل مربعا.. ابشر بطول سلامة يا مربع».. وهايف حيبأى هايف.
إقرأ المزيد...