نصيحة بجمل

نصيحة بجمل

8/1/2012

تبون نصيحة بوشيخة وبوشيخة صاج، اذا تبي تنتخب: لا تنتخب المرشح اللي كل يوم على ماية يوم معاك يوم ضدك، يوم معارض يوم مؤيد، يوم اسلامي ويوم هتلي، يوم صاعد يوم نازل، يوم ياكل كباب ويوم شباتي.. لانه هذا مسرع ما يبيعك!

ولا تنتخب المرشح بوعشرين وجه وقناع كل ديوانية غير، مع الدينيين يصير دين ويصوم بالعيد، مع الجمبازية جمبازي، ومع الرياضيين مارادونا وميسي، لانه هذا اذا دش المجلس مع الوزير يصير حكومي، مع النواب يصير معارض ومع نفسه مرتشي ونصاب وفاسد!
ولا تنتخب الوايد نظيف لانه ماكو أحد نظيف واللي تشوفه وايد مسوي روحه نظيف اكيد هذا خاش شي لانه مافي احد يدش لعبة السياسة وهو نظيف ومؤدب ومحترم وزين وما يرفع صوته علشان ياخذ، فحطوا بالك من النظيف وايد!
ولا تنتخب اللي يقرق وايد ويقعد بالديوانية ساعة ونص وهو يتكلم ويقرق ويقول كل شي ويعرف كل شي لانه اولا يقرق لانه ما يبيك تسأله وتورطه، وثانيا اللي يتكلم وايد ما يعرف شي وحلاته المرشح يقول كلمتين وتعرفه تالي بالنقاش والحوار مو بالخطب العصماء!
ولا تنتخب العنصري والطائفي واللي يلعب على هالاوراق لانه هذا بيستغل عواطف الناس علشان يوصل ولانه هذا مستعد يبيع ديرته والوحدة الوطنية علشان الكرسي هذا مو كفو الكرسي ولا كفو مجلس الشعب الكويتي!
ادري صعب انه تلقى مرشح زين بس في ولو خليت خربت المهم انت اختار مو أحد ثاني يختار بدالك فانت قبل كل شي مسؤول عن اختيارك لمستقبل عيالك!