آفا يابوحمود
31/5/2011
هذي آخرتها يابوحمود، يانائب الامة! صار في كويتيين حقيقيين، واهمه الي حضروا جمعة الغضب، والباجي طلعوا مو حقيقيين! شلون حسبتها ياالبراك، يعني ربعك ماركات غوتشي، وفرساتشي، وشانيل، وباجي اهل الكويت تقليد، ومن سوق بوامية! يعني ربعك الي صفقوا لك، والي هتفوا لك، والي رفعوا لك العقل، والي شققوا الصور، طلعوا صنع في اليابان، واحنا الي ما حضرنا، والي معارضينك، والي يقول لازم النائب يجابل شغله بدل ما ينزل الشارع، طلع صنع في الصين!
معقولة انت تقولها، وفي مؤتمرك الصحفي، يعني مو في التجمع ويمكن كان متحمس، بس في المؤتمر وتقسم الكويتيين حقيقيين وغير حقيقيين فهذه كبيرة!
شنو خليت لغيرك، وانا الي ادافع عنك عند ام شيخة، وكل يوم اقرأ وأتابع اخبارك، وحاط صورتك بالديوانية، هذي اخرتها تقص ويهي جدام ام العيال، تعايرني وتقول انت ذابحتنا بضمير الامة، وبعدين ضمير الامة يقسم الامة الى قسمين، امة حقيقية وامة تقليد!
افا يا نائب الامة ما هي الهفوة منك، ولا نطرناها منك، شنو خليت للعنصريين والطائفيين، وانا اعرفك «كلش زين» عمرك ما كنت انسان فيك جاهلية، ولا تعصبت لغير الحق، بس اسمح هالمرة ما ظبطت معاك، وهالمرة فلتت منك، لا انا عندي عذر ادافع عنك، ولا انت عندك عذر في الي قلته!
يابوحمود مالك الا اهل الكويت الي دوم عزوك، واحترموك، بس انت ما رديت التحية باحسن منها، انت لفيت عليهم وصعدتهم الرصيف، ودخلت الامة والحكومة كلها بالشبة! بس، ما ابي اتكلم اكثر اخاف باجر تدش المجلس وتقول بوشيخة الي يكتب بالدار مو من الكويتيين الحقيقيين.. سحبوا جنسيته!
إقرأ المزيد...
الثلاثاء، 31 مايو 2011
الاثنين، 30 مايو 2011
هند رستم تشق الصورة
30/5/2011
في الفيلم العربي، هند رستم نايمة على سريرها وتبكي، وجدامها قوطين كلينكس، وتكلم روحها، حمدي الخاين الغدار، انا كنت بحبه انا اديته كل حاجة، انا سبت اهلي وماما وبابا، وجيراني، وحاربت كل الناس علشانه، انا بحبه وهو فقير كحيتي وانا بنت الاصل والفصل انا بنت الباشا السلحدار، وهو واد مفعوص، ما عندوش اللظي، بعد كل ده يخوني مع البنت الخدامة الى ما تسواش جزمتي.. فين الصورة؟ تقوم من مكانها وتاخذ صورة عماد حمدي ثم تشقها وترميها على الارض، وترجع تبكي على السرير!
في الفيلم الكويتي، نوابنا واقفين وكل واحد راز وجهه للكاميرات، ولانهم زعلانين على الحكومة، فيقومون مثل هند رستم يشققون صور النواب ورئيس الحكومة والمجلس في مشهد بايخ، يدل على سخافة افكارهم ومستواهم الثقافي والفكري!
طبعا لازم نذكر نوابنا الثوريين، وبقية «الكويتيين الاصليين» مثل ما قال مسلم البراك، انه الجرايد يوميا ينشرون الصور للرئيس والنواب، يعني لازم يوميا يوقفون في ساحة البلدية ويشققون الجرايد الي حاطين الصور، وبعدين لازم يحرقون تلفزيوناتهم لانها تعرض اخبار النواب والوزراء والحكومة والمجلس، ولازم طبعا يدزون لهم شوية انتحاريين يفجرون مكاتب الفضائيات الي يسوون مقابلات مع النواب! واخر شي يدزون هكرز، ويحرقون اي موقع في صورة الخرافي والمحمد والنواب!
الديمقراطية الي تعلمناها تطور نفسها بنفسها وتتقدم دايما، الا احنا فديمقراطيتنا تمشي بالعكس، والمستوى السياسي من ردي الى اردى.. وكله بفضل نوابنا الاشاوس الاصيلين!
إقرأ المزيد...
الأحد، 29 مايو 2011
بوشيخة يغزو ساحة البلدية
29/5/2011
الجمعة اللي فاتت بالصدفة انا وام شيخة طالعين من سوق المباركية، قلنا نتمشى شوي! شوي والا الدوريات والامن والحواجز والمظاهرات والخطابات.. ومن باب الفضول طبعا مو تقولون رايح عمدا وتورطوني، بالصدفة دشينا التجمع وقعدت اسمع شيقولون بس عاد خلتني ام شيخة شلختني اسئلة:
• بوشيخة ليش يتظاهرون الناس؟
- لانهم يبون يروحون الصفاة والداخلية مو راضين!
• بيشترون غنم؟
- لا هذي الصفاة غير، هني ساحة الصفاة!
• يعني بيشترون عطورات ومو مخلينهم؟
- لا يا ام شيخة هالعالم طالعين وعندهم مطالب سياسية!
• انزين، هذا الريال اللي ماسك الميكروفون ويصرخ ليش يصرخ؟
- هذا قاعد يعبر عن رغبات الجماهير الكادحة!
• وليش الجماهير ما تعرف تعبر؟
- تعرف بس هذا احسن واحد يعبر عليهم!
• وليش رافع بطاقته المدنية؟
- ما ادري يمكن مضيع بطاقته او يبي يجدد البطاقة ويسأل اذا واحد عنده واسطة بالبطاقة المدنية!
• وليش واقف هني بالبلدية ليش ما يروح جنوب السرة عند المعلومات المدنية؟!
- لانه ما خلوهم يوقفون في الصفاة وقفوا عند البلدية، ما سمعت شي يا ام شيخة والسبة اسئلتج!
• لا بس سؤال واحد، هذولة كويتيين طبعا!!
- طبعا يا ام شيخة في شي غلط؟
• شي واحد بس!
- شنو؟
• ماكو ولا واحد فيهم رافع علم الكويت!
إقرأ المزيد...
الخميس، 26 مايو 2011
رسب
26/5/2011
«سوسو وشوشو» قرروا يفتحون لهم دكان بيع القذارة في الانترنت، موقع اخبار مثل ما قالوا عنه، وهدفهم الوحيد في البداية كان بيعه على احد الشيوخ الطموحين الى عطاهم طاف، وشاتهم برة هو وربعه، بعد ما اكتشف انهم شوية بنات ليل وانتو بكرامة، وهدفهم البيزة وبعدها طبعا اشتغل شوشو وسوسو في التهجم على الشيخ بعد الفنقرة!
وبما انه فنقرهم، فقالوا نطلع الموقع بعد ما تورطنا فيه واعلنا عنه، نمدح فلان علشان يعطينا، ونسب فلان علشان يسكتنا بكم فلس، فجمعوا لهم النطيحة والمتردية، وربعهم اللي في الديوانية شوفوا الاسامي وتعرفون من نفس الصنف، بس مغيرين الاسم الاخير يعني غير! يابوا شاعر من ورا المحول وحطوله زاوية، ويابولهم صباب شاي بالديوانية وحطوا له زاوية، ويابوا واحد بس اسم وصورة وهم يكتبون بداله وصفولهم شوية اخبار مثل لون اسنانهم.. وفاتحين المزاد على الاخر والحسابة بتحسب!
ومن اول يوم تكلموا عن العم الفاضل جاسم الخرافي واهانوه وقالوا عنه كلام لا يقال، بمجرد انه رجل حكيم ويوازن الامور ويعرف متى يتكلم ومتى يسكت متى ياخذ موقف قوي وحازم ومتى ياخذ موقف دبلوماسي لانه دائما الكويت ومصلحة الكويت عنده قبل كل شي!
بس سوسو وشوشو وجماعة «رسب» عندهم هدف واحد في الحياة كهدف العاهرات الفلوس والشغل مش عيب يبيعون ضميرهم حق اي واحد يدفع مو مهم عندهم لا ديرة ولا مستقبل ولا وحدة وطنية.. اهم شي بيع الضمير على المكشوف واضافة شوية بهارات الوطنية والمال العام.. وباجي الفيلم اللي حافظينه!
معلش يا شوشو وتابعك سوسو.. مكشوفين على الاخر وبسبة قلبكم الوسخ انطردتوا من المؤسسات الصحفية المحترمة وانا بوشيخة من موقعي هذا مجهز نفسي للرد عليكم!
إقرأ المزيد...
الثلاثاء، 24 مايو 2011
جمعة الكلكجية
24/5/2011
يوم الجمعة اللي فاتت كنت جالس على عرزالة في شاليه صديق، وهذا الصديق البايخ قاعد ومجابل التويتر والفيس بوك.. وما ادري منو، وكاشت فيني فجأة وقبل ان يحين موعد العشاء قال لي: تبا لك هيا بنا نتظاهر!
قلت له: يابن الحلال وين تتظاهر في تعز ولا صنعا ولا في الحديدية؟
قال: لا بل في ساحة الصفاة تعال نروح نجتمع اليوم «جمعة الدستور» ونسوي اجتماع صامت!
قلت له: طيب احنا بالليل اي جمعة بعدين انا سامع جمعة مباركة مو سامع عن جمعة دستور انها بدعة!
قال لي: لابد احنا بنروح لان الدستور قاعدين ينتهكونه.. وبيني وبينكم انا خفت على الدستور خاصة اذا منتهكينه فهذه مصيبة هديت عرزالتي ورحت مع الاخ صاحب الاقتراح ثم قفلنا راجعين (يا عيني وانا اتكلم بالنحوي!).
المهم رحنا، ووصلنا ساحة الصفاة كانت مسكرة والناس واقفة تطالع وما صار تجمع صامت طلع كل نائب مبطل حلجه على الاخر ونحن واننا ولكننا وسنمرغ انفهم وسنضرب بيد من حديد وكلام ما يقوله صبي منحاش من الحصة الخامسة وقاعد يشرب تتن ورا فرع الجمعية.. لا اسلوب ولا ثقافة ولا ادب والناس تصفق، وصاحبي هم وراهم تحمس وطاح له تصفيق اقوله يالحبيب شكو تصفق؟ قال لي مع العالم كلهم يصفقون واصفق معاهم!
وبعدين قالوا لهم نروح مجلس الوزراء شلون دلوا الطريج ما ادري الظاهر كان معاهم «جي بي اس» بس وانا في الطريج تليت صاحبي وقعدنا تعشينا جبدة وقلوب بالمباركية، وسالت صاحبي شنو شعورك وانت ياي تدافع عن الدستور وشفت اللي داسوا ببطن الدستور هم اللي يقودونك؟ قالي وهو يلط الجبدة: احس انه انقص علي! وشرب في نهاية العشاء كاسا من اللبن
إقرأ المزيد...
الأحد، 22 مايو 2011
معركة البعير
22/5/2011
ما يخالف هالمرة هم مسحوها بوجهي، لانه ربعنا النواب مصخوها، اكيد حسبالكم بتكلم عن الهوشة، لاطبعا بتكلم عن بعد الهوشة، الفضيحة الي صارت بعد الهوشة!
بدل ما النواب يعتذرون ويراضون الشعب لانهم داسوا ببطن الناس كملوا دوسهم! وانا اشهد ان النائبين السيد القلاف والمطوع اصدروا بيان واعتذروا مع انهم، هم من اعتدى عليهم، ولكن سمو اخلاقهم دفعهم لهذا الاعتذار! بس الكلام على بقية النواب!
النائب الصواغ دزوا له بعيرين، ما ادري ناقتين، وحطوهم عند الباب، وهو متسانس موزع صور البعارين على الصحف والمواقع الاخبارية والسي. ان. ان. والبي بي سي. ووصال! لانه خاض معركة عظيمة استخدم فيها كل ادواته الدستورية وهي عبارة عن عقال بدل ما يستخدم عقله، ويبين انه نائب يمثل الامة ومو مهاوشجي، لازم يطب مع ربعه!
والحربش، وقف وتكلم وعطانا من هالكلام الي مايوكل خبز، انه احنا لازم نشوف الاسباب، ما نشوف الي صار، ياعيني يعني عادي يصير طق، وعادي يصير قتل، مو مهم انه مات المهم نشوف الاسباب، ومو مهم فيه فساد واختلاسات الاهم الاسباب.. اذا كان فقير واختلس عادي لانه الاسباب دفعته الى السرقة!
والنائب وليد صار كوميدي ويضحك، وقال اخر شي انه ما شارك وهذا شرف لا ادعيه، الاخ متحسف لانه ما شارك بالمهزلة الي صارت!
الهوشة الكل مسؤول عنها، والكل غلطان، بس الي صار بعده من تصريحات تكشف انه القصة اكبر من هوشة، والي اكبر من الهوشة العراب الي بيخرب المجلس علشان الكرسي.
إقرأ المزيد...
الثلاثاء، 17 مايو 2011
أعداء المملكة العربية السعودية
17/5/2011
تبون اكثر من هالتناقض بعدما تلقون نوابنا وجماعة السنافر، داشين في مستنقع التناقض وطالعين منه، وكل شوي قالبين على بطنهم وظهرهم، وكأن الناس مو فاهمة ولا متابعة، جمبزتهم!
السالفة يا اهل الخير مو قصة البحرين وسورية خلونا من هالقصة والتناقض في مواقفهم، وهم خلونا من قصة تناقضهم القديم اللي مرة يقولون الا الدستور ومرة لازم نغير الدستور، هالمرة الفضيحة اكبر مع مقتل بن لادن!
جماعة السنافر، صار لهم شهور وهم يتكلمون عن الكونفدرالية، وعن دور المملكة العربية السعودية، وعن انجازات خادم الحرمين الملك عبدالله، وعن مساندتنا للشقيقة السعودية .. طبعا بعد كل هذه المقدمة، ومع مقتل بن لادن ما شفنا الا عبارات التبجيل والاحترام، واللي بيصلي صلاة الغائب على روحه، واللي يقول اجتهد واخطأ، واللي تبي تتزوج بن لادن وتنام معه في الكهف .. اي نعم هذولة نفسهم اللي كانوا يقولون السعودية والمملكة، والشقيقة الكبرى!.
وهم يدرون، ان اكثر واحد تضرر من بن لادن، من قتل الابرياء الى تشويه سمعة المملكة في الخارج الى اذية المسافرين في المطارات هي السعودية والشعب السعودي، وان اول حكومة صارت عميلة وأميركية مثل ما افتى بن لادن وربعه، كانت السعودية، وان اكثر شباب انقص عليهم كانوا السعوديين، يعني اكثر دولة خسرت شبابها واقتصادها وامنها وواجهت الارهابيين والمخربين، كانت المملكة العربية السعودية، والسبب بن لادن وليس غير بن لادن!.
وقبل شهر فقط افرجوا عن خمسة آلاف تائب، وقبل سنة حاولوا اغتيال الأمير نايف في عملية انتحارية، ومع ذلك جماعة التناقض السنفوري مستمرين في التغزل بانجازاته ومدحه، وتبين انه قصة الكونفدرالية والوحدة خيال مريض يحاولون فيها نشر فكرهم التكفيري، على حساب الانظمة في الخليج، هذا اللي قالوه وانكشف مستورهم!.
هذا للتذكير بس، لاني اعرف ان اخوان نورة يعرفون شلون يتعاملون مع هالأشكال!
إقرأ المزيد...
الاثنين، 9 مايو 2011
انت فين والصحة فين
9/5/2011
وانا اشوف حال الوزارة الخدماتية في الكويت بقيادة خريج القاهرة بالستينات واللي اكيد صار استشاري بالسبعينات بواسطة عبدالحليم حافظ ويمكن صار رئيس قسم بالثمانينات بواسطة عبدالكريم عبدالقادر وبالتسعينات صار عميد بواسطة عبدالله الرويشد وكمان صار وزير بواسطة شعبان عبدالرحيم.. وانا اشوف حال الوزارة تذكرت اغنية مصرية عتيجة تقول كلماتها.. «هلال العيد جاي متأخر.. على مهلو هوا بيتمخطر.. مش فاهم صايمين وجعانين.. يا هلال متئولي انت فين...اي والله انت فين يا هلال».. وعلى قولة ام كلثوم «انت فين والصحة فين».. يا عمي انت مال تنس ارضي اربعة وعشرين ساعة.. يا عمي انت مال بلاك فورست مع انجلش تي.. وبليل ستيك بنكهة العنب الابيض.. انت وين والوزارة وين.. لبناني قاص عليك ولاعب فيك لعب وانت ساكت عنه؟ الا بعد اذا فيروز لها علاقة بشهادتك هذا شي ثاني.. الوزارة بعهدك صارت مريضة وفيها اسهال مزمن بالتعديات المالية.. فسادها لو تصب عليه كل انواع الكورتيزون اللي بمخازن صبحان ما يطيب.. انا من شفت قفلك الابيض وانا قايل انك تفهم بكنتاكي اكثر من الطب.. بس شنسوي قلنا نصبر عليك يمكن ونشوف.. وشفنا تاليتها.. لا «البدون» تعالجوا.. ولا المقيمين استفادوا والمواطن مخه انشلع من تصريحاتك.. سنعمل.. سنسوي.. سنجلب.. سنبني.. وسين ورا سين والا انت ما تفهم الا بالجيرات والمكاين.. هذا غير بلاوي تصريحاتك.. تقول حق زوج المريضة ما يلقحها ثور.. وتقول حق نائب اطلع لي بره.. وتقول حق الصحافة انك مليونير ومو محتاج المنصب..وآخرتها النائب طلع لك بره وانت ما طلعت له.. وسالفة انك مليونير واضحة من الفريق والمناقصات التنفيعية.. وشلختنا بأن استقالتك بجيبك.. والحين راجع الوزارة بتخربها زود؟ شي غريب ومو غريب شي عجيب ومو عجيب.. يعني الشعب الكويتي شيتوقع من واحد سيدة الغناء رزته؟ وللحديث بقية.
كلمة راس
أهدي أهل الكويت المرضى اغنية أم كلثوم بتصرف بسيط اللي تقول كلماتها.. اهل الهوى يا ليل فاتوا مضاجعهم.. وتجمعوا يا ليل صدفة وانا معهم.. فيهم عليل الحب وفيهم مريض القلب..و(...) ولا همو.. لو كلهم اتغمو... وعجبي.
Boshi55a@hotmail.com
Boshi5aa.blogspot.com
إقرأ المزيد...
الأحد، 8 مايو 2011
أسيل .. فارسة الصحراء
8/5/2011
النائبة أسيل، فارسة الصحراء، وعابرة البحار والمحيطات والدكتورة الجامعية مربية الاجيال، دزت قبل ايام تويتر، قالت انها ومجموعة من النساء كانوا في ضيافة ملكة استراليا وتكلموا معاها في وضع المرأة الكويتية! اي والله صج مثل ما قلت، والتويتر شاهد!
بيني وبينكم انا حسدت نائبتنا على ثقافتها السياسية، قاعدة عشر ساعات وهي تتكلم عن دور المرأة وتطورها السياسي في الكويت وهي ما تعرف ان استراليا ما فيها ملكة، انما حاكمة، وملكتهم هي ملكة انجلترا، العزيزة، اليزابيث، وهذه معلومة يعرفها حتى سيف الاسلام القذافي.!
واكيد وهي تسولف مع الحاكمة، كانت تقول لها ياسعادة الملكة، وياسيادة الملكة، والمرأة المسكينة منحرجة وساكتة تخاف تحرج نائبتنا الحاصلة على عقال النشامى من الدرجة الاولى، وبهذه المناسبة السعيدة، مناسبة جلوسها مع وحدة حسبالها ملكة استراليا، ما يخالف نساعدها بشوية معلومات سياسية، فيا نائبتنا لمعلوماتك:
امريكا عندهم رئيس جمهورية، ولونه اسمر، اخاف تلخبطين وحسبالج اوباما ملك بوتسوانا!
فرنسا عندهم رئيس جمهورية اسمه ساركوزي، وما يحكمهم الملك لويس السادس عشر، الملكية انتهت قبل اكثر من ميتين سنة في فرنسا!
رونالدينيو لاعب كرة قدم في ريال مدريد، مو ملك اسبانيا!
زين العابدين مو خياط باكستاني هذا رئيس جمهورية تونس المخلوع، ولمعلوماتك تونس صارت فيها ثورة، وبن علي هرب!
كاسترو زعيم كوبا، والكستر عبارة عن اكلة!
هذي شوية معلومات واذا تبين اكثر انا حاضر، في خدمة الحياة البرلمانية، وخدمة ملكة انجلترا!
Boshi55a@hotmail.com
Boshi5aa.blogspot.com
إقرأ المزيد...
الثلاثاء، 3 مايو 2011
طلبتنا في البحرين طردوهم
3/5/2011
الآن مسؤولية الحكومة الكويتية وبالذات مسؤولية وزارة الخارجية ووزارة التربية.. فاكثر من 320 طالب كويتي يمنعونهم من دخول البحرين، مع انهم ودوا معاهم اوراقهم وجداولهم وهوياتهم وحتى كرت التموين..
البحرين تمنعهم كيفهم، ديرتهم وسيادتهم، واهمه احرار يدخلون الي يبونه ديرتهم، اهمه يمارسون سياستهم هم كيفهم ديرتهم، ومو وقته نناقش صح ولا غلط.
احنا نبي نتكلم عن ديرتنا، عن حكومتنا وعن وزارتنا ووزراءنا، وسفاراتنا وسفراءنا، الي ما نعرف شنو شغلتهم بالضبط.
الطلبة يتصلون من الحدود على السفارة الكويتية في البحرين، ويدورون على السفير الكويتي.. ماكو أحد يرد، ولا احد سائل فيهم! مو هالشباب كويتيين وعيال الديرة، والسفارة مسؤولة عن أي مواطن حتى لو كان مجرم، في اي بلد، وهذا الي تسويه السفارات المعتبرة المحترمة في العالم.. سفيرنا ولا سأل عنهم، وكله خطه مغلق، ودايما عنده اجتماع، ولا كانه في طلبة ووراهم تخرج ودافعين مستحقاتهم، ومضحين بوقتهم.
ووزارة التربية نفس الحالة، طيب احصروا الطلبة، شوفوا الطلبة والطالبات الي تبهدلوا على الحدود، بسبب مالهم شغل فيه، وقضايا سياسية هم بعيدين عنها..
مو المفروض يعوضونهم «الكورس» أو السنة الي طافت عليهم، ولو مؤقتا على الاقل، حتى تتعدل الاوضاع هناك، من خلال اي كلية او جامعة بالكويت؟ مع ذلك ماكو حتى تصريح يبرد القلب ما في.. لا وزارة الخارجية تتكلم ولا وزارة التربية فتحت حلجها، ومطنشين، ومسويين روحهم ما يدرون، ما اقول الا من حقهم البحرين يسوون كل شي بطلبتنا، ما دام مسؤولينا مسترخصينهم.
Boshi55a@hotmail.com
Boshi5aa.blogspot.com
إقرأ المزيد...
الأحد، 1 مايو 2011
عرس أم شيخة
1/5/2011
يوم الجمعة شفنا العرس الملكي الانجليزي في التلفزيونات، ومن الصبح، انا وام شيخة قاعدين وريوقنا جدامنا، وام شيخة استلمتني تعليقات، خربت مزاجي، وبهدلتني بالاسئلة والتعليقات! اقول بوشيخة ليش الملكة لابسة اصفر..؟ ما ادري يمكن تشجع نادي القادسية، أو تحب الخريط! اقول بوشيخة ليش راكبين العربة..؟ ما ادري يمكن البنزين غالي في بريطانيا! أقول بوشيخة ليش الحريم لابسات كبابيس..؟ ما ادري يمكن عادات وتقاليد نفس الملفع عندنا! اقول بوشيخة وين حاطين البوفيه..؟ ما ادري ورا الكنيسة بالحوش، ويمكن يعطونهم كراتين الاكل بالطلعة!
اقول بوشيخة كانه ام العروسة هيليقة..؟ ما ادري يمكن، لانه مو من بنات الحمايل، هنا قبيلة الملكة اكشخ شي، وهذه شكلها اول مرة داشة القصر!
اقول بوشيخة، عرسهم ما في دي جي..؟ ما اداري قالوا للقصار تعال بس اعتذر، كانت عنده ثلاث حفلات وما لحق!
اقول بوشيخة ليش عرسهم الصبح..؟ ما ادري يمكن لان الانجليز ينامون مبكر، او ما عندهم كهربا!
اقول بوشيخة شقاعد يغنون بالكنيسة..؟ ما ادري يغنون «هب السعد» ومباركين عرس الاثنين بس بالانجليزي!
اقول بوشيخة ليش خاتمها رخيص..؟ ما ادري يمكن يبون يوفرون علشان السفرة!
ليش وين شهر عسلهم؟ وين بعد، رايحين ماليزيا، بالاقساط!
اقول بوشيخة كانه زوجته مو حلوة..؟ ما ادري وايد جيكرة بغيت اقولها اختها احلى بس سويت روحي ما اعرف!
لو بقعد اقولكم باجي الاسئلة ما راح اخلص، بس نصيحة العرس الجاي، كل واحد يشوف العرس بروحه!
Boshi55a@hotmail.com
Boshi5aa.blogspot.com
إقرأ المزيد...