نائب بخمسين ألف وجه

3/6/2010
ما احب اتبلى على احد، ولا اقول شي ما صار، ما سمعتوا ولا تبين لكم في يوم من الايام ان بوشيخة نصاب وكذاب وكلكجي، ولمن اقول ان بعض نوابنا عندهم خمسين الف وجه انا صادق في كلامي، الحين راقبوا النواب عدل، طبعا لا تراقبون شنو يقولون، وتصفقون، لا اقرأوا بين السطور، وبعدين شوفوا شنو يسوون!
تدرون ليش؟ لانه هالايام راح تبلش الخصخصة وقوانين الخصخصة، وطبعا راح تشوفون بام عيونكم وبدون ما اقول اني اكثر واحد يسب الخصخصة، «ولن ابيع بلدي، ولن افرط بوطني، والخصخصة لن تمر الا على جسدي، وهذي بوق وحرمنة..» راح تشوفوه من «فجر الله» اول واحد في طابور الخصخصة ويبي يستفيد من الخصخصة.. طبعا اذا سالته ليش انت رايح مخصخص حالك وانت ضد الخصخصة؟ راح يجاوبك بعد تفكير، وبعد ان تنزل الدموع من عيونه، وبعد ان تنزل الدماء من لثته، وبعد فاصل من الصراخ على قدر الالم، وبعد ان يعدل غترته ثلاث مرات.. يقول: شوف انا شاركت في الخصخصة وساهمت، وبصير عضو مجلس ادارة، علشان اراقب الخصخصة من الداخل، وعلشان اضمن ما يصير سرقة لاموال الشعب، وعلشان اصيد اللي يسرقون المال العام، وعلشان ادافع عن مصالح الشعب.. وبعدين نحط اغنية وطنية ونرقص!
نوابنا المعارضين راح تشوفونهم اول ناس ركضة للخصخصة، حتى لو بيخصخصون خياط باكستاني، مو بعد وزارات، بعض النواب قول فعل، بس الفعل عكس القول، الكلام سهل، وبلاش، ورخيص، ومافي احد يحاسب على الكلام في هالبلد.. نوابنا يتكلمون ويسولفون عن كل شي.. يسمعون الناس اللي يحبونه، ويسوون اللي يبونه!