ليش تأخر تشكيل الحكومة؟
21/4/2011
ليش تأخر تشكيل الحكومة..؟ شلون شكل الوزارة القادمة..؟ منو من الوزراء باقي ومنو منهم راحل..؟ جم شيخ بالوزارة وجم مواطن سوبر وشكثر عدد الوزراء النواب..؟ اسئلة يرددها كل كويتي بينه وبين نفسه او بالدواوين ونفس الاسئلة بالتويتر والفيس بوك والجرايد والبرامج التلفزيونية.. ونفس الاسئلة تعقد لها ندوات واجتماعات وتكتل الكتل وكتلة الدستور والحريم يسولفون فيها! طبعا هذي الاسئلة الكل في الكويت يسولف فيها من باب ان الكويتي ملم بالامور السياسية ويعرف كل شي بالسياسة وعنده طموح يصير وزير علشان يفيد ربعه وجماعته... كل هذا امر مشروع وحق مطلق ولا احد ينازعهم فيه.. لكن... وألف لكن... هل بعض المواطنين الكويتيين اللي قاعدين يتعاطون بهالامور قايمين بدورهم من موقعهم كمدرسين أو موظفين او مواطنين؟ للاسف وبكل ألم اقولها.. لأ... لأ... لأ... ترى مصيبتنا في الكويت واللي مأخرنا ومخلي عندنا فساد اداري ومالي اهم اسبابه عدم التزام بعض المواطنين الكويتيين بعملهم. يتكلمون بالسياسة ويبون يوجهون الحكومة ورئيسها واهم موظفين صار لهم ست سنين ما يداومون.. ويبون يعلمون الوزراء شلون يقومون بعملهم واهم تلاقيهم مدرسين مو منتظمين بالحصص وكل يوم ماخذين تفرغ رياضي مع انهم ما يعرفون يلعبون مقصي... ونفس هالمجموعة من المواطنين اللي مو عاجبهم شي بالحكومة وينتقدون تلاقيهم اول الناس بالمظاهرات والاعتصامات والندوات... علتنا باطنية.. تبتدي بالناخب اللي يحدد خياراته وفق طائفية بغيضة او قبلية مقيتة او فئوية او حزبية تلوع الجبد.. فاذا كانت هذي القاعدة فشلون بتكون النخبة اللي اهم النواب والناشطين والكتاب؟ كله كوووم وبعض الحريم الكويتيين كوووم... ما تطبخ وتطالب بتخصيص وقت للبيت وما تعرف ترد على عيالها وتبي وزارة التربية تربيهم.. وتصوت بالانتخابات حسب راي زوجها واذا قعدت بحفلات جاي الضحى تسولف عن حقوقها؟ بعضنا ما يدري شيبي وتقوده الأقلية وبعضنا شعب البلاك بيري عند الاشارات والاي فون في قاعات الانتظار والآي باد في البيوت.. وكل هالتكنولوجيا مسخرينها حق الضحك والطنازة والتنظير فقط .. ولاني جزء من هذا الشعب ودي اعرف ليش لي الحين ما تشكلت الحكومة ومنو بيكون وزير الإعلام؟
Boshi55a@hotmail.com
Boshi5aa.blogspot.com
إقرأ المزيد...
الخميس، 21 أبريل 2011
الثلاثاء، 19 أبريل 2011
ملح صفر ومصاختهم
19/4/2011
اكتشفنا ان المشكلة مو في اللحوم الفاسدة، المشكلة بالنفوس الفاسدة، بالنفوس الي فايحة ريحتها، بالنفوس الي تضطر تصك خشمك، لمن تسمع تصريحهم ولمن تشوف صورهم، من زود الريحة!
قبل العيد صارت فضيحة،تجار فاسدين وقلوب مريضة تتاجر بأرواح الناس ولان الوزير فاضل صفر ريال، من ظهر ريال، وقف وقفة سباع جدام خرفان فاسدة، لا خاف ولا تراجع، ولا قال هذا ولد فلان وولد علان.. سكر محلاتهم بالشمع الاحمر، وطفى لمباتهم، وكسر صحنهم، غرمهم، وحولهم على النيابة، والمسؤولين المتآمرين معاهم، حولهم واحد واحد على النيابة، لان ارواح الناس مو لعبة!
هذا الي سواه الوزير وكان واضح وصريح، لا واسطة ولا فلان ولدنا،ولا قصة اخر مرة وما يعيدها، ولانه سوى جذي قاموا بعض العصاعص بدل ما يشدون على ايد الوزير يبون يحاسبونه، لانه طبق القانون! وهذي ما تصير في اي ديرة بالعالم الا عندنا.. حاسبوه وقالوا له شلون تحولهم النيابة.. يقول لهم ارواح عيالكم بخطر، ما كو فايدة، وبعضهم يبون يستجوبونه!
انا اقترح على الوزير فاضل صفر، علشان يريح بعض النواب، بانه يقط بشته ويلبس وزار، ويروح المسلخ، معاه سكينة وساطور، وهو شخصيا يوقف ويقص روس الخرفان ويوزعها على الشركات وبعد الظهر يفتر على القصابين ويشوف ويتأكد انهم نفس الخرفان اللي ذبحهم، وبعدين يمر على البيوت بيت بيت، ويتأكد من الطبخ وكمية الملح في الاكل.. حتى يرتاح النواب ويطقون له سلام.. ادري قبل لا تقولون، هم ما ينفع، لانه راح يقولون له ان الاكل مالح.. وراح يستجوبونه استجواب ماصخ لان الملح زايد!
Boshi55a@hotmail.com
Boshi5aa.blogspot.com
إقرأ المزيد...
الخميس، 14 أبريل 2011
ما نبي وزير مثل تامر حسني
14/4/2011
سمو رئيس مجلس الوزراء، نصيحة من مواطن، ومثلك لا يحتاج نصيحة...
نبي وزراء يوقفون مع الحكومة في أزماتها، مو يوقفون مع معارضين الحكومة، لانه ما في حكومة في العالم وزراءها يوقفون مع المعارضة، ويدافعون عنها، بدل ما يوقفون مع الحكومة!
نبي وزراء يهاجمون ويدافعون، يعني نبي وزير كولجي دفاع هجوم، مو وزير مع اول استجواب وتصريح ضده يرفع ايده، ويوقع خمسين الف معاملة بس علشان محد يكلمه! نبي وزير يترس الكرسي، مو بالعكس، لازق بالكرسي، وخايف على كرسيه، وتصير عنده علاقة حب بالكرسي، ويخون الكل بس علشان الكرسي!
نبي وزراء ينصحون، عندهم راي واضح، عندهم كلمة، فاهمين اللي قاعد يصير مو وزراء دايخين، ما يدرون وين الله قاطهم، معاهم معاهم، عليهم عليهم.. نبي وزير يقرأ الاحداث، يعرف راسه من ريله، يعني مقطع ذيل السمكة، مو وزير منتفين ريشه وقاعد! نبي وزير يشتغل، يكرف، يداوم قبل الكل ويطلع بعد الكل، مو وزير كاشخ ومسوي السبعة، ولابس البشت، ويصور ويوزع صوره على الجرايد يقولك تامر حسني، لا يبه نبي وزير يشتغل ما نبي وزير يصور وبس!
نبي وزير ما يكذب، يكون صادق مع نفسه وصادق مع الناس، يقول لنا شنو فيه وشنو ما فيه، مو مثل المدمغين نتابع الاخبار وهو كل شوي يطلع ويقول لنا الامور بخير، ولا تحاتون ولا تخافون وكله تمام، وفي النهاية نكتشف ماكو شي تمام، وكله كلام فاضي! ما نطولها سمو الرئيس، نبي وزراء يوقفون معاك مو معاهم، يشيلونك مو تشيلهم، يدافعون عنك مو تدافع عنهم، وزراء تأمن على ظهرك اذا مشيت جدامهم... وسلامتك طال عمرك!
Boshi55a@hotmail.com
Boshi5aa.blogspot.com
إقرأ المزيد...
الأربعاء، 13 أبريل 2011
صفر في كل مكان
13/4/2011
بعد أن شربت شاي حليب مع شوية بخصم، وفرفرت على القنوات والناس تتظاهر في كل مكان، دخت وحطيت راسي ونمت، وحلمت ان كل الوزراء صايرين فاضل صفر، وكلهم يشبهونه!
وحلمت واللهم اجعله خير، انهم كلهم مثل فاضل صفر رافعين «جمومهم» ومجابلين وزاراتهم، ويبون يقضون على الفساد ويحاربونه، مثل ما حارب صفر الاغذية الفاسدة، والفساد في البلدية والاشغال!
طبعا بهذه الطريقة وزير الاعلام، راح يقضي على البرامج الفاسدة في تلفزيونه واذاعته، ويقضي على السرقات باسم المكافآت في وزارته، ويقضي على الاسماء الوهمية اللي تأخذ مكافآت البرامج، ويقضي على المحسوبية في الوزارة وكل واحد وربعه وشلته، ويقضي بعد على مجاملة فضائيات وصحف على حساب فضائيات وصحف ثانية، يعني يوميا راح نسمع عن مصادرة اطنان من البرامج والقرارات الفاسدة في الوزارة!
وفي الكهربا هم حلمت بالوزير وهو يكشف فساد الصفقات، والتوربينات الفاسدة، اللي بس تشتغل تحترق، ويصادر الاف الاطنان من المحولات الفاسدة والتلفانة، ويطلع الاف القطع التقليد والفاسدة واللي تنباع علينا على اساس انها اصلية، ويكشف الاف الاختلاسات والتجاوزات في الوزارة وينور الديرة، ويبين حجم اطنان الفلولتان الفاسدة فيها!
ولو يدش المواصلات هناك بعد العملية سايبة، محد يدري من فين يودي على فين على رأي عادل امام، كله فساد في الخطوط وفي المقسمات واخذ فساد في كل قسم وادارة ومكافآت توزع على الربع، والناس الشغالة تاكل هوا وخصومات!
انا متأكد لو يسوون فوتوكوبي للوزير ويوزعونه على الوزارات راح نشوف يوميا الاف الاطنان من الفساد..!
قمت من النوم وقلت اللهم خير، الموضوع يا جماعة مو تلميع للوزير فاضل صفر لانه ما يحتاج مدح ولا تلميع، فالوزير شغله يشهد له، انا اقول انه نبي وزراء بنفس الطريقة يشتغلون وينظفون البلد.. ممكن ولا صعبة؟!
Boshi55a@hotmail.com
Boshi5aa.blogspot.com
إقرأ المزيد...
الثلاثاء، 12 أبريل 2011
قال احلبوه
12/4/2011
قالوا له تيس قال احلبوه، قالوا له ثور قال احلبوه، قالوا له بعير قال احلبوه، قالوا له قطار قالوا احلبوه، قالوا له اعتذرنا هم قال احلبوه، الاخ ماسك في كلمة الاعتذار، وان رئيس الوزراء اعتذر للسفارة على قصة شبكة التجسس الايرانية، ومع كل نفي الحكومة، النائب مصرّ على ان الحكومة اعتذرت!
شفنا كتير ورحنا كتير بس هيك ما شفنا، ما يخالف قلبت لبناني بس من زود القهر، يعني معقولة الوزير الروضان يقول ما اعتذرنا ولا صار اعتذار، ولا أدل وين السفارة الايرانية، والنائب يقوله لا انت اعتذرت!
الروضان يقول له، يا الحبيب والله العظيم وراس امي وابوي وراس عمتي وخالتي... انا اصلا ما رحت السفارة، الاخ هم مصرّ، لا انت اعتذرت بالنيابة عن الحكومة!
طيب الاعتذار يفترض من وزير الخارجية، هو اللي يروح ويعتذر، مع انه ماكو شي يعتذر له، شبكة تجسس وتحقيق معاهم، ماكو سبب يدعو الرئيس والحكومة تعتذر لاحد، والاخ مصرّ انه الحكومة اعتذرت!
طيب شنو دليلك؟ ماكو دليل، يقول انه قرأ ان محامي الدفاع سامع ان رئيس الحكومة والمجلس اعتذروا، «بيييييييه» شنو هالدليل، سامع من واحد قايل، والمحكمة ردت كلامه، وهو ماسك في تصريح محامي الدفاع!
المشكلة ببساطة ان الحكومة تقول انه ما اعتذرنا لا للسفارة الايرانية ولا السفارة الفيتنامية، وما في دليل على الاعتذار، والنائب يقول شنو دليلكم انكم ما اعتذرتوا؟ قصدي يفترض ان النائب يطلع دليل مادي، ورقة، مراسلة، كتاب خطي، فيلم فيديو تسجيل صوتي... مو يقول انا سمعت!
يعني معقولة الحكومة رايحة السفارة، وطاقين الباب، وقايلين للسفير الايراني «اغا احنا اسفين يالحبيب سفطنا السيارة ورا سيارتك» ويرد عليهم السفير «لا عادي يالحبيب ما صار شي» يا جماعة حدثوا العاقل بما يعقل، ما في حكومة بالعالم تروح لسفارة اي بلد وتعتذر!
احنا نحب النائب ونعزه بس قصة الاعتذار، وسامع وقالوا له وما ادري منو، وما ادري شنو، كلش مو ظابطة معاه!..
• كلمة راس
هالأيام بابا سنفور شاد حيله على الجريدة.. الناس مو عارفة شنو السبب، لأنه قاعد يروج كعادته باسم الدين والاسلام والمحافظة على الوحدة الخليجية والشعارات الضخمة.. ترى السالفة بسيطة، بابا سنفور عرف ان الجريدة قدرت تكشف علاقته بقناة الخصال العفنة اللي مثله واللي راح نسولفلكم عنها الايام الياية، وبالتفاصيل الكاملة، وبعدين هم فرصة يراضي معازيبه، وياخذ جم دينار مو حقه يا جماعة، حق المبرة اللي قاعد يغسل فيها الاموال ويغسل فيها الرشاوي سواء كاش او شيكات.. بابا سنفور ترى كلش مو لايق عليك الشرف والامانة.
Boshi55a@hotmail.com
Boshi5aa.blogspot.com
إقرأ المزيد...
الاثنين، 11 أبريل 2011
حكومة.. قوية !
11/4/2011
دايما وقبل كل تشكيل للحكومة تسمع من النواب والناشطين والكتاب وراعي الخباز وراعي البرد وعيال الفريج والاكاديميين واللي له شغل واللي ماله شغل يقول ويطلب ويتمنى ان تكون الحكومة قوية! هل الكويت داشة هوشة مثلا..؟ هل المطلوب وزراء مشتركين بنادي صحي وما عندهم كروش؟ واذا المقصود قوية بالشخصية... هل عمركم شفتوا وزير كويتي لسانه قصير..؟ أو هل اختيار الوزراء راح يتم من خارج البيئة الكويتية المعروفة بقوة الشخصية وحدة الطرح؟ شي غريب عجيب الكل يدلي بدلوه بالوزراء وطريقة اختيارهم.. شي يبيهم تكنوقراط .. وشي يبيهم فلافل وبطاط... وشي يطالب بتوزير ولد عمته وواحد عجيب.. الكل يسولف عن التوزير ونص اللي يسولفون ما يداومون.. والنص الثاني فاشلين دراسيا.. والنواب البعض منهم مستعد يبيع امه وابوه علشان الكرسي، ومع هذا يبون يفهمون سمو الرئيس شلون يختار وزراءه مع انه يتمتع بخبرة تشكيل حكومات محد يتمتع فيها بالديرة.. وهني تكمن العلة.. اي نعم العلة الكبيرة اللي نعاني منها بالكويت.. المعضلة والمشكلة ان كل الكويتيين حتى اللي متجنس قبل اسبوعين يعتقد انه الاقدر على ادارة الامور في الكويت والطاسة ضايعة.. ولا اكبر دليل على كلامي من تصريحات النواب بالذرة والنووي والمعاقين والمسنين والبطاط والجنس والسياسة الخارجية وخطط الحروب.. الخ الخ الخ ليييييييي جزيرة كنكون.. علشان جذيه زين سوا سمو الرئيس لما عطاهم طاف وقاعد يشكل الحكومة بطريقته واسلوبه الراقي.. ولا اعتقد ان اي حكومة قادمة راح تنال اعجاب جماعة العقارب ومروجي الفتنة ومن لف لفهم... خصوصا الكاتب اللي هاليومين متخصص بالبحرين ومسوي روحه بلية ويفهم اكثر من علي البغلي بحقوق الانسان.
Boshi55a@hotmail.com
Boshi5aa.blogspot.com
إقرأ المزيد...
الأربعاء، 6 أبريل 2011
فتوات
6/4/2011
مسؤولين إحدى الوزارات صايرين أبطال وفتوات، نافشين ريشهم ومطلعين عضلاتهم، على منو.. على مواقع الانترنت المحترمة، بلشوا منعوا الخدمات الاخبارية الوطنية المستقلة والحرة، علشان منو؟ علشان يسكتون بعض هالنواب اللي لسانهم طويل وحيلهم قاصر! ليش، لان الوزارة اردى من الدياية، وابوي ما يقدر الا على أمي، ويخافون من صوت الصراصير، وطبعا مبررهم جاهز، سكرناهم حفظا للوحدة الوطنية!
مع انه قلنا وبح صوتنا انه لازم تصير رقابة على المدونات والمواقع، لانها تحرض على الفتنة، بس الظاهر صار العكس، المدونة التي تحذر من الفتنة، وتدعو للوحدة، هي اللي تتسكر بفضل توجيهات الوزارة العظيمة!!.
نحط لكم مثال واحد بس، موقع الشبكة الوثنية، مروا على الشبكة، وتقرون فيها كل شي، تقرون فيها مصطلحات مجوس وروافض وصفويين وتحريض طائفي واضح ومباشر، تقرون فيها هذا أصيل وهذا بيسري، هذا ولد فلان وهذا ولد علان، وتقرون فيها هذا مطيري وهذا عجمي، وهذا عازمي وهذا شمالي وهذا جنوبي، وتقرون فيها هذا ابن «....» وانت ياولد «.....» نعتذر لعدم النشر حتى ما نخدش حياءكم، والامور عادية ولا كأنه صاير شي، يعني الشبكة مفتوحة على البحري، ولا احد يحاسب ولا احد يقول ليش، ولا كأنه في وزارة اعلام تراقب وتشوف!
الوزارة كعادتها دايخة، ومضيعة الطريج، وتستسبع على المحترمين.. صايرين مثل المدرس اللي الطلبة في آخر الصف يشاغبون، وهو يطلع حرته بالولد المؤدب، اللي قاعد في اول الصف!
كتبنا هالشي للتذكير فقط، الصحافة الحرة والاعلام الحر، ما تهمه لا وزارة اعلام ولا مسؤولين دايخين، وما تخوفه هالحركات، والشرهة مو على الوزارة انما على النواب والكتاب اللي ذابحين روحهم وطنية وحريات، وما بطلوا حلوجهم على هذا القمع الفكري والاعلامي، وما يدرون انه جس نبض لبقية المواقع، وبهالطريقة راح يجيهم الدور، وأذكركم!
Boshi55a@hotmail.com
Boshi5aa.blogspot.com
إقرأ المزيد...