فرقة التنموي
30/3/2011
غريب عجيب أمر بعض نوابنا.. لهم بكل قضية تصريح وبكل سالفة تلميح وبكل حدث رأي يختلف رغم تشابه القضايا.. هذا دليل ان بعض النواب مليونين بالأمية مدعومين.. ولا اسهل من شراء واحد عارض نفسه للبيع ويفتر من سفينة لي سفينة ومن جت سكي ورا دفته وحدة لابسة مايوه بالمكسيك.. مثل هذا النائب لا تستغرب منه ولا تتعجب من افعاله.. كان منتف وشاف النعمة على كبر.. ويدعي انه من سادة قريش وهو ما يتعدا بالاصل والفصل نيكاراغوا.. ولأن هذا النائب واللي وراه .. محتاجين لعدد من النواب.. قام وأسس له فرقة واطلق عليها فرقة التنموي.. فرقة زار تقدر تسميها.. فرقة دق ورقص هم تقدر تسميها.. تلاقيهم بكل حفلة يهزون سواء حفلة سياسية او اسلامية او اقتصادية.. ومتخصصين بحفلات الفتنة.. ما عليك الا تتصل باللي يدعمهم وتقول له طق طبلك.. وراح تلاقي فرقة التنموي ترقص وتهز لي الصبح.. الخطورة ما تهمهم لأنهم متعودين يهزون بكل المواقع.. ديتهم بسيطه.. شوية بيزات وجم مشروع وارض والسلام... لا وعندهم مبرات.. وفوق كل هذا متخصصين بالجذب.. ووصل لي ونما الى علمي ان لهم اسماء حركية في الانترنت في بعض المواقع.. علشان محد يقدر يرصدهم.. واحد عاشق خيطان.. وجمجوم يحب العدس.. والقبقب يحب الفتنة... وابو الهول مضيع مشيته.. هذولا نوابنا للأسف.. وهذي عقول «عظيمة» للتشريع وعلشان هيك تلاقونهم يوجهون سهام فتنتهم على الشرفاء علشان محد يسألهم عن بلاويهم اللي راح اكشفها لكم قريبا..
Boshi55a@hotmail.com
Boshi5aa.blogspot.com
إقرأ المزيد...
الأربعاء، 30 مارس 2011
الثلاثاء، 29 مارس 2011
مذيع البحرين طلع مذيعة !
29/3/2011
والله وصرنا مطقاقة للي يسوى واللي ما يسوى، والسبب وزيرنا الاعلامي الطائر، وبقية الجوقة الدايخة في الوزارة، والله وصرنا طوفة هبيطة حتى يطلع «مذيع» ويقولون اهل البحرين عنه انه «مذيعة» ومتنكر بالدشداشة والغترة، ويتكلم عن الكويت واهل الكويت.
يا جماعة عيب اللي صار الجمعة اللي طافت، الغبار من صوب، وبرنامج في تلفزيون البحرين الرسمي من صوب ثاني، مو كافي البعض يشتم بأهل الديرة في ندواته، راح نقلها على باجي القنوات، يظن انها بطولة، وهو ما يدري انه الرجال توقف وتواجه راس براس! مو تنخش ورا بشوت الرجال وتسب وتشتم، بس شنو نقول للي يخاف يجابه، وللي يدز صبيانه يشتمون ويسبون؟
انا شفت البرنامج واستحيت، وسألت نفسي، يا جماعة معقولة كويتي من لحمي ودمي يطلع بتلفزيون ثاني، ويسب اهل ديرته؟ بس لانه مخالفينه الراي، يخون اهل ديرته اللي عايشين معاه، ماكلين معاه، وفي نفس الدوام، وفي نفس الوقت يطلع ويسبهم في قنوات اجنبية؟
انا ما اعتب ولا ارد على اللي طلع وتكلم، ما اقول الا الله يشفيه، لانه يحتاج الى علاج نفسي، حتى يشوف الناس متساويين، مثل ما علمنا الاسلام، ومثل ما قال القرآن، انه جعلنا شعوبا وقبائل لنتعارف، شعوب وقبائل، فما بالكم بشعب واحد ودين واحد؟
يا أهل الديرة اللي صار عيب، لانه الناس هناك في البحرين عندهم مشاكلهم وحكومتهم متورطة مع الناس، فمن الغباء انه نصير حطب لهم، ولمشاكلهم، ولمصايبهم، واذا كان اعلامهم وقح فما يجوز اهل الديرة ينجرون وراهم، واذا كان اعلامهم فيه انحطاط فما يجوز بعض اهل الديرة يزايدون على انحطاطهم، وسامحوني لاني ما شفت قبل كويتي يسب كويتي بهالطريقة.
Boshi55a@hotmail.com
Boshi5aa.blogspot.com
إقرأ المزيد...
الاثنين، 28 مارس 2011
الكويت تنضم للعراق ؟!
28/3/2011
لو طلع واحد، أياً كان هذا الواحد، نائب برلمان، او نائب بلدي، او كاتب، او موظف او مواطن عاطل عن العمل.. وقال ياجماعة احنا ما نبي الكويت ولا نبي الحكومة، ولا نبي الجيش، ولا نبي وزير خارجية، ولا سفراء ولا وسفارات.. نبي نسوي وحدة كونفدرالية مع العراق شقيقتنا الكبرى، شنو تتوقعون يصير؟
طبعا انا كوني مواطن محترم وزوجتي متواطنة محترمة واولادي وبناتي محترمين ومحترمات كل واحد فينا يطلع نعاله، أو جوتيه إذا ما عنده نعال، ونطيح طق فيه، كنوع من الحوار الديمقراطي مع هذا المخلوق..
ولا معقولة ياقليل الحيا، بها البساطة تبي تضم الكويت للعراق، معقولة تبي تلغي كل السفارات اللي عندنا في الخارج، وترفع عليها علم مو علم بلدنا، شلون لسانك طاوعك تغلط على الديرة وتتمنى تمحيها من الوجود؟
ولا معقولة تبي تلغي عاصمتنا الكويت بشوارعها وعماراتها وناسها وبيوتها ودواوينها وبحرها الازرق وتمسح اسمها من الخريطة، وهي أساس وأصل وفصل الكويت؟
ولا معقولة تبي الديرة تصير بدون جيش يدافع عن بلده، ولا عسكر نفتخر فيهم، ولا وزير دفاع، ولا حدود ولا سيادة؟
معقولة يابايع الضمير ترضى مجلس أمتنا وحكومتنا يتحولون الى مجلس استشاري روح روح تعال تعال؟
ومعقولة ياللي تخش أصلك وفصلك تقلقس وتنافق غير أهل بلدك، لأنه الناس فاهمة وعارفة واللي تقلقس تحتهم ما تسوى عندهم بيزة، لأنه اللي ما في خير لديرته وأهله ما في خير لغيره، ويتبع غيره، هذا اللي بقوله لو أي واحد اقترح ان الكويت تنضم.. للعراق!!
Boshi55a@hotmail.com
Boshi5aa.blogspot.com
إقرأ المزيد...
الأحد، 27 مارس 2011
الغبار الحلو
27/3/2011
شكرا يا الغبار، وايد شكرا يالتراب الي ترس الديرة، شوارعها تراب، سياراتها تراب، طوفها تراب، وولدي رجع من الملعب وقت الغبار، قلت له من انت؟ قال لي: يا ابي انا ولدك، وبعدين طلع لي البطاقة المدنية، وصورة الجواز، والجنسية، واربع صور خلفية زرقة... وتأكدت انه ولدي حبيبي ولدي الغالي!
اقول شكرا لان الغبار ما فرق بين سني وشيعي، وبدوي وحضري، الكل دز مسجات يحذر من الغبار، ماكو احد دز وقال «يالشيعة حطوا بالكم في غبار»، ولا واحد دز وقال: «يا البدوي يا اهل القبيلة في غبار بالطريج»، الديرة كلها صارت وحدة، ووزارة الداخلية نايمة بالعسل، ولا على البال، واذاعة الكويت الاغاني شغالة، بعد ما وصل الغبار، وضاعوا الناس في الشوارع، طلع لنا بيان وزارة الداخلية تحذر من الغبار، يا سلام يعني شرفت الوزارة يا باشا، معقولة كل هالاجهزة، والمراقبة، ما عرفتوا تقولون للناس انه في غبار بالطريج! وحطوا بالكم، شالفايدة، تقولون للسواق حطوا بالك وهم في الغبار ومايشوفون جدامهم، انا خابر الناس تحذر قبل مو بعد!
واذاعة الكويت طبعا نفس الشي ولا كانهم في الديرة، حاطين اغاني ووناسة وسوالف، ورايحين ويايين، ولا كأنه بيصير شي، يعني اكيد المذيع وصل له مسج في غبار، ما عرف يقول يا جماعة يقولون في غبار، هذا غبار مو بعد زلزال وتسونامي!..
بس هم اقول مو مهم، المهم تعلمنا بشوية غبار شلون نكون على قلب واحد، ونحس ببعض، ونتألم مع بعض، ونخاف على ديرتنا وأهلها، وعسى الغبار دوم وكل يوم اذا كان بيخلي اهل الديرة قلبهم عالديرة، والله يبعد عنا غبار الطائفية والعنصرية قولوا آمين.
Boshi55a@hotmail.com
Boshi5aa.blogspot.com
إقرأ المزيد...
الخميس، 24 مارس 2011
مثقفين خرطي
24/3/2011
خلونا نفضفض شوي ونتكلم،ونسولف بهدوء، أو حتى بدون هدوء، لان بعض الناس ما يسمعون الا اذا صرخنا، اتكلم عن الناس الي حاطين لزقة على جبهتهم مكتوب عليها، احنا مثقفين، تقدميين، مناضلين، حقوقيين، دستوريين... وباقي الكلام الكبير الي يقولونه عن روحهم، وانهم يهتمون بحقوق الانسان، والخرفان والضفادع والحيتان، والاشجار، والحشرات، وحتى حقوق الجمادات!
طبعا كل هالكلام وقت الصجية طلع «تيش بريش» وفي قول آخر «هوا بشبك» وفي قول آخر «خرطي» لان الربع المثقفين الكتاب الدستوريين البطخيين الى كل واحد لابس نظارة «قاعة بطل»، لمن وصل الموضوع عند البحرين، بلعوا لسانهم، وبالمصري «القطة اكلت لسانهم»!
طبعا انا ما اتكلم عن ابو جهل مثلا، لانه الريال واضح في مبادئه وكلامه، انا اشره على جماعة الحريات! الي لبسوا الف قناع بس علشان ينحاشون من التصريح بوضوح! مو المطلوب هني يقولون احنا مع المعارضة او الحكومة، او يصيرون مع ناس ضد ناس،مو هذا المطلوب، انا اقصد الوضع الانساني، يعني على الاقل خل يطلع واحد ويقول «لا يجوز استخدام العنف مع الناس»، او واحد يطلع ويتكلم ويقول «انه للناس الحق في التعبير عن رايها»، ماسمعنا ولا راح نسمع!
بذمتكم مو عيب،ناس في اوربا والامم المتحدة يتعاطفون مع اهل البحرين اكثر منا، وهم ناس ما لهم علاقة لا بدين ولا مذهب، بس تحركهم انسانيتهم، والانسانية اخر شي يفكر فيه ربعنا، لان الطائفية والعنصرية مرض مزمن مو قادرين يتعالجون منه...الله يشفيهم!
Boshi55a@hotmail.com
إقرأ المزيد...
الأربعاء، 23 مارس 2011
وينكم عن الصليبخات !
23/3/2011
اهل الديرة طيبين، وعيال حلال، ومسرع ما يسامحون، بس الله يسامح السياسية وربع السياسية، والي صاروا محترفين ولا ميسي ورنالدو في شغل اللف والدوران والترقص، الي يقصون على الكل، ويزايدون على الناس في حب الديرة، وهم اكثر ناس يشتغلون ضدها. امس في الديوانية شفت لي واحد من هالنواب الي يلعبون بالبيضة والحجر، وما يخلون حجر ما ياخذون عليه عمولة، المهم قعدت عنده وقلت له ليش: ما وقفتوا مع الناس المساكين في البحرين؟
• أجاب: لانه ما وقفتوا معانا في الصليبخات!
• قلت له: «يالحبيب انا اتكلم عن البحرين»؟ قال لي بكل برود «نفس الشي»!
• قلت له بس مو ببرود «يالحبيب، اهل البحرين ما وقفوا ضدكم ولا لهم علاقة فيكم، شنو علاقة الصليبخات بالمنامة، شنو هالمنطق؟؟!»
• وهم قال ببرود «نفس الشي انتو كلكم نفس الشي وهذه طائفية»!
• هم رديت عليه مو ببرود «طيب يالحبيب احنا طائفية، واحنا طائفيين، اكثر من رمان الطايف، زين جذي؟ انت خلك مو طائفي وعلمنا شلون نصير وطنيين!.. هذا الكلام انا اعرفه تبي تورطني، انت قاعد تخدعني هذا ديدنكم..
• ديدنكم منو؟ يا حبيبي الناس تموت في الشوارع على الاقل قول كلمتين، ترحم عليهم مثلا، هذي بعد صعبة؟
• وايد صعبة انت تبي تورطني؟
• في شنو؟ بس تترحم تتورط؟
• طبعا، في ناس يبون علي الزلة، اخاف يستغلونها في الانتخابات ضدي وأروح قوع
اي قول جذي من الاول، ومستلمنا صليبخات ودستور وحريات وأفلام هنديات!
• قاعد اقول لك بس لا تقول لاحد.
• طبعا ما أقول
وخلص الحوار واكل النائب صمون فلافل وقام!..
Boshi55a@hotmail.com
Boshi5aa.blogspot.com
إقرأ المزيد...
الاثنين، 21 مارس 2011
العجلة.. الذره.. الاستجواب
20/3/2011
الكويت فيها نادي علمي مختص بتفريخ العلماء الكويتيين والمخترعين ورعايتهم..وهذا الشي واضح من خلال جهود القائمين على النادي منذ تأسيسه..وبين فترة وفترة نسمع عن كويتي فاز بميداليات ذهبية عالمية نتيجة اختراع جديد تم تسجيله دوليا..وبالفترة الاخيرة لا والله زاد عدد المخترعين الكويتيين
• كلمة راس
اللي يوقف مع البحرين طائفي..واللي يوقف مع الفلوجة بروحها ويترك العراق كله وطني وشجاع..واللي يمدح حزب الله قبل شهرين اهو نفسه اليوم يحذر من تحركاته في البحرين! الجذب شلون صاير احمر اخضر..بس قالوها الاولون.. ما يحبونك لو تبوس روسهم وريولهم..لأن بنظرهم اي شيعي عيمي واي عيمي فارسي واي فارسي مجوسي؟؟ يعني العرب اللي وااو ودشوا الاسلام بسرعه مثلا..؟
• كلمة راس 2
الكاتب المهرّج دام انك شريف وتتغنى بأصلك اليمني.. ليش ما تروح ميدان التحرير بصنعاء مو أحسن من المساج الفلبيني وبنيد القار؟
Boshi55a@hotmail.com
Boshi5aa.blogspot.com
إقرأ المزيد...