صليبخات .. الضاحية .. الروضة

1/6/2010
من العجايب الستين اللي شفناها وراح نشوفها في الديرة..ومن خلال مسؤولين في بعض مرافق الدولة حرام تحطهم حراس بمخيم.. عاشت الكويت قبل امس حالة من الضحك الجماعي اللي حاشت اغلب المواطنين اللي يسكنون بمنطقة الصليبخات..والضاحية..والروضة..شلون؟ تعالوا معاي اضحككم وابجيكم بنفس الوقت..موظف عام في الدولة بمنصب نائب مدير عام..ساكن بمنطقة الصليبخات..طلع بسيارته على شارع بوظبي بامتداد البحر وكمل سيده لين وصل شارع جمال عبدالناصر..ومن هناك لف على شارع الحب وطق بريكات ورن موبايله وكان يكلم نائب.. النائب قال حق الموظف بسرعة تعال لي علشان نضبط المسألة واعلمك شتسوي .. وبالفعل النائب بعد تقاطع الشامية وكيفان طاف الجسر ودش الضاحية وصفط عند المسيد لين وصل النائب بعد ما صلى صلاة الخوف..وقال حق الموظف..هاك هالاوراق وسو نفسك ان عندك وثائق وروح المخفر واشتك وانا بطرش لك جم واحد يسوون لك هليلة وزيطة وزمبليطة علشان تكمل الدور اللي رسمته لك..الموظف ما صدق وقال تم ودق سلف ودش بين الفيحا والنزهة واخذ من الجسر يسار ووصل منطقة الروضة..شال بيده الاوراق ودش المخفر وقال حق الضابط..يسلم عليك النائب ويقول لك سو لنا قضية بالشيخ اللي سوا مثل ما سوا ولد السلطان لما راح ينقذ بنت السلطان..ورفس الباب جنه مارد من نار وكسر باب الاتحاد ودش ونبي نطلعه بالقضية...الضابط حول الموظف الى المحقق..جان يقوم المحقق مثل ما قام الوالي بمسرحية على هامان يا فرعون وبصق في وجه ابا الحصاني..طبعا بصق مو صج..بصق من باب النص المسرحي..لكن المحقق قام وقال حق الموظف..روح حق النائب مالك وقول له المحقق يسلم عليك ويقول لك.. هذي اول مره اشوف موظف حكومة رايح حق الحكومة يبي يشتكي على مواطن....شفتو شلون الديرة فيلم هندي والموظف والنائب ابطاله؟ والله فشله وبالاخير محد عطاه وي وهد الموظف بجم صحافي يبي يسوي مؤتمر صحفي..وبالتالي الصحفيين عرفوا ان ماكو عشا هدووه وراحو.. خوش نائب وخوش مدير..

• كلمة راس
زعم الفرزدق ان سيقتل مربعا... ابشر بطولة سلامة يا مربع
وعلى قولة المثل..جلوح ملوح اللي يدل بيته يروح..ومثل ما وصل الروضة رجع الضاحية اخذ له زفة ورجع نام بصليبخات..
إقرأ المزيد...

احتلال البريعصي

31/5/2010
قاعد بأمان الله العصاري مع أم شيخة أشرب بيالة جاي مزعفر ومهيل.. مع شوية كيك بوسفينة.. دش علينا خال شيخة يركض ويناهت ويتنفس بسرعة الضوء.. سألناه شفيك عسى ما شر.. قال عطوني قلاص ماي.. عطيناه ماي شرب وتالي أخذ نفس عميق وقال لنا.. بيعوا بيتكم ويمعوا بيزاتكم وزهبوا جوازاتكم.. قلت له علامك شصاير؟ قال لي إلحق ما تلحق.. صرخت عليه وقلت له ياخوي شفيك هل إيران طقونا بالنووي؟ قال لأ.. قالت له أم شيخة.. شصاير هل فاض البحر وغرقت الديرة؟.. قال لأ.. نطت شيوخة وسألت خالها .. خالي شصاير.. قالها ما راح تفهمين حتى لو قلت لج.. هني قمت وشلت سيفي البتار وحطيته على راس خال شيوخة.. قلت له الله عطاك دقيقتين يا تفهمنا شصاير يا أذبحك.. نطق عقب التهديد وقال لي.. البريعصي اللي يكتب بعصعصه وجه نداء لاحتلال الكويت.. وقاعد يحرض العالم علينا وأنا خايف عليكم فقلت أمركم وأحذركم.. هني فجيت وزاري وانسدحت على المطرح وقمت أضحك من قمة راسي.. وأم شيخة قالت حق اخوها سالفتك خوش سالفة بس عن الصج حالفة.. وشيوخة خزت خالها خزة ودشت دارها.. نط الخال وقال من صجكم انتو ما تعرفون البريعصي اللي يكتب بعصعصه إذا قال شي يصير ثاني يوم لأنه قلم مؤثر وأوباما يقراله.. تعدلت ورديت ربطت وزاري وقلت حق خال شيوخة.. انت الظاهر ما تعرف قصة البريعصي.. هذا يا خال العيال تيش بريش مثل الحصالة حط فيه بيزات يكتب لك عن أي شي وكل شي.. مرة كتب عن المتفجرات ومرة كتب عن الأزمة المالية ومرة كتب يمدح بومرزوق وبوأحمد علشان يردونه.. وفي فترة كان يسب الصقر والحين يمدحه ويقول انه الرجل الوطني الوحيد بالديرة.. أما سالفة مقالته مالت غزو الكويت واحتلاله فأبشرك.. البريعصي بالغزو خذاه أبوه اليمني وراحوا عدن ولما تحررت الكويت رجعوا.. مثلك عارف البريعصية يموتون بالدبس والكويت فيها دبس على أفا من يشيل.. فلا يغرك البريعصي وعصعصه.. وقوم خلنا نروح نشتري جم فنيلة ومكسر من عم البريعصي بالمباركية..
إقرأ المزيد...

استجواب بودميعة

30/5/2010
يعني الواحد ما يقدر بهالديرة يريح قلمه ويحط ريل على ريل بالسولدير موليه.. الكاتب فينا صاير مثل الإطفائي بشهر أربعة قبل الجرد.. شغال شغال.. والله بلانا بجم نائب ما عندهم شغلة غير التفنتك والتفذلك والتضهول والهييو واللوية.. الكاتب فينا ما يمدي يحط قلمه بالجيس ويزهب جنطته والا نائب ناقز وطاق الرصيف يبي يستجوب، وليش؟ لأنه طق براسه هالشي! عجيب غريب أمرك يا بودميعة الظاهر ما تبت عقب استجوابك للوزير مصطفى الشمالي اللي صار لك سنة وانت رافع ايدك ومحد معطيك وي موليه.. ياينا الحين بدموعك اللي ما نشفت بجنوب السرة وبتسوي نفسك عنتر زمانك.. يا أخي اركد.. طالع لنا بفرعية وكاسر القانون وياي بتصير بطل على ظهر أهل أم الهيمان؟ مسوي نفسك روبن هود وانت من فوق هالله هالله ومن تحت مو مخلي بقالة إلا مستثمرها على ابو انك شاري العمال وحاطهم بمخباتك.. نسيت نفسك يا بو دميعة لما هوشووولك شوي وتبجبجت وقلت ما أعيدها الحين ياينا وصاير فتوة زمانك؟.. اذا تكتلك زفوك وما فاد.. ربعك النواب نصحوك ما سمعت.. الناس ملت من الحركات القرعة مالتك ومنت مقتنع.. ما تقول شتبي؟ بتصير بطل قومي وتنقذنا من التلوث سن لنا قانون وتقدم باقتراح.. مو باقي الا تستجوب وزير الداخلية لأنه المطبة اللي جدام بيتكم عالية.. يا أخي مش دموعك واحمد ربك ألف مرة ان الناس ساكتة عنك.. وترى ما نسينا الجحافل اللي بتطلعها بالشارع وتبي تكسر الدنيا ويوم قطوك بالسرة محد درا عن هوا دارك.. بجيت ودموعك أربع أربع والحين ياينا تقول أنا المنقذ.. إذا فيك حيل حطه بالرياضة اللي تهم الشباب والا الموضوع فيه مساومات وشراء ذمم أنا وانت نعرفها زين.. تبي الصج انت ما يفيد فيك إلا غرفة رقم ستة اللي بجيت فيها.. بس هالمرة لا تجذب علينا وتقول ان صوت بورمية حلو إذا قرا القرآن.. لأن الناس كشفتك.

• كلمة راس
الكاتب البريعصي دعا الأجانب للاحتلال.. أهو شنو هامه مو ديرته.. عنده جنسية ثانية.. وأبوه يمني وأحسن بياع خام.

• كلمة راس (2)
البريعصي صار هالأيام يستخدم مفردات الحمّام .. لأنه عنده حنين للحمّامات من أيام الثانوية.
إقرأ المزيد...

.. ولو كل «كاولي» عوا..

27/5/2010
الظاهر ان بعض الكتاب ظهرهم يحكهم، وواحد فيهم ظهره يحكه وايد، يمكن متذكر أيام تركيا والبلوتوث، لأن الأخ قاعد يسب ويشتم فينا، أنا بوشيخة ولد أم بوشيخة ولا فخر، ويريد مني أن أهد شغلي وأرد عليه!
طبعا ليش يبيني أسبه، وألعن بوخامسه، واشرشحه، وأمسح فيه البلاط، وأدوس بمردانه.. علشان يروح عند معزبه و«يتبجبج» ـ يعني يذهب ويبكي مثل الأطفال ويقول: شوف عمي، أنا مظلوم، أنا يتهجمون علي، وأنا يخافون من قلمي البتار اللي ما خلى لا بار ولا غار ما دشه، طبعا ما اعتقد هو دش بار ما حط بذمتي، بس يقولون انه مرة دش بار، علشان يهدي الناس إلى الصواب، كونه إسلامي متقاعد!
قبل فترة طاح سب في واحد من البنوك، والسبب خوفه على منصبه في البنك الثاني اللي استحوذوا عليه، وخايف على منصبه اللي حطه فيه رفيجه، وزير المعكرونة بوقتها، الحين شكله بيتفنقر، والفنقرة لازم أشرح لكم، هو ضرب مقدمة القدم بأسفل ظهر الرجل فقيل فنقره، وهذا الأخ شكله متفنقر قريبا!
المهم هذا الغبي، يبي يتحرش، ومعتبر نفسه صحافي كبير، بس عاد ما تطوف على بوشيخة، ولهذا طبعا ماراح اروح صوبه، ولا لي شغل فيه.. ياجماعة كيفي وأنا حر متى ما طق براسي، بس الحين ما ابي أرد، ابتلشت بالكتاب الحبربش، والهيلق.. كل واحد كتب له كلمتين، يبيني ارد عليه، شنو انا فاضي لكم، وانا انصحه من موقعي هذا واقول له مثل قلت لصاحبه من يومين: لو كل «كاولي» عوا القمته حجرا.. راح يخلص الصخر!
إقرأ المزيد...

نواب مزدوجون 100 في المئة

26/5/2010
جواب وزير الداخلية على سؤال النائب علي الراشد بأن ما عندنا نواب مزدوجين منو دقيق 100 في المئة.. والدليل عندي.. أحد النواب المزدوجين.. يحارب المرأة ويبي يقعدها بالبيت ويعطيها بيزات وما يبيها تتوظف وتتعلم على غرار «طالبان» وربعه.. وبنفس الوقت يسوي لها ندوات ويترجاها تطلع من البيت تصوت له.. وتقولون لي مو مزدوج؟.. نائب ثاني ملك اللجوء للقضاء ضد كتاب الرأي اللي يكتبون بمقالاتهم نقد مباح كونه شخصية عامة وإذا فاز بحكم يعزم الصحفيين وعقب كل هذا يقول ان ما المفروض على رئيس الوزراء اللجوء للقضاء ضد نسيبه! أكثر من جذيه ازدواج ماكو.. نائب ثالث معروف بخيطان يصيح من قمة رأسه ويبي يستجوب ويطلع بيان بسبب غلاء الأسعار.. واهو بالانتخابات يوزع درجات بالهبل ويظلم الناس ويرصد ميزانية ضخمة لشراء الاصوات؟ هذي مو ازدواجية الا انفصام بالشخصية.. نائب رابع تفوح منه ريحة المناقصات النفطية ويطلع بالمجلس يقول سنمحق من يتاجر بمقدرات البلد؟ هذا مو بس مزدوج الا يطق المزدوجين ستين صفر.. وخذ عندك نواب مزدوجين فكريا كل يوم لهم توجه وقناعة يديدة حسب المصلحة.. والله ثم والله لو الشعب الكويتي يقرأ المضابط ويشوف كلامهم ويقارنها بأفعالهم.. بتشوفون ساحة الإرادة تنقلب الى ساحة حرب ضد النواب الجذابين المزدوجين اللي يطلع عندهم الصحاف أصدق.. وبالأخير يطلع وزير ويقول ماكو مزدوجين؟ إلا أكو ونص..

• كلمة راس
أعزائي القراء كرمكم الله.. هذي نكتة عالماشي لكم.. واحد زار بريعصي نايم بالمستشفى بسبب الكسور اللي حصلت له.. فقال له عسى ما شر يالبريعصي شفيك؟ فرد عليه وقال.. العادة طاقيني بنعال.. تخيلوا هالبريعصي صار كاتب عقب الطقة.
إقرأ المزيد...

لو كل كلب عوى

25/5/2010
أنا عشت وايد، وشفت وايد، وعرفت وايد اشياء.. واذا قلت الشي، فانا اقوله من خبرة، وحبي لهذا البلد!
البني آدم المتطرف، او اللي يسوي روحه متطرف، لانه في فرق، المتطرف انسان جاهل، يتطرف في كل شي، يدوس حد «السليتر» عداد السرعة 180، ولا هامه احد، لازم الكل يوخرون عنه، لانه مو صاحي.. وفي النوع الثاني اللي ابتلينا فيهم، هو المتطرف النصاب اللي يمثل دور المتطرف، وهذا يمشي ورا مصالحه، لا يهمه هالطرف ولاذاك الطرف اهم شي شكثر يدش بحسابه، وشنو يحصل من منصب!
اقولها واضحة، الشيعي اللي يقعد يسب ويحذر من السنة، والسني اللي يسب الشيعة، ويخوف الناس منهم، والحضري اللي بس همه البدو وانهم مو زينين وهم ماكلين البلد، والبدوي اللي يسب الحضر وانهم يبيعون البلد.. وغيرهم وغيرهم كلهم نفس الشي، لان هالنوعيات من التفكير في وراها اما واحد فاصل، او حاقد، او متسلق على ظهر ربعه حتى يوصل!
كذابين اذا هالنوعية من الناس، يصرحون ويقولون انه احنا نحب البلد، تدرون ليش كذابين؟ لانه الديرة مو شوارع ومجمعات وسيارات ومولات ونفط وابراج الكويت.. الديرة في ناسها، في أهلها الطيبين، في اللي بنوها واللي يضحون من اجلها، واللي يسب اهلها واللي يفتن بين اهلها، واللي يقلل من شأن بعض اهلها، واللي يتهم بعض اهلها، هذا يسب الديرة، ويكره الديرة، ويحقد على الديرة وعلى كل اهلها!
يا اهل الديرة اللي تشوفونه يسب الناس، ويهذي بالفتنة، ويحذر اهل الديرة من بعضهم البعض، لا تناقشونه، ولا تردون عليه ولا تحاولون تعلمونه، لانه هالنوعيات تبيع الديرة علشان كرسي، هالنوعية شدو عليه السيفون، ولا حتى تردون عليه، لانه «لو كل كلب عوى» بتحذفه بصخرة، راح تخلص صخر الديرة كلها على راسه!
إقرأ المزيد...

ممدوح المدح

24/5/2010
ادارة الجريدة قالوا لي يابوشيخة أذيتنا، وكله طايح في هالناس، ماخليت احد يابوشيخة،نبي مدح شوي نبي تمدح الناس، مو معقولة كله طايح تشلخ في هالعالم.. فقررت اليوم امدح.
امدح الكاتب العظيم والكبير والساخر بوقلمين، بصراحة هالكاتب ساخر ويموت من الضحك، حتى مرة قعدت ثلاثة ايام بس اضحك على مقالته، وانا متابع دايم لمقالاته مثل ما اتابع المسلسلات التركية، ما ادري ليش تذكرت المسلسلات التركية، المهم وهو مصر كل يوم يكتب، ويعطينا من هالنكت، وهالافكار اللي تضحك، حتى سمعت ان محمود السعدني مات والسبة انه قرأ وحدة من مقالاته فمات من الضحك.. فرجاء يا استاذنا استمر في الكتابة، ومالك شغل باللي يقولون انه دمك ثقيل، استمر ونحن من ورائك، ولا تخاف، نحن من ورائك بس ندعمك، وامدح طبعا النائبة «انا ممتنعة» ياجماعة صج انجازات، وشغل عدل، شكثر تصرح، وياحلاوة تصريحاتها، حفظناها، حريات وحقوق انسان مافي غير هالكلمتين، وكله تبي تسوي، وكله راح تسوي، وكله تفكر تسوي.. وهي طبعا احسن وحدة واكثر وحدة تبتسم في المجلس، وتوزع ورد حتى كل ما اشوفها وهي توزع ورد اتذكر اغنية «ليش ليش ليش ياجارة»!
ابي امدح بعد احد النواب.. بس ما ادري بشنو امدحه المهم ودي امدحه على تصريحاته وانجازاته العظيمة، وبصراحة هو احسن نائب، صج ما ادري شنو انجازاته يمكن عنده وايد وانا ماعرف، بس مادام طايحين له مدح فنمدحه فوق البيعة! نمدح منو، ياجماعة فيني مدح بس مو لاقي احد، اذا عندكم احد يبي ينمدح ومو لاقي انا حاضر، لانه هالايام ايام ممدحة!

• كلمة راس
لو كل نائب راقب نفسه بعيد عن مراقبة الوزراء من أجل الأمور الشخصية لكانت الانجازات خير وبركة على الشعب الكويتي اللي مل من بعض النواب اللي ما مهنتهم غير التصريحات الجارحة..
إقرأ المزيد...