النائب وليد والشيعة

1/4/2010
اليوم بتكلم عن بومساعد، وهو النائب وليد الطبطبائي، طبعا كلامي ماراح يكون قدح، ولا سب، ولا شتيمة.. ليش؟ لأني ولد ناس، ومتربي، وأعرف الأصول، وما أقلد تصريحات بعض هالنواب!
النائب وليد، وهو هم صحافي يكتب بالجرايد، وهم يلعب كرة قدم، وهم يمارس رياضة السباحة.. يعني نائب شامل، كتب مقالة قبل فترة عن الشيعة، والظاهر انه يبي يرفع رصيده عند بعض الناس، لأن الطائفية سوق تباع وتشترى فيها الأصوات، والرزق يحب الخفية!
المهم في هذا المقال، يقول إن المواطنين الشيعة ليسوا درجة ثانية - ندري بدون ما تقول - بعدين يدش لنا على موضوع انهم صاروا وزراء، ونواب، ووكلاء، وضباط، وكتاب، وفنانين، وغيره وكأنه يريد أن يتمنن على هؤلاء.. وطبعا بعد الإذن منكم أنا باقوله ليش الشيعة صاروا كل هذا!
يا بومساعد، الشيعة صار منهم كتاب وصحافيين، لأنك مو مسؤول عن منو يدش شارع الصحافة ومنو يطلع، صاروا كتاب لأن عندهم موهبة الكتابة مو بسبب مذهبهم!
ولأنك مو مسؤول عن تعيين الوكلاء والوكلاء المساعدين، لهذا السبب بعض المواطنين الشيعة صاروا وكلاء، وفقا لكفاءتهم وعملهم وإخلاصهم في الشغل، مو بسبب مذهبهم!
ولأنك مو مسؤول مسرح وفن، ولهذا تشوف بعض الشيعة يرسمون ويبدعون ويمثلون، حالهم حال إخوانهم السنة، وهذا وفقا لموهبتهم، مو بسبب مذهبهم!
ما أطولها عليك يا بومساعد، شيعي، سني، مسيحي.. أي كان يعمل وفقا لموهبته، وشطارته، وكفاءته، وعمله هو اللي يوصله للناس في هذا البلد، ويكون له اسم، ومو لأنه من المذهب الفلاني أو العلاني، كما تريد أن تصور للقراء.. والجمهور لمن يروح للمسرح ويشاهده ويستمتع مو لأنه الممثل شيعي أو سني لا طبعا، لأنه الممثل مبدع.. بس عاد تعال وفهم اللي ما يشوف إلا بعين واحدة، وهذه مشكلته!
إقرأ المزيد...

الكويت مافيها شيعة وسنة

31/3/2010
رحت الجمعية ابي اشتري بواتري حق الريموت كنترول..ولما دخلت الجمعية وصرت بنص السوق المركزي شفت لي واحد من الربع قاضب قوطي بزاليا ولاصقه بعينه..سلمت وسألته..بوخالد علامك راز ويهك بقوطي البزاليا؟ قال لي قاعد اقرى السعر ومو مصدق..لأني قبل اسبوعين شريته بثمانين فلس والحين حاطين عليه ثلاثمية وخمسه وعشرين فلس! فاستغربت مثل ما استغرب بو خالد من زيادة الاسعار وتحلطمنا وطلعنا من السوق لا انا شريت بواتري ولا اهو شرى بزاليا..المهم سألني انت شعندك يا بوشيخة ياي الجمعية ولا شريت شي..قلت له ياي اشتري بطارية حق الريموت كنترول..خبرك يا بوخالد انا ريال متقاعد افتر بين القنوات اتطمش.. هني بو خالد حمق علي وتنرفز وقام يزفني..قلت له شفيك؟ قال لي ياخوي انت مينون والا وقتك ضايع؟ بسك من هالقنوات اللي شلخت الوحدة الوطنية وفرقت الكويتيين! قلت له لحظة لحظة منو اللي فرق الكويتيين؟.. ويهك ويه بو خالد وصوتك صوت نائب ملتحي! وطرحك طرح نائب زقمبي! اي وحدة وطنية تتحجى عنها ويا ويهك؟ قال بو خالد بعد ما رفع حواجبه وتخصر..ما تقول لي من متى واحنا نسمع بسالفة سني وشيعي؟ احنا ربينا مع بعض وما كنا نعرف هالسالفة.. والحين عقب الفضائيات عرفناها.. استعدلت له وقلت له شوف يا بو خالد..اركد وصل على النبي لا الخك راشدي اصحيك..الكويت فيها مسيدين واحد حق السنة وواحد حق الشيعة من قبل ميتين سنة..الكويت فيها حسينيات ومنتديات من قبل امية وخمسين سنة..لا وابشرك يا بو خالد ان كنت ناسي عندنا محكمتين للاستئناف وحدة حق الشيعة ووحدة حق السنة.. وازيدك من الشعر بيوت اذا تبي.. حتى بالموت متفرقين من سنين الطواعين وعندنا مقبرتين وحدة حق السنة ووحدة حق الشيعة.. وياي تقول لي ويا ويهك مافي سني وشيعي؟ ونسيت سالفة الوقف السني والوقف الجعفري؟ شتخربط يا بوخالد الكويت من عمر فيها شيعة وسنة.. بس السؤال مو هني..يفترض ان هالشي يمثل الوحدة الوطنية وما يجرحها..ولازم تعرف انت ونواب الغفله ان الشيعة والسنه اخوان غصبن على اللي ما يرضى..لكن اللي يبي يلعب على هالوتر بنطقه بالقنادر.. جبح يا بوخالد يجبحك انت ونوابك المتنطعين..

• كلمة راس
طبعا الحضر والبدو موال ثاني راح اشرحه لكم اذا وايهت بو خالد بسوق السمج يوم الخميس..لأن هم هذا الموضوع له دلالات تاريخية وعلاقات كبيرة في الكويت بين اهل البادية والحاضرة..يا معودين عندنا كنايس هم بسولف لكم..مجتمعنا يهبل بس وين اللي يفهم ويقدر هالنعمة؟
إقرأ المزيد...

تكتل ولا حركة

30/3/2010
في نكتة قديمة تقول، واحد اسمه مدحت الجحش، وكان وايد متضايق من اسمه، وبسبب الطنازة في الفرجان، وبين الربع عليه، قرر تغيير اسمه، وبالفعل غير اسمه وسمى روحه، حمدي الجحش!
في نكتة جديدة، النكتة تقول، في جماعة داخلين بتكتل، طبعا الناس استلموا هالتكتل طنازة، بسبب سوالفهم وأفعالهم، وعرفوا رسميا وشعبيا وجماهيريا ودوليا، باسم «الجيش» طبعا الجماعة ضاق خلقهم وتضايقوا، من سالفة الترابط بين التكتل والجيش، وقرروا تغيير مسماهم وسموا روحهم «حركة».. الحين نبي نعرف شنو الفرق بين التكتل والحركة؟
أنا أشرح لكم، التكتل دائما شي مدلقم، ومتكتل على روحه، يعني تقدر تقول واحد متقرفص وقاعد، هذا يسمى بين العربان متكتل، والتكتل كانوا متكتلين على بعض ولازقين ببعض، ويقال انه واحد مربرب ومتين وكله كتل لحم وشحم، راح الطبيب، قال له «لازم تتحرك شوي» فقال لي متي متكتلين على بعض، خلونا نتحرك! ويوم تحركوا صارت حركة بس عاد هني تبدأ الحركات، طبعا أكيد ما يبون يسوون حركات قرعة، لأن حركاتهم مصلعة!
ما علينا المهم قالوا ان عندهم ثلاثة آلاف منتسب مرة واحدة، شلون؟ محد يدري، يمكن يلمون الأسماء من كشوفات الفرعيات اللي عندهم، مر خبركم نوابهم طالعين من الفرعية المخالفة للقانون! هذ حالة، بذمكتكم «حركة» وذابحين الناس بشعارات الدستور والقانون، ونص اللي يشتغلون فيها، مخالفين للقانون من أوسع أبوابه!
ما ابي أعلق أكثر، بس الظاهر مدحت الجحش طلع وايد ذكي!






إقرأ المزيد...

تجار الدم

29/3/2010
لا خلاف، ولا اعتراض، ولا أبي أناقش أحد، هو أسد المجلس، ونمر الكويت، ونسر الشرق الأوسط، والمدافع عن المال العام، ومرعب التتار، ومفلش الاستعمار، ومفنش الأشرار، وخلى القطو مثل الفار.. هو أحسن نائب، حتى أحسن من «ميسي» لاعب برشلونة.. بس عاد لكل شي حد!
في المجلس يوم الاستجواب، تحدث النائب المحترم.. وصرخ شوية وهدد وتوعد كعادته، ماكو شي جديد، هذا نائب وحقه، المهم وهو يتكلم عض براطمه، عادي تحصل في أحسن العائلات.. بس عاد شنو صار.. طلعوا بياعين الحجي والكلام، اللي قال دمك في فداء الكويت، واللي قال هذه دماء العزة والشرف، واللي قعد فوق السطح يتأمل النجوم، وبعدين ألف شعر، يتغزل بدم حلج النائب، واللي سطر ملحمة فخر ولا عمرو بن كلثوم زمانه، في دماء النائب، واللي ألف أغنية وطنية في دم براطمه، واللي قال انه راح ننتج مسلسل رمضاني من ثلاثين حلقة بعنوان «دماء على رصيف البرلمان»! واللي حط صوره في المواقع الإلكترونية، مع موسيقى وطنية، وأخذ تعليقات تمجيد دم النائب!
يا قوم قلنا نحبه، وهو نائب خوش بوش بس مو جذي، يعني أنا أمس عندي مشكلة باللثة وفرشت أسناني، وطلع شوية دم، ما شفت أحد قال لي دماء العزة والكرامة والمجد واقرأ والرسالة!
ياما شباب قدموا دماءهم لهذا البلد، ولمن نقول دماء ما نقصد دم البراطم، إنما الروح والنفس في سبيل هذا الوطن، ومحد قال وفعل مثل ما فعلوا الربع!..
أنا أقول الركادة زينة، ولكل شي حد، ولكل شي منطق، يعني لا تحولون النائب إلى نصف إله، النائب رجل يتعب ويسعى من أجل الناس، مسؤوليته التشريع، ومراقبة الحكومة، وبس! مو المطلوب منه أكثر، إن قصّر حاسبناه، وإن ما قصر بارك الله فيه.. وبس!

• كلمة راس
صدر حكم بالحجز التنفيذي على جميع العقارات والسيارات والأسهم والحسابات البنكية للنائب السابق لتخلفه عن سداد دين بمبلغ يتجاوز الخمسة ملايين دينار.. نقول بعد والا كافي؟





إقرأ المزيد...

بسنا فلوس

28/3/2010
لو أقعد وأحسب اشكثر عطونا مجلس الأمة فلوس، يمكن الحين الحين صايرين مليونيرية، ويمكن منافسين بهارتي وشاريين منه أسهم «زين»!
مرة قالوا نبي نلغي كل قروضكم، أي قرض حتى لو كان قرض راعي البقالة، بعدين قالوا بنعطيكم عشرة آلاف لكل مواطن، وبعدين طلع مقترح قانون غير، إعطاء كل مواطن ألفين دينار، بعدين فكروا النواب قالوا عندنا وايد فلوس شنو نسوي فيها؟ فقرروا إسقاط فوائد القروض، وبعدين طلعوا قانون الخمسة آلاف لكل مواطن، وخمسة قروض، وألفين هدية، وألف صدقة..!
هذا اللي أنا أذكرهم، يمكن المشاريع والقوانين والاقتراحات اللي ما ذكرتها، ثلاثة أضعاف اللي ذكرتها، يعني لو نطلع «كلكوليتر» - تعجبني با بوشيخة وانت تتكلم ألماني - ونقعد نحسب، يطلع لكل مواطن ثلاثة أربعة ملايين دينار صافي، من هالاقتراحات!
نواب الأمة الكاشخين والكاشخات، بكراسيهم الخضرة، صاروا مثل الشريطية في حراج السيارات، اللي يقول ألف يرد عليه ألفين، ويرد ثالث لا خمسة آلاف، ويرد عليه عاشر لا، اعطوه مئة ألف دينار من بيت المال، والناس مساكين، تصدق، لأنها غرقانة بالديون، وتتعلق بقشة.
صج ما تتذكرون مشهد حسين وسعد في درب الزلق، اللي يقول خمسة ألف، عشرة ألف، بسنا فلوس، بسنا فلوس، مو حالتنا صايرة مثل حسين وسعد، النواب يقولون لنا خمسة ألف، عشرة ألف، مية ألف، واحنا نقول.. بسنا فلوس!
نوابنا صاروا يبيعون «الهوا بقزايز» على قولة المصريين، شوفوا فيلم العتبة الخضرة، يوم النصابين باعوا اسماعيل ياسين العتبة الخضرة بكل وزاراتها، ومطافيها، واسماعيل ياسين من اليوم الثاني صدق، وراح المطافي يطالب بفلوس الإيجار.. فيلم يضحك، وفيلم ربعنا يبكي!

• كلمة راس 1
ودي اعرف ليش مدير عام الهيئة العامة للشباب والرياضة ونائبه ومجلس الادارة ليش لي الحين قاعدين على كراسيهم إذا القضاء صحح لهم تسعة قرارات ادارية خاطئة؟

• كلمة راس 2
نائب سابق غارق بالديون الاسلامية والاستثمارية.. ممنوع من السفر ومرفوع عليه عدة قضايا ومطرود ومنبوذ من الاسرة وسيرته الذاتية والمالية أوسخ من بواليع مشرف، وذمته أوسع من الاولمبي.. عرفتوه او تحتاجون لشرح أكثر؟.



إقرأ المزيد...

6 - صفر !

25/3/2010
اليوم راح تسجل الحكومة هدفها السادس بمرمى النواب بعد فوزها الساحق خمسة صفر باستجوابات سمو الرئيس، ووزير الداخلية مرتين، ووزير الدفاع، ووزير البلدية.. اليوم الحكومة بتشلخ المجلس بقولها السادس بمنح الثقة لوزير الإعلام والنفط الشيخ أحمد عبدالله الأحمد.. والسؤال اللي يطرح نفسه أرضا وجوا وبحرا.. لي متى النواب يتمون أسرى لرغبات صبيان الشارع السياسي وكتابه الدايخين؟ ولي متى النواب يتبعون مبدأ ردة الفعل في التعامل مع السلطة التنفيذية؟ الحكومة عندها خطة تنموية.. والنواب وافقوا عليها.. ولازم يراقبونها ويشرعون للبلد علشان ننهض مع بعض.. لكن بذمتكم نواب مثل نوابنا وينهم ووين التنمية.. ناس تدور مصالحها الشخصية وطاقة الشعب بالطوفة.. نواب بعضهم ما همه الا السجال والحجي اللي مأخوذ خيره.. فاردين عضلاتهم الهلامية بدون معنى.. الأمير قال لنا أعينوني بحسن الاختيار.. والشعب أعتقد ما وفق بفهم وإدراك الرسالة السامية.. قضايا متلتلة وأولويات شكثرها مدرجة للمجلس، واللجان نايمة بالعسل.. تصريحات النواب لو يكرسونها للإنجاز كنا احنا بخير.. لكن بعض النواب عفسونا وخيبوا أملنا.. للأسف بعض النواب لهم تاريخ حافل بالتأزيم وعرقلة الدولة والسلطة التنفيذية.. أنا مستغرب من بعض النواب مسويين روحهم معارضة وياخذون معاشات منها وتلفوناتهم على حساب الحكومة وسياراتهم كشخة هم على فاتورة الحكومة.. بشرفك يا بو براك اكو ديره مثل الكويت معارضتها تاخذ فلوس من الحكومة؟ هزلت.. هذا غير النواب السابقين اللي شلخونا بالبوقات وكاشخين على حساب المال العام.. مثل هالنواب أقول لهم بملء الفم.. عساكم من هالحال واردى وان شاء الله الحكومة تطقكم عشرين صفر في كل استجواب شخصاني ماله لون ولا طعم.. لا والمصيبة ان النائب اللي مقدمه مخالف القانون وناجح بالفرعية.

• كلمة راس
كلمة تقدير للنائب صالح الملا .. فرغم اختلافي معك لكني احترم رفضك التفاوض مع مراجع مسؤولة حول موقفك المبدئي من طرح الثقة..




إقرأ المزيد...

لواء الأخطاء الرياضية

24/3/2010
تبون الصج.. يعني هيئة الشباب والرياضة دليل صارخ على تدني مستوى اتخاذ القرارات الادارية؟ تسعة قرارات اتخذوها صححها قضاؤنا العادل والإخوان لي الحين قاعدين على كراسيهم، معقولة؟.. هالكثر حب الكرسي عمى عيون البعض عن مصلحة الكويت؟.. وبكل صراحة الوزير العفاسي دكتور بالقانون وقاضي عسكري سابق ومطلوب منه يقص الحق ويحيل المخالفين والمهملين واللي مو عارفين للجنة تأديب إدارية أو لجنة تحقيق وزارية للتحقق من وجود قصد التعمد بإحراج الكويت محليا واقليميا ودوليا.. صرنا طنازة حق اهل الخليج.. والعراق اللي يقولون انها دولة بلا قانون ومؤسسات هيئتها الرياضية ابرك من ربعنا مليون مرة.. بلاتر رئيس الفيفا شلخنا طنازة.. ربعنا في آسيا وعلى راسهم راس الفتنة قاعدين يلعبون فينا شوردلي، شنو تاريخهم الإداري؟، والا شنو انجازاتهم على مستوى علم الإدارة؟ بتقولون لي لاعبين وجيل ذهبي؟ شنو يعني.. ذلونا على انجازاتهم بالرياضة كلاعبين كان وراهم ألف إداري مخلص.. ما صارت.. نضيع بلدنا وسمعتنا اللي بناها الشهيد فهد الأحمد علشان فاول شاته فلان أو كبسة كبسها علان؟ يا بو سعود انت وزير والحزم حلو يطلع منك .. ولا تجامل أحد.. واذا الموضوع فيه نواب دلي وملي.. انا ابشرك واقول لك معاك رجال بالمجلس، وكافي اللي سكت وكان حليم حتى جانا القضاء وقال كلمته الفصل.. والمطلوب تطبيق القانون وتنفيذ الأحكام القضائية اللي تحمل توقيع أمير الكويت أبونا كلنا.. كافي عبث .. خسبقونا ولعبو بحسبة شبابنا.. أخذ موقفك غير مأسوف عليهم، بعد ما فضحونا بقصر نظرهم.. جبح الحارس اللي قام يشق ويخيط..

• كلمة راس
اذا عبداللطيف الدعيج فاز بجائزة افضل مقال عن مقالته «عيال عم الشيخ سلمان» فاليوم بموقف الشيخ سلمان تجاه عيال عمه ابناء الشهيد يترجم لنا شلون تكون المواقف الصحيحة بالتوقيت المناسب.. وعاشوا شيوخنا متماسكين ضد اليهال.





إقرأ المزيد...