استجواب بقالة طهران


16/6/2011

أنا اليوم قررت أصير نائب مجلس امة معتبر، وأركب المرسيدس، وأروح للبرلمان، وأقدم صحيفة الاستجواب لرئيس الوزراء قبل غيري، مو قام يصير مخامط، الي يقوم قبل الثاني يقدم استجوابه! وطبعا محاور استجوابي، صخر، تكسر الدنيا، ما اطولها وأعطيكم محاور استجوابي للرئيس:
-1 ما هو السبب في ان الناس يشترون الخبز الايراني في رمضان بالذات، وهذا الشي راح يخل بعلاقاتنا مع لبنان الشقيق، ويدمر علاقتنا مع الصمون الفرنسي؟
-2 شفت قبل فترة واحد من اعضاء الحكومة طالع من الجمعية، وشايل معاه لبن دايتي الايراني، فهل هذا اللبن خالي الدسم، او فيه اجهزة تجسس؟
-3 يقولون ان وزارة الاشغال يوم شالوا بقالة طهران في ابو فطيرة، اكتشفوا تحت البقالة قنبلة نووية، وانكم حشيتوا القنبلة، فهل هذا صحيح؟
-4 غلام رضا، العامل الصحي قبل يومين اشتغل في بيتي وقص علي، واخذ مني سبع دنانير زيادة، وانا اسأل وين الحكومة؟ ليش ما ترد حقي من غلام رضا؟
-5لو حظ في الدوارات شباب قاعدين يبيعون بنك، والبنك من ايران، فهل كشفتم على البنك من وجود اشعاع نووي فيه، لانها مؤامرة حتى يشعشعون الشعب الكويتي؟
-6 تم اكتشاف بالطو في سوق المباركية يشابه بالطو احمدي نجاد فهل هو نفس البالطو او غيره، وهل فتشتوا جيوب البالطو قبل لا تبيعونه؟ وهل البالطو ينباع بسوق المباركية؟ ولا ايضا موجود في سوق الحريم؟
بعد هالمحاور اعتقد ان رئيس الوزراء اكيد راح يستقيل، ولو قدمته حق «بان كي مون» يمكن يحرق الامم المتحدة وينتحر من القهر بسبة أغبى محاور استجواب في العالم!

إقرأ المزيد...

في الجو غيم


14/6/2011

احنا عندنا احسن حكومة في العالم، لا مو في العالم.. في المجموعة الشمسية، وزراؤنا احسن وزرا، واقوى وزرا، واحلى وزرا، يعني لو سويت مسابقة جمال الوزرا اكيد وزراؤنا يفوزون بالعشر مراكز الاولى!
وطبعا الاكل عمره ما صار فاسد، لا دجاج مضروب، ولا مطاعم تبيع لحم حمير، ولا معلبات منتهية صلاحيتها، الواحد فينا عمره ما تسمم، واذا تسمم يمكن بسبب الحسد!
والداخلية بدون كلام احسن ناس، ادب واخلاق وثقافة، وعمرك ما تشوف شرطي موقف وحدة بالشارع وقاعد يطل داخل السيارة، والشوارع فاضية، ودك يوم تحصل زحمة ماكو حتى بعض المرات احلم بالزحمة!
وعندنا مشكلة انه كل شي رخيص، نبي نشتري شي غالي ما نحصل، نفتر على الجمعيات والمجمعات ندور على اشياء غالية تكسر ميزانيتنا ما نلقى، حتى نضطر نسافر على «الكويتية» احسن خطوط طيران في الشرق الاوسط الى دبي حتى نشتري بضاعة غالية!
التربية عندنا مسكتة، الولد يدش المدرسة كلمة ما يعرف يطلع في يومين بلبل، نتحدى الصين في عدد عباقرتنا، ومخترعينا، ومكتشفينا، حتى اليابان وسنغافورة يوميا دازين وفود يبون يكتشفون اسرارنا التربوية، بس احنا طبعا النحاسة بدمنا ما نعطيهم اسرار طبختنا التربوية!
برلماننا ولا الكونغرس، نواب فهم واخلاق واسلوب وخبرة دستورية وثقافة نحسد عليها واسلوب في الحوار ولا «اوباما» وحبهم للكويت قبل كل شي!
بعد شنو اعلامنا وتلفزيون الكويت لا تخلوني ابطها واقول اني ما انام الا على صوت وصورة تلفزيون ديرتي!
والامن عندنا مستتب، ما يصيدون الا الخونة والمجرمين والنصابين والعملاء وكل خائن خسيس وجبان!
وبس بعد اكثر من هذا ما اقدر اقول، هالايام في الجو غيم، وايد غيم، الواحد ما يدري شنو يصير!

إقرأ المزيد...

دورات للنواب


12/6/2011

أنا أقترح من موقعي هذا أمام الغوري والدرابيل والبخصم وكيك بوسفينة اللي جدامي، ومن موقعي هذا وأنا قاعد مجابل أم شيخة، ومن موقعي هذا وأنا أطالع روتانا زمان فيلم لأنور وجدي، ومن موقعي هذا اقترح لمجلس الأمة عمل دورات خاصة للنواب!
انه بعد ما ينجحون يسوون لهم دورة، يعني حتى الخدامات قبل لا يجيبونهم الخليج يدربونهم على الكوي والغسيل والكلام، والنواب طبعاً لازم يدربونهم على وايد أشياء!
أول دورة نعطيهم معلومات عامة، لأنه مو معقولة النائب ما يعرف أسماء الدول، ولا يعرف ينطق اسم الوزارة ولا اسم الوزير.. أنا اقترح الأول نعلمهم ولو عن طريق الصور والرسومات حتى نفهمهم حتى لا ننفضح بين الرياجيل!
وبعدين يسوون لهم دورة اتيكيت، يعني النائب لازم يعرف شلون يمشي، شلون يتكلم، شلون ياكل، واحنا كل يومين عندنا وفود رايحة وجاية، تصوروا نائب ما يعرف يمسك القشفة والشوكة وطايحله بوخمس على الطاولة، أنا هذا اعتبره تفريغ للدستور من محتواه!
وبعد اقتراح دورة في الكلام والأسلوب لأنه صاير منحط، بعض النواب كل كلمة والثانية ساب واحد ولا غلطان على وزير ولا موظف، وحافظ له منبطح وساقط ولاقط وعملاء.. وأسلوب غبي ويفشل، هذا الكلام يقوله واحد قاعد بعنبر بالسجن، مو يقوله نائب محترم لازم ينتقي كلماته، عشان جذي هم اقتراح دورة في الكلام!
وهم في الآخر يعطونهم دورة في التايكاندو والكاراتيه، لأنه مو حلو في المجلس كل شوي واحد مو عاجبه الثاني بيروح يطقه!
وفي نهاية الدورات ما راح نستفيد شي، لأن بعض النواب مثل «القطو العود ما يتربى» وعاشوا قطاوتنا!

إقرأ المزيد...

تهويشة نواب


8/6/2011

أيام الشباب والشطانة قررت والربع في ليلة خميس نروح سينما حولي الصيفي، كان اسم الفيلم «من اجل حفنة من الدولارات» وما دام الفيلم كاوبوي فلازم في مطارد حصن، وبوكسات وهواش في البار، ووقفة في ساحة المدينة مع شوية غبار، والناس تطل من الدرايش تشوف من الي يفوز ومنو الاسرع الي يطلع مسدسه ويذبح الثاني وطبعا البطل هو الاسرع، يذبح المجرم واحنا من الحماس نصفق!
وفي الافلام الصينية كان بروسلي يوقف جدام اربعة خمسة ويطيح فيهم طق، وهو حتى شعره ما يخترب مو مهم شنو الحوار المهم الهوشة وصراخ وحركات وهم نقعد ونصفق لبروسلي وحركاته!
هذا قبل ايام الهوشات الحين ماكو غير التهويشات نبي هوشة صجية مافي، اخذ عندك تهويشات نوابنا، يوقف الواحد منهم في المجلس ويعدل غترته، ويلعلع «سعادة الرئيس في حرامية يسرقون الناس وانا عندي الاوراق بس ما ابي اكشفها» طبعا لمن يقول ما اكشفها، يعني الرجل ما يبي يتهاوش يبي يهوش بس، علشان يعينون ولد عمه في الوزارة!
وإذا النائب وقف جدام المايكرفونات وقال للصحافيين «انا راح أحاسب الوزير الفلاني على فساده في الوزارة وعندي ادلة وبراهين على الفساد، بس ما ابي اكشفها لان هدفي الاصلاح «فلازم تعرفون انه النائب ما يبي يتهاوش مع الوزير يبي يهوش للوزير علشان يمشي معاملاته!
وإذا شفتوا نائب يطلع بالجرايد ويهدد باسقاط الوزراء وزير وزير، وانه قول وفعل وانه خاش افعاله للمستقبل حتى يقيم اداء الوزراء فلازم تعرفون ان الاخ قاعد يهوش، وعنده مصالح مع الحكومة وناطر الحكومة تلبي مطالبه!
راحت ايام سينما حولي وايام الهواش الصجي، الحين، نوابنا بس يتهاوشون بلسانهم يعني نواب تهويش مو هواش!

إقرأ المزيد...

طائفي من أمه


7/6/2011

حتى يحسن صورته عند العالم، قرر القذافي زيارة طبيب التجميل، وطبيب التجميل اللي لحقه القذافي بيت بيت، شارع شارع، قعد جدامه وحاول يشوف له حل مع الاخ معمر!
القذافي قال للطبيب:يا شيخ ابي احسن صورتي جدام العالم، اشرايك شعري تخليه املس واشقر مثل «براد بيت»؟
الطبيب:حتى لو حاولنا، شكلك راح يصير مرعب، مع هذا الخشم!
معمر:مافي مشكلة، حط لي خشم مثل خشم نانسي عجرم، علشان تتحسن صورتي!
الطبيب:حتى لو، المشكلة بعيونك!
معمر:خلاص، غير لو عيوني، وتوسعهم، وتخليهم مثل عيون هيفاء وهبي، وامري لله!
الطبيب:هم ما تتحسن صورتك، انت شايف براطمك!؟
معمر:خلاص، حط له شوية بوتوكس، واتفخهم مثل شيماء!
الطبيب:حتى لو، صوتك بايخ ومزعج!
معمر:هم مو مشكلة، غير صوتي، وركب عليه صوت شعبان عبد الرحيم!
الطبيب:يا معمر ليش مو راضي تستوعب، المشكلة مو في شعرك، ولا خشمك، ولا عيونك، المشكلة في كلك، يعني لازم تنشال كلك، وينحط لك كل واحد ثاني!
الثلاثي الكوكباني، راحوا لنفس طبيب التجميل، وقالوا للطبيب، عندنا استجواب طائفي «من امه»، ونبي نشيل فقرة الوفد الطبي علشان الوحدة الوطنية، ونشيل فقرة من الاخر علشان التآلف الوطني، ونشيل جملة من النص علشان الطائفية، ونحط جملتين هناك علشان اللحمة الوطنية، ونحط اغاني وطنية في آخر الاستجواب علشان الجمهور يغني ويرقص مع الاغنية، ونختمها بألعاب نارية!
الطبيب يرد عليهم:ماادري ليش تذكرت معمر القذافي!


إقرأ المزيد...

الجامعة المفتوحة هاي شنو ولك


6/6/2011

مادام كل البعثيين المتقاعدين، والمنحاشين، والمجرمين.. اللي كل خبراتهم في الحياة اعتقال الناس، وتعذيب المساكين، وغزو الكويت، صاروا مسؤولين في الجامعة المفتوحة في الكويت، فاعتقد لازم يتغير المسمى الى الجامعة القطرية الاشتراكية، محافظة خيطان قضاء نينوى!
هذا الكلام كتبوا عنه الكثير، وحذروا منه الكثير من الدكاترة في الجامعة وتكلموا عنه الدكاترة المسؤولين السابقين الى طلعوهم من الجامعة بفعل فاعل، حتى يستولون على المكان، ويستوردون ربعهم من جماعة أيتام صدام التكريتي!
وانا ابي اسأل المسؤولين في الديرة والنواب، الي ذابحينه ليل نهار على سالفة الامن الوطني، وينهم عن هذه الفضيحة اللي صار لها سنوات ومو شهر وشهرين، والقضية قديمة وتكلموا فيها ناس من قبل، وحذروا من التغلغل البعثي!
والحين هم نحذر علشان لا يجي اليوم الي فيه بدل علم الكويت فجأة نشوف صور القائد الضرورة في قاعات درس الجامعة ونشوف مكتوب على بوابة الجامعة وحدة حرية اشتراكية، واذا نبي ندش الجامعة، يطلع واحد لابس بريهة حمرة على راسه، ماسك له نقطة سيطرة، ويقولك «بلي شتريد ولك، هاي شنو ولك هاي شنو..»!
هذا الكلام اقوله وانا لا اقصد اتعدى على الجنسية لانه مو مهم عراقي او هندي او اميركي، ما يهمنا انه مو معقولة ديرة الي ذاقت طعم الاحتلال على ايد الصداميين، تكون اول ديرة لمخلفات البعثيين، في العراق يجتثونهم وفي الكويت يحضنونهم «هاي كلش مو خوش حجاية»!


إقرأ المزيد...

جمعة استحوا على وجيهكم


5/6/2011

الجمعة الي فاتت ما طلعت، قلت بقعد بالبيت وأقضي سهرة المساء مع أم شيخة، فرفرت على القنوات، «جك بوم» ولا قاعد أشوف إحدى القنوات وعرض مباشر من ساحة الارادة، وأم شيخة ألحت وأصرت لازم نشوف التجمع.. وشفناه واقولكم ملخصه:
-1 طبعا أول شي قالوا ان التجمع للشباب ونبي نسمع الشباب، ولانه للشباب والنواب حضروا حتى يسمعوا رايهم وتوجهاتهم واحلامهم.. لهذا السبب مسلم البراك بدل ما يتكلم مرة وحدة تكلم مرتين، وغصب هد المايكرفون، وفهد الخنة هم ما قصر بدل الخطبة خطب خطبتين، ومساكين الشباب قاموا يصرخون يطالبون بالمايكرفون، وعطوهم النواب طاف!
-2 من الأشياء الطريفة هو «الهيلم» ممثل التجمع السلفي، تتوقعون عن شنو تكلم، طبعا لاتكلم عن السلف ولا تطبيق الشريعة، دش عليهم بالالتزام بالدستور وحكم الشعب والنظام الديمقراطي، بس كان ناقص يقول الي يموت في سبيل الديمقراطية شهيد!
-3 هم من الاشياء الطريفة ان فهد الخنة الي خطب مرتين، تكلم عن الفساد، وانه شلون الحكومة فاسدة، وانه لازم تحارب النواب الفاسدين، طبعا كل هالكلام قاله فهد الخنة!
-4 مستوى الحوار كان راقي وايد، واخذ مصطلحات راقية مثل «استحوا على وجيهكم» هذا ارقى شي سمعناه منهم، والباجي عليكم، وتصوروا معاي شنو قالوا وشنو الكلام المحترم الي سمعه الناس!
-5 طبعا التجمع قالوا سبعة آلاف وانا قعدت حسبته واحد واحد، طلعوا 643 نسمة بالمصورين والصحافيين والعمال!
-6 كان في وفد من المحامين دشو التجمع بالروب الاسود قالوا جايين من قصر العدل، الجمعة بالليل وجايين من قصر العدل.. شكو!
-7 اخر شي حطيت راسي ونمت، وايد ابرك!

• كلمة راس
خلوني أقولكم نوعيات بعض نوابنا الافاضل، واحد من نوابنا قالوا له ليش غيرت مواقفك مرة واحدة وصرت مؤزم اكثر من المؤزمين، قال: إي، تستاهل الحكومة، ليش طقوني؟ ردوا عليه وقالوا: شدخل هذا بهذا؟ قال: أزيدكم من الشعر بيت، ياني خبر من اسطبل ان الرئيس هو اللي قال طقوه.. عرفتوا القمندة؟...


إقرأ المزيد...