صفر في كل مكان
13/4/2011
بعد أن شربت شاي حليب مع شوية بخصم، وفرفرت على القنوات والناس تتظاهر في كل مكان، دخت وحطيت راسي ونمت، وحلمت ان كل الوزراء صايرين فاضل صفر، وكلهم يشبهونه!
وحلمت واللهم اجعله خير، انهم كلهم مثل فاضل صفر رافعين «جمومهم» ومجابلين وزاراتهم، ويبون يقضون على الفساد ويحاربونه، مثل ما حارب صفر الاغذية الفاسدة، والفساد في البلدية والاشغال!
طبعا بهذه الطريقة وزير الاعلام، راح يقضي على البرامج الفاسدة في تلفزيونه واذاعته، ويقضي على السرقات باسم المكافآت في وزارته، ويقضي على الاسماء الوهمية اللي تأخذ مكافآت البرامج، ويقضي على المحسوبية في الوزارة وكل واحد وربعه وشلته، ويقضي بعد على مجاملة فضائيات وصحف على حساب فضائيات وصحف ثانية، يعني يوميا راح نسمع عن مصادرة اطنان من البرامج والقرارات الفاسدة في الوزارة!
وفي الكهربا هم حلمت بالوزير وهو يكشف فساد الصفقات، والتوربينات الفاسدة، اللي بس تشتغل تحترق، ويصادر الاف الاطنان من المحولات الفاسدة والتلفانة، ويطلع الاف القطع التقليد والفاسدة واللي تنباع علينا على اساس انها اصلية، ويكشف الاف الاختلاسات والتجاوزات في الوزارة وينور الديرة، ويبين حجم اطنان الفلولتان الفاسدة فيها!
ولو يدش المواصلات هناك بعد العملية سايبة، محد يدري من فين يودي على فين على رأي عادل امام، كله فساد في الخطوط وفي المقسمات واخذ فساد في كل قسم وادارة ومكافآت توزع على الربع، والناس الشغالة تاكل هوا وخصومات!
انا متأكد لو يسوون فوتوكوبي للوزير ويوزعونه على الوزارات راح نشوف يوميا الاف الاطنان من الفساد..!
قمت من النوم وقلت اللهم خير، الموضوع يا جماعة مو تلميع للوزير فاضل صفر لانه ما يحتاج مدح ولا تلميع، فالوزير شغله يشهد له، انا اقول انه نبي وزراء بنفس الطريقة يشتغلون وينظفون البلد.. ممكن ولا صعبة؟!
Boshi55a@hotmail.com
Boshi5aa.blogspot.com
إقرأ المزيد...
الأربعاء، 13 أبريل 2011
الثلاثاء، 12 أبريل 2011
قال احلبوه
12/4/2011
قالوا له تيس قال احلبوه، قالوا له ثور قال احلبوه، قالوا له بعير قال احلبوه، قالوا له قطار قالوا احلبوه، قالوا له اعتذرنا هم قال احلبوه، الاخ ماسك في كلمة الاعتذار، وان رئيس الوزراء اعتذر للسفارة على قصة شبكة التجسس الايرانية، ومع كل نفي الحكومة، النائب مصرّ على ان الحكومة اعتذرت!
شفنا كتير ورحنا كتير بس هيك ما شفنا، ما يخالف قلبت لبناني بس من زود القهر، يعني معقولة الوزير الروضان يقول ما اعتذرنا ولا صار اعتذار، ولا أدل وين السفارة الايرانية، والنائب يقوله لا انت اعتذرت!
الروضان يقول له، يا الحبيب والله العظيم وراس امي وابوي وراس عمتي وخالتي... انا اصلا ما رحت السفارة، الاخ هم مصرّ، لا انت اعتذرت بالنيابة عن الحكومة!
طيب الاعتذار يفترض من وزير الخارجية، هو اللي يروح ويعتذر، مع انه ماكو شي يعتذر له، شبكة تجسس وتحقيق معاهم، ماكو سبب يدعو الرئيس والحكومة تعتذر لاحد، والاخ مصرّ انه الحكومة اعتذرت!
طيب شنو دليلك؟ ماكو دليل، يقول انه قرأ ان محامي الدفاع سامع ان رئيس الحكومة والمجلس اعتذروا، «بيييييييه» شنو هالدليل، سامع من واحد قايل، والمحكمة ردت كلامه، وهو ماسك في تصريح محامي الدفاع!
المشكلة ببساطة ان الحكومة تقول انه ما اعتذرنا لا للسفارة الايرانية ولا السفارة الفيتنامية، وما في دليل على الاعتذار، والنائب يقول شنو دليلكم انكم ما اعتذرتوا؟ قصدي يفترض ان النائب يطلع دليل مادي، ورقة، مراسلة، كتاب خطي، فيلم فيديو تسجيل صوتي... مو يقول انا سمعت!
يعني معقولة الحكومة رايحة السفارة، وطاقين الباب، وقايلين للسفير الايراني «اغا احنا اسفين يالحبيب سفطنا السيارة ورا سيارتك» ويرد عليهم السفير «لا عادي يالحبيب ما صار شي» يا جماعة حدثوا العاقل بما يعقل، ما في حكومة بالعالم تروح لسفارة اي بلد وتعتذر!
احنا نحب النائب ونعزه بس قصة الاعتذار، وسامع وقالوا له وما ادري منو، وما ادري شنو، كلش مو ظابطة معاه!..
• كلمة راس
هالأيام بابا سنفور شاد حيله على الجريدة.. الناس مو عارفة شنو السبب، لأنه قاعد يروج كعادته باسم الدين والاسلام والمحافظة على الوحدة الخليجية والشعارات الضخمة.. ترى السالفة بسيطة، بابا سنفور عرف ان الجريدة قدرت تكشف علاقته بقناة الخصال العفنة اللي مثله واللي راح نسولفلكم عنها الايام الياية، وبالتفاصيل الكاملة، وبعدين هم فرصة يراضي معازيبه، وياخذ جم دينار مو حقه يا جماعة، حق المبرة اللي قاعد يغسل فيها الاموال ويغسل فيها الرشاوي سواء كاش او شيكات.. بابا سنفور ترى كلش مو لايق عليك الشرف والامانة.
Boshi55a@hotmail.com
Boshi5aa.blogspot.com
إقرأ المزيد...
الاثنين، 11 أبريل 2011
حكومة.. قوية !
11/4/2011
دايما وقبل كل تشكيل للحكومة تسمع من النواب والناشطين والكتاب وراعي الخباز وراعي البرد وعيال الفريج والاكاديميين واللي له شغل واللي ماله شغل يقول ويطلب ويتمنى ان تكون الحكومة قوية! هل الكويت داشة هوشة مثلا..؟ هل المطلوب وزراء مشتركين بنادي صحي وما عندهم كروش؟ واذا المقصود قوية بالشخصية... هل عمركم شفتوا وزير كويتي لسانه قصير..؟ أو هل اختيار الوزراء راح يتم من خارج البيئة الكويتية المعروفة بقوة الشخصية وحدة الطرح؟ شي غريب عجيب الكل يدلي بدلوه بالوزراء وطريقة اختيارهم.. شي يبيهم تكنوقراط .. وشي يبيهم فلافل وبطاط... وشي يطالب بتوزير ولد عمته وواحد عجيب.. الكل يسولف عن التوزير ونص اللي يسولفون ما يداومون.. والنص الثاني فاشلين دراسيا.. والنواب البعض منهم مستعد يبيع امه وابوه علشان الكرسي، ومع هذا يبون يفهمون سمو الرئيس شلون يختار وزراءه مع انه يتمتع بخبرة تشكيل حكومات محد يتمتع فيها بالديرة.. وهني تكمن العلة.. اي نعم العلة الكبيرة اللي نعاني منها بالكويت.. المعضلة والمشكلة ان كل الكويتيين حتى اللي متجنس قبل اسبوعين يعتقد انه الاقدر على ادارة الامور في الكويت والطاسة ضايعة.. ولا اكبر دليل على كلامي من تصريحات النواب بالذرة والنووي والمعاقين والمسنين والبطاط والجنس والسياسة الخارجية وخطط الحروب.. الخ الخ الخ ليييييييي جزيرة كنكون.. علشان جذيه زين سوا سمو الرئيس لما عطاهم طاف وقاعد يشكل الحكومة بطريقته واسلوبه الراقي.. ولا اعتقد ان اي حكومة قادمة راح تنال اعجاب جماعة العقارب ومروجي الفتنة ومن لف لفهم... خصوصا الكاتب اللي هاليومين متخصص بالبحرين ومسوي روحه بلية ويفهم اكثر من علي البغلي بحقوق الانسان.
Boshi55a@hotmail.com
Boshi5aa.blogspot.com
إقرأ المزيد...
الأربعاء، 6 أبريل 2011
فتوات
6/4/2011
مسؤولين إحدى الوزارات صايرين أبطال وفتوات، نافشين ريشهم ومطلعين عضلاتهم، على منو.. على مواقع الانترنت المحترمة، بلشوا منعوا الخدمات الاخبارية الوطنية المستقلة والحرة، علشان منو؟ علشان يسكتون بعض هالنواب اللي لسانهم طويل وحيلهم قاصر! ليش، لان الوزارة اردى من الدياية، وابوي ما يقدر الا على أمي، ويخافون من صوت الصراصير، وطبعا مبررهم جاهز، سكرناهم حفظا للوحدة الوطنية!
مع انه قلنا وبح صوتنا انه لازم تصير رقابة على المدونات والمواقع، لانها تحرض على الفتنة، بس الظاهر صار العكس، المدونة التي تحذر من الفتنة، وتدعو للوحدة، هي اللي تتسكر بفضل توجيهات الوزارة العظيمة!!.
نحط لكم مثال واحد بس، موقع الشبكة الوثنية، مروا على الشبكة، وتقرون فيها كل شي، تقرون فيها مصطلحات مجوس وروافض وصفويين وتحريض طائفي واضح ومباشر، تقرون فيها هذا أصيل وهذا بيسري، هذا ولد فلان وهذا ولد علان، وتقرون فيها هذا مطيري وهذا عجمي، وهذا عازمي وهذا شمالي وهذا جنوبي، وتقرون فيها هذا ابن «....» وانت ياولد «.....» نعتذر لعدم النشر حتى ما نخدش حياءكم، والامور عادية ولا كأنه صاير شي، يعني الشبكة مفتوحة على البحري، ولا احد يحاسب ولا احد يقول ليش، ولا كأنه في وزارة اعلام تراقب وتشوف!
الوزارة كعادتها دايخة، ومضيعة الطريج، وتستسبع على المحترمين.. صايرين مثل المدرس اللي الطلبة في آخر الصف يشاغبون، وهو يطلع حرته بالولد المؤدب، اللي قاعد في اول الصف!
كتبنا هالشي للتذكير فقط، الصحافة الحرة والاعلام الحر، ما تهمه لا وزارة اعلام ولا مسؤولين دايخين، وما تخوفه هالحركات، والشرهة مو على الوزارة انما على النواب والكتاب اللي ذابحين روحهم وطنية وحريات، وما بطلوا حلوجهم على هذا القمع الفكري والاعلامي، وما يدرون انه جس نبض لبقية المواقع، وبهالطريقة راح يجيهم الدور، وأذكركم!
Boshi55a@hotmail.com
Boshi5aa.blogspot.com
إقرأ المزيد...
الثلاثاء، 5 أبريل 2011
استفتاء وهمي
5/4/2011
لو فرضنا جدلا..ان اهل الكويت حبوا يعبرون عن رايهم باستفتاء شعبي لاختيار رئيس الوزراء القادم.. شنو وشلون بتكون النتيجة وشنو تعليقاتهم واللي يدور براس أهل الكويت الشبعانين..؟
* مواطن طائفي: ازكي السيد يكون رئيس الحكومة لأني كل يوم اشوفه بصلاة المغرب بمسجد الامام الحسين بحولي واعتقد ان اللي يصلي المغرب ونفس مذهبي يستحق رئاسة الحكومة.
* مواطن قبلي: نحتاج لرئيس وزراء شعبي يقعدني بالبيت وما اداوم والمعاش ما يوقف والعلاوات شغالة والكوادر لحق ما تلحق..وللأمانه بوحمود ايده نظيفة ودشداشته بيضه ولأني من نفس قبيلته ما اشوف احسن منه.!
* مواطن طبقي: كوني بنيت الديرة ويدي العود مؤسس للمدارس وعمتي عندها تذاكر ام كلثوم وخالتي اول كويتية تسافر للعلاج بالخارج احب اختار بوعبدالله رئيس للحكومة لأنه من عيال بطنها والباجي لفو..!
* مواطن فئوي: لأني صاحب مقولة ارحل نستحق الأفضل فماكو غير «ناصر» ثاني ينحط رئيس للحكومة لأنه وقت الصلاة راح يكون امام النواب والوزراء في المجلس ولا اعتقد ان غيره يصلح للديرة.!
* مواطن مصلحجي: الله عرفناه بالعقل ما شفناه.. والدين المعاملة مو ضروري نلتحي..والرزق يحب الخفية.. وكل قضايا الوطن لازم نستثمرها لصالحنا.. فماكو افضل ولا اشجع ولا احسن من نائبنا يكون رئيس للحكومة واللي فيها فيها المهم شغلي يمشي..!
* مواطن كويتي: انا ضد الاستفتاء وضد التعدي على اختصاص صاحب السمو ابونا العود الشيخ صباح.. ومعاه قلبا وقالبا في اي شخص يختاره سموه لرئاسة مجلس الوزراء لأنه يعرف مصلحة الكويت احسن من الكل.. ولكن أتمنى والتمني مشروع..ان يستمر الشيخ ناصر المحمد برئاسة الحكومة.. لأن بو صباح كشف الطائفي والقبلي والطبقي والمصلحجي بست سنوات.. فالأكيد ان الست سنوات القادمة بتكون سنين انجاز وتقدم.. ودمتم..
Boshi55a@hotmail.com
Boshi5aa.blogspot.com
إقرأ المزيد...
الاثنين، 4 أبريل 2011
اعتصامات المولات
4/4/2011
ثلاثة أربعة موظفين نايمين، وخمسة ستة موظفين صار لهم سبع سنين ما يداومون، وسبعة ثمانية موظفين يطقون كرت ويروحون المولات يقعدون على القهاوي ويخزون الناس... فجأة يقومون من النوم، ياجماعة شرايكم نسوي اعتصام! وفجأة كل واحد يطلع لافتة، ويوقفون بوسط الوزارة، ويسوون اعتصام، مطالبين بزيادة الرواتب!
كل موظفين الدولة يبون كوادر ويبون معاشاتهم تزيد، بس في نفس الوقت تبي شغل، لانه مو معقولة الناس تبي تخلص معاملة بيوم تقعد شهر، المراجع المسكين يفتر الوزارة على توقيع، واخر شي الموظف قاعد في الساحة، شايل لافتة عطونا فلوس، وعطونا كادر، عطونا بدلات، عطونا مكافآت!
انا أقصد، لازم الموظفين يشتغلون قبل لا يطالبون بالفلوس، يسوون شغل الناس، ويمشون الوزارة، ويقضون على الروتين، والمحسوبية، والواسطة، والفساد الاداري، قبل لا يطالبون بأي زيادة ويعتصمون، مع الاسف الامور واقفة كل ادارة فيها عشرين موظف ويداوم واحد فيهم، ووزارات المهندسين فيها سنين ما يداومون حولوهم للتحقيق! وموظفين قاطين شغلهم كله على الوافدين مدحت ورأفت ومأمون، وموظفين ما يدلون حتى وين الوزارة ولا في اي وزارة متعينين، ولا في اي قسم يشتغلون!
مع كل هذا تشوفهم وقت الاعتصام واقفين وشايلين لافتاتهم، وميكروفون يشيله البنغالي، واخذ تصريحات ومطالبات، بالكادر والبدلات والمكافآت.. ليش؟ لانه القهاوي والكافيهات في المولات رفعت اسعارها، وهم من الصبح قاعدين هناك، وين يروحون يعني!
Boshi55a@hotmail.com
Boshi5aa.blogspot.com
إقرأ المزيد...
الأحد، 3 أبريل 2011
نواب عبدالسلام النابلسي
3/4/2011
صار فيلم كوميدي ولا افلام عبدالسلام النابلسي، بس على امصخ، الشباب كل واحد فيهم تصور نفسه، حسنين هيكل، وبدا ينظر ويكتب ويحلل لا ويطالب بعد!.
نائب طالع لنا احنا ما نبي الشيخ ناصر المحمد، ولا نبي الشيخ فلان ولا نبي الشيخ علان، الاخ داش مطعم، شنو تبي وما تبي! النائب يتصور هو الكل في الكل، لا وناطرين رايه، مع انه كل امكانياته انه نائب داش المجلس بالفرعيات، وفاتح مشغل حريمي بسرداب بيته!
نائب ثاني رفيج النائب الاولاني، هم عنده راي صريح، يقعد ويعدل غترته، يعني صج، ومكود عنده المايكروفونات، ويصرخ «ان الشيخ ناصر المحمد اثبت فشله»، شلون اثبت فشله! وعند منو اثبت فشله؟ لا يكون مقدم الامتحان عندك واحنا ما ندري وانت الي تصلح الاوراق؟ والمصيبة ان النائب نفسه يحتاج الى الف مدرس خصوصي يفهمونه شيقول وشيسوي، وهم يسقط، بس شنو نقول غير الله يعينا على بلوانا!
وواحد من المفكرين السياسيين مو صج قاعد اتغشمر - قعد بالقهوة وشيش، وفكر وقال «نحتاج رئيس جديد بنهج جديد» طبعا ما يدري يعني شنو نهج جديد؟ هو سامعها بمكان، وشافها كلمة حلوة فقالها! والهبل مو في كلامه، الهبل في انه هالناس الي ماشين وراه ويعيدون كلامه، طيب يعني شنو نهج جديد، ممكن احد يفهمنا؟ وينه هذا النهج الجديد؟ في احد يقدر يدلينا عليه، واحنا نروح ونشتريه ماكو جواب لانهم ما يدرون شنو النهج الجديد الي يبونه!
ومفكر ثاني - حلوة هذي مفكر - ما يعرف الا هالكلمة «ارحل» ارحل وين؟ ومتى؟ وليش؟ بس ارحل نستحق الافضل، يا سلام، الاخ داش معرض السيارات، شنو تستحق الافضل، شنو هو اعلان تجاري ولا حكومة... يا جماعة اذا ما تعرفون بالسياسة، على الاقل تعلموا الادب!
Boshi55a@hotmail.com
Boshi5aa.blogspot.com
إقرأ المزيد...