الشارع مكانكم

11/11/2009
يقول الامام الحسن بن علي عليهما السلام.. إياك وظلم من لايجد عليك ناصر له الا الله.. واللي نشوفه اليوم من مواقف بعض التجمعات السياسية غير المرخصة.. والكتل البرلمانية اللي تنضح بالمصلحة.. على سمو رئيس مجلس الوزراء يخلينا نتيقن بأن الرجل مع قلة من رجال الدولة قاعد يتعرض لظلم بيّن.. وبوصباح قدره مواجهة أشباه الرجال اللي النعامة تستحي من فعايلهم.. «حدس» عقب ما رزهم وعزهم بوصباح يطالبونه بالاستقالة.. و«الشعبي» عقب ما ترسوا الدنيا كلاماً عنه بأنه إصلاحي ركضوا وركبوا موجة «كشف الحقيقة» أي حقيقة؟ ما ادري.. هل حقيقة الصراخ اللي دمر البلد؟ أم حقيقة اللي افتر عداده ورجع لسن المراهقة السياسية.. والأدهى والأمر واللي ضحكني وأنا متألم بيان التحالف الوطني الديمقراطي.. أي تحالف وانتو مكشوفين بخلافاتكم على تذاكر درجة أولى وبزنس؟ أي وطني وانتو شلختوا الوطن وفتتوا كل اركانه.. وعقب كل هذا تتهجمون على بو صباح تبونه يقدم اعتذارا؟ ناصر محمد الاحمد الجابر المبارك بن صباح.. ماهو محتاج بريق الحكومة.. ولا يهمه الكرسي مثلكم.. ولا لجأ للشارع يترجاه بوقت الانتخابات مثل نوابكم.. ناصر المحمد سليل اسرة حكمت 300 سنة وراح تحكم بإذن الله لين يموت الحاقدون بقهرهم.. ناصر المحمد اذا نسيتوا اذكركم.. ابوه وزير وعمامه أمراء وخواله اشراف وجده امير وجد ابوه امير وجد جده امير.. ناصر المحمد ايام فقر بعضكم، وهذا مو عيب، كان ينفق بيمينه مالا تعرف شماله.. فشلتونا جدام العالم.. واحدكم يفتخر بالدواوين بعطايا آل سعود وآل نهيان وآل خليفة وغيرهم من امراء وشيوخ الخليج الكرام.. ولما يشوف الكرم من شيوخه وتاج راسه يتحلطم ويسميها رشوة.. منطق عوي.. ولسان مقلوب.. وعقل ما ميش.. وانتو تعرفون ان ناصر المحمد ما عنده أساليب ملتوية.. رجل سيده.. مؤمن بالله وقضائه وقدره ولا يرده أحد مثلكم عن خدمة اهل الكويت.. وراح ينتصر بالله وتنكشفون جدام الشارع اللي يابكم وله بتردون.. جبح نواب لسانهم يلوط اذانهم وعطايا آل الصباح ترست بطونهم..

• كلمة راس
عندي ملاحظة للإخوان في قناة «العدالة».. وتحديدا برنامج «اللوبي» جان زين تركبون لكم جهاز أو شاشة لاستقبال رسائل المتابعين لكم.. مو الكل يعرف أرقامكم.. وبالمرة نفتك من المنّاع وهو يقول وصلتني «مسج» من ابنتنا سارة الثويران، والانصاري لما يقول عندي رسالة من جليل الطباخ.. ودهيران اللي يكتب مسجاته على الورق ويقراهم.. وبو أنور اللي منزل راسه ويتكركر ويقرا الرسايل ويقول.. فمان الله.
إقرأ المزيد...

سم بالعسل

10/11/2009
«ومعهم شهيدا مجلس الأمة التشريعي في العام 1939 المغفور لهما محمد المنيس ومحمد القطامي، والسجناء الستة، وكذلك بقية أعضاء المجالس المتعاقبة: مجلس الشورى 1921، ومجلسا الأمة التشريعيان في العام 1938، والمجلس التأسيسي في العام 1962».
هذا جزء من خبر منشور في الصفحة الأخيرة من إحدى الصحف الزميلة.. أول مرة أعرف أن عندنا شهداء مجلس أمة.. طيب منو قتلهم؟ وليش استشهدوا؟ وشنو كانت قضيتهم اللي استدعت شهادتهم؟ وشنو علاقتهم بالسجناء الستة؟ ومن اللي سجنهم؟ طيب شلون نحتفل بسجين حبسه النظام ذيج الفترة؟ وشلون نعتبر الاثنين شهيدين واهما كانوا مع السجناء؟ ومنو اللي كان يحكمنا ذيج الفترة؟ وليش نحتفل بسجنا وشهداء على قولتكم؟ شصاير شالسالفه؟ هذي فتنة عظيمة.. وهذا دمار شامل للمجتمع.. وهز متعمد لصورة الشيوخ والأسرة الحاكمة..ونقول لمن هو ورا هالخبر: بسكم تفتيتاً للوحدة الوطنية.. مافيكم شوية غيرة على أجيالنا القادمة؟ ليش هالتوقيت؟ أشوف الدستور صار له ستين سنة ما أبنتوا «شهداءه» اللي تزعمون ولا احتفلتوا بالمساجين؟ واحدكم صك الستين مو عمره ثمانتعش ويبي يبرز عضلاته اللي مالها معالم.. لكن الشرهة.. على اللي مخلينكم تسرحون وتمرحون وساكتين عنكم.. والا انتو عين عمجوه؟.. الله لا يبارك من يفرق بين الكويتيين ويخربط التاريخ لمصلحته.. وكل واحد ناقم على الكويت حكاماً ومحكومين.

• كلمة راس
سيدي ولي العهد كنت وزيرا سابقا ناجحا للداخلية.. وأنت أكثر من يعرف التاريخ الصباحي الكريم مع اهل الكويت.. فإليك أشكو بعد الله هذا الذي أراه في بلدي الحبيب.. ومنك أطلب يا سيدي التدخل اليوم قبل أن تنفجر الكويت بفتنة لا يرضاها أحد.. فبك استجير بعد ربي يا بوفيصل..
إقرأ المزيد...

بيان الوزير

9/11/2009
ما تفاجأت من بيان وزير الديوان الأميري الشيخ ناصر الصباح.. وبنفس الوقت ضاق خلقي لأن البيان ما شفى غليل أهل الكويت.. نعم البيان يانا بوقته كمتابعين للساحة السياسية وكان مختصرا ومفيدا.. لكن فيه نقطة مهمة غابت عن الشيخ ناصر الصباح.. موضوع الشيك واللي أثاره من أحاديث كثيرة عن تدخل الشيخ بتسريبه استدعى بيانا يكون متكاملا على الأقل يتضمن اشارة واضحة للبراءة من تهمة تسريب الشيك وبنفس الوقت البراءة من بعض الكتّاب اللي ما عندهم شغلة الا مهاجمة سمو الرئيس بمناسبة وبدون مناسبة.. ونقرأ من ما يقرأ غيرنا بالمنتديات والمدونات وبعض كتاب الصحافة ان هالكتّاب محسوبون على الشيخ ناصر الصباح.. ولأن بعض هالكتّاب يرتبطون بوزير الديوان بحكم علاقات قديمة كان الواجب يطلع بيان متكامل ينفي علاقته بهالأمور.. علشان جذيه بيان الشيكات كان دمعة وقفت على خد الحقيقة ونشفت لأن الخد ينتظر دموعا كثيرة تطهره من الخطايا.. فهل يبرد قلوبنا وزير الديوان ويكمل جميله وواجبه تجاه ولد عمه؟

بيان برقان
بيان بنك برقان ينطبق عليه المثل المصري «الحلو ما يكملش» ولأن مهندس البيان عنده عقدة من الإعلام شرّق وغرّب ودش القرقور من حيث لا يعلم.. هذا الرجل متقصد للإعلام بشكل غريب عجيب.. يمكن لانه تأثر بالنائب فيصل اللي يشوف ان الإعلام فاسد بمجرد قوله للحقيقة.. مو معقول هذا العذر الماصخ.. مات واحد قام واحد واتهم الإعلام وحمله السبب.. شيك يطلع من بنك شعرضه وشطوله يقوم من يتهم الإعلام ويقول لنا وقفة.. الإعلام شكو؟ هل الإعلام عضو مجلس ادارة؟ هل الإعلام يداوم بالدور السابع؟ شوية منطق واللي يحجي خله يجابل شغله ولا يدش ساحة الإعلام لأنه ذيج الساعة بيكون في حانا مانا..

• كلمة راس
تبون الصج شفت الناس بالكويت تتفق على وايد قضايا وأمور لكن اتفاقهم المطلق على سلامة نوايا الشيخ ناصر المحمد حيرني.. ولما احترت سألت أحد المقربين من الشيخ فبدد حيرتي وقال لي.. صدقني الشيخ ناصر حليم جدا وكريم جدا جدا.. وعنده حسن الظن والنية مقدمين على السوء والشك.. والرجل قبل كل هذا يؤمن إيمانا مطلق ابأن الله سبحانه وتعالى ما يضيع أجر المحسنين.
إقرأ المزيد...

بنك الزفر وحمار الجت

5/11/2009

في مسرحية «فرسان المناخ» كان في مشهد يتكلم عن انشاء بنك بالبحر.. واستقر الممثلين بتسمية البنك «بنك الزفر».. ولأن الزفرة محد يحب يشمها.. ولا احد يرضى يمشون فيه الزفر.. فمفردة «زفر» مو محبب استخدامها.. لكن اللي صار أمس بمجلس الأمة تبون الصج خلاني أشم ريحة زفر العن من ريحة سوق السمج ومخلفاته.. لأن النائب اياه اللي ما عنده سالفة غير سالفة الشيكات كشف لنا موقف بنك ما احترم خصوصية الناس ولا حفظ امورهم الشخصية.. ومنو الشخص؟ سمو رئيس مجلس الوزراء.. ناصر بن محمد الأحمد الجابر المبارك الصباح.. أقسم برب العزة ان اللي سرّب الشيك ماعنده دم ولا بويهه ذرة ماي.. هل التبرع للمبرات والكرم صار عيب؟ والا تبوني افتحها بحري واتكلم عن عطايا وهبات بالسر؟ ترى الشيخ ناصر لو بيعطي احد رشوة يسحب له كاش؟ ولا ملزوم يعطي رشوة واهو مهيمن على مصالح الشعب بحكم الدستور؟.. سبق وقلتها منو اللي مستفيد من هز صورة الشيخ ناصر بشخصه بعد ما فشل بهزها سياسيا؟ منو اللي يبي الشيخ ناصر يطيح علشان يوصل له الدور؟ اعتقد صار الأمر واضح أوضح من الشمس نفسها.. وترى النائب إياه أداة واللي يبي يعرف الدليل يشوفه شلون ياكل هوا وينترس حلجه رمل اذا سألوه عن أسماء المستفيدين من الشيكات.. قبل قال نما إلى علمي والحين يقول ما عندي يقين.. لكن يبقى مجرد وسيلة وقابل يكون «حمار جت» يشيله وما ياكله.. بس الخطورة مو هني.. الخطورة اذا البنك الزفر طلع حسابات خاصة برئيس الحكومة؟ عيل المواطن العادي أكيد حساباته وتحويلاته السرية مكشوفة.. ويمكن بأي وقت يفضحون أي مواطن حسابه عندهم.. لأن الشيك مكتوب عليه مدفوع.. ومختوم بختم البنك.. يعني النسخة طلعت من البنك والنائب أداة وراضي يكون «حمار جت».. لكن الشرهة على البنك المركزي إذا سكت والشرهة على كل نائب ما ينفي هالتهمة عن نفسه، واذا النائب سابق على قولة «حمار الجت».. فأنا ادعو كل مواطن لرفع دعوى على النواب السابقين خاصة وانهم بدون حصانة ويحاججهم ويخاصمهم امام القضاء يا انهم يثبتون براءتهم وينكشف النائب او انهم يدانون ولحظتها لكل حادث حديث..
إقرأ المزيد...

بوشيخة... مانشيت وتعليق

4/11/2009

* الراي - الرد على أسئلة المسلم ينتظر.. كلمة القضاء
- بوشيخة: عسى القضاء والقدر يكون أسرع ونفتك
* اوان - مصروفات الرئيس في «أمانة » المجلس
- بوشيخة: والله زمن اللي الكرم الحكومي مع ضيوف الدولة صار سبه وعذروب
* الجريدة - جلسة المجلس اليوم على صفيح ساخن
- بوشيخة: ما عندهم ما عند يدتي.. أسخف منهم ماكو
* الرؤية - الخالد يحيل نفسه إلى محكمة الوزراء
- بوشيخة: بونواف تبي الصج محد عرف حق بوحمود كثرك..
* النهار - بدائل جديدة للكوادر المالية
- بوشيخة: مانبي كوادر نبي بدائل لفوائد القروض
* الوطن - الخالد: أحيلوني.. للمحكمة!!
- بوشيخة: هذي خطة حرب الاستنزاف يا بونواف والداد حق بوحمود واعليه عليه..
* القبس - الخرافي: جلسة المعاقين 3 ديسمبر.. والحكومة يجب ألا تظهر خائفة
- بوشيخة: هذي فيها زغاله من بوعبداللطيف والا شالرابط بين المعاقين والحكومة؟
* الصباح - الروضان: الإجابة عن مصروفات الرئيس سلمت إلى مجلس الأمة
- بوشيخة: والله يننتونا بهالمصروفات اللي يسمعكم يقول صارفين مليار..
* السياسة - الحكومة: خيارنا المواجهة
- بوشيخة: وهذا عين الصواب وزين تسوون ترى النواب ام ناصر لسان طويل والحيل قاصر
* الانباء - البراك لـ «الأنباء»: إحالة الخالد نفسه لمحكمة الوزراء لن تعفيه من الاستجواب
- بوشيخة: محد موهقك يا بوحمود الا الوزير اللي ما يستجوب
* الدار - الخالد «قصّ الحق من نفسه» !
- بوشيخة: الخالد قص الطريج على المؤزمين..

• كلمة راس
في مفاجأة راح اكشف عنها خلال يومين او اقل، من خلالها راح تعرفون شقد في ناس في الكويت ينامون ويصحون على الفتنة ويموتون على نبش القبور والرقص على الجثث.. بس صبركم علي.. لأني راح اعري اثنين من الأراجوزات اللي قاعد يحركهم بو فلان..
إقرأ المزيد...

الكويت أهم

3/11/2009

بكل ديوانية وبكل مقر عمل وبكل طابور اسمع الناس تقول (وفق الدستور) عن ممارسات النواب وتعاطي الوزراء مع قضايانا الرئيسية المحلية.. ولا عمري سمعت احد يقول (وفق حبنا للكويت).. مليون مرة قلناها وتنطعنا فيها لو يرد الراحل عبدالله السالم نبوس ايده وتالي نبوس ايدنا مقلوبة على نعمة الدستور.. مع تحفظنا المؤكد على ان الكويت قبل الدستور حكامها هما هما ما تغيروا عقبه قراب من الشعب ويستشيرونه بآليات مشابهة للدستور.. لكن اللي صاير الحين غريب، عجيب.. عسى ما انتقدت نائب لممارسة ما الا وسموك منقلب على الدستور! وعسى ما ابديت رايك بمادة من مواده الا وهاجموك بكل أسلحة الكلام.. ليش؟ تعالوا أنا اقول لكم.. وبضرب لكم مثال.. واحد اربعة وعشرين ساعة مرته تطقه بالقندرة – كرمكم الله – وتنومه بالصالة بسبب وبدون سبب.. ومطيحة حظه يدام اليران.. وشالخة أم أمه يدام عياله.. وبنفس الوقت أهو مسؤول كبير في الدوام شراح يسوي بموظفينه؟ الأكيد انه بينتقم لنفسه ويسوي روحه ديج وأهو أردى من دياية عدي.. هذا بالضبط اللي قاعدين نعيشه اليوم.. ناس مالها قدر بالدستور وقبله صارت تحكم بسبب قناعات ناخبين حد يوشهم عشا وبيزات ومعاملات.. يابولنا المتردية والنطيحة.. وناس هالنومنة ما ممكن يفكرون بالكويت وعيالها.. وما أردى منهم الا بعض الوزرا اللي عسى ما صرخوا عليه الا قام وركض لهم.. شي غريب، عجيب يعث يلوع الجبد واييب القرحة.. عيز صاحب السمو الله يحفظه وأهو يوجهنا.. تعب سمو ولي العهد واهو يعطينا ملاحظاته.. سمو رئيس مجلس الوزرا بكل مناسبة يأكد كلام الامير وولي العهد.. رئيس المجلس دفع دمه مقابل توصيل فكرة شكر النعمة والعمل على الإنجاز.. وبعض النواب كبير وصغير ما يستحون ولا يخيلون ولا بويوههم قطرة دم.. والكويت آخر همهم.. وعقب كل هذا يقولون لك (وفق الدستور) والله يبا اللي يسمعكم يظن انكم صج «دستوريين».. انا عن روحي اشوف الكويت اغلى من الدستور ترليون مرة..

• كلمة راس
في مقابلة للنائب العدوة في قناة العدالة قال «نريد وزراء فرسان مثل النواب» أول مرة أشوف نائب يمدح نفسه.. بعدين إذا الوزراء مو فرسان اعذروهم لا تستجوبونهم.. شهالمنطق.. والمصيبة ان المناع يأيده والانصاري لاهي بموبايله ودهيران يالابس النظارة يا فاصخها ومقدم البرنامج بو أنور كله فاج حلجه ويضحك..
إقرأ المزيد...

شفيكم ساكتين؟

2/11/2009

إلى كل أبناء وبنات الأسرة الحاكمة في دولة الكويت شنو سبب سكوتكم عن اللي قاعد يهاجمكم بصفاقة وقلة ذوق وجذب وزيف ويبين للشعب بشكل غير مباشر انكم مو قد المسؤولية؟ شنو سبب صمتكم المريب عن واحد دوني يحاول يفكك الشعب اللي يحبكم بالفطرة؟
وينكم عن اللي بالطالعة والنازلة ما مهنته الا اثارة الفتنة؟ لا تقولون لي انه سفيه وما يستاهل الرد.. ولا تقولون لي ان ما يأثر بأحد وان الناس تعرفكم.. ترى حتى الاخو العود بالبيت يفقد هيبته اذا خلا جاره يطقه بحكم انه سفيه وياهل! هذا سرطان ما يوقف الا لين يقتل كل خلايا الحياة في الجسم.. وانتو راس الجسم اللي اهو الشعب.. والله ثم والله ان الشعب الكويتي يحبكم حب لو لفيتوا الدنيا كلها ما تحصلونه بسبب مواقفكم وطيبتكم وياه.. لكن هالنكرة الشاذ فكريا يكرهكم ويبي يدمركم وانتو ساكتين عنه ليش؟ هل هو ضعف منكم؟ هل هو حلم منكم؟بس الحليم يغضب؟ وين غضبكم؟ وين تدخلكم الحكيم لقتل افكاره.. يبا حنا مو ضد حرية الراي واعتقد ان نواب وكتاب الكويت كلهم ينتقدون افعال الشيوخ اللي بالعمل العام.. لكن هذا ما خلا شي الا وقاله.. يقول انكم مو أهل للسيطرة على الناس وان بعضكم طرق البشت؟ يسولف عن خلافات بينكم ويصور للشارع انكم مختلفين وتبون مصدات للشعب؟ عاجبكم الحجي؟ مقتنعين كيفكم.. لكن هذا تحذير من مواطن يشوف بعين ربت عندك ويسمع بإذن سمعت بأخباركم كأسرة واكتبها بيمين شبعت من عطاياكم للشعب ايام الرخا والفقر.. ترى هالدوني اهدافه المعلنة مناكفتكم، عيل غير المعلنه شتكون؟ اقسم بالله العظيم ان اللي بدوا يصدقونه أكثر مما تتصورون ورقمهم يزيد كل دقيقة والسبب سكوتكم وصمتكم الغير مبرر.. انا ما اقول ذبحوه او عذبوه وادري ان هذا مو من اخلاقياتكم.. لكن معقوله ماكو شيخ يتحرك ويوقفه عن حده بتحويله الى السلطات المختصة.. ترى هذا يمس أمن الكويت.. ترى هالدوني خطر محدق بآرائه المسمومة.. هذا انا قلت لكم وانتو كيفكم..

• كلمة راس
ادري بيطلع لي الف دوني مثله ويقولون عيل وين حرية الرأي وانتقاد الشخصيات العامه من الاسرة.. وآنا اقول لهم وارد عليهم.. تعلموا من الربعي مع كل خصومته السياسية مع حكومات الشيخ سعد، الله يرحمه، ما قط يوم هاجم الاسرة برموزها خارج إطار الدستور. إقرأ المزيد...