دبل جنسية

دبل جنسية

31/1/2012

في بادرة وطنية مني، ولاني أحب أسوي تقارير عن السياحة بالكويت، ركبت سيارتي ورحت عند وحدة من المنافذ الحدودية، اسوي لقاء مع السواح، وقفت وجهزت مسجلتي، وسألت اول واحد داش الديرة الصبح، وقلت له: اهلا اخوي ليش زاير الكويت؟
رد علي بثقة: انا جاي بلدي الثاني.



* مو معقولة كل دولة تروح لها تقول بلدي الثاني؟
- لا الكويت صج بلدي الثاني، مو أنا، وانا خوك، عندي دبل جنسية!
* انزين دبل جنسية، ليش زايرنا؟
- جاي أشارك بالانتخابات دعما للوحدة الوطنية.
* بما انك تحب الوحدة الوطنية، بتصوت حق منو؟
- بصوت حق اللي يدوس على راس اللي يعارضونه، واللي مو من قبيلته، واللي مو من طائفته، واللي مو من أصله، واللي مو من فخذه.. بصوت حق بطل الشعب، وبطل الأمة، وحصان البرلمان، وثور الدبدبة!
* يعني نقدر نقول ان حضورك سببه حبك للديموقراطية؟
- يا عمي أي ديموقراطية، أنا جاي أستلم وأمشي.
* شنو تستلم؟
- يعني شنو بستلم فنايل وصراويل.. بستلم فلوس طبعا.
* لو سمحت احنا ديموقراطيتنا نزيهة.
- وينها نزيهة، كل مرة أجي أدور عليها ما أشوفها، يقولون تسافر وقت الانتخابات.
* لا هي مسافرة من زمان بس احنا مسويين روحنا ما ندري.
- وتسافر بدون محرم؟
* مو لمن انت وربعك يدشون لازم نزيهة تنحاش.
- مافهمت
* بس احنا فاهمين!

إقرأ المزيد...

سرقة الدائرة الأولى

سرقة الدائرة الأولى

30/1/2012

العين بالعين والسن بالسن والبادي أظلم...
واللي يحاول ان ينحرك من جدام تنحره من القفا...
واللي يبي يتعشى فيك تتغدى فيه...



الحياة مو لعبة ولا شعارات ولا الناس عايشين في دولة أفلاطونية، انما هي السياسة ومصالحها، واللي يحاول يسوي روحه ذكي وينط على المسلمات الوطنية،لازم ياخذ على قفاه،حتى يتعلم ان الله حق وان الديرة فيها رجال لايمكن ان يخضعوا للضغوطات والمؤامرات الطائفية.
في الشعب اجتمعوا حتى يقسمون اولاد الدائرة الاولى،الى سنة وشيعة،بدو وحضر،وقرروا وقالوا الحضر يصوتون للحضر،والعوازم للعوازم،وحتى رفيجهم اللي رفعوه وقالوا له احنا وياك لانك وطني وزين،كشتوا فيه،ومو لاقي احد يتحالف معاه.
انا ما ابي أتكلم عن اجتماع الشعب مع انه وصمة عار في جبين اللي شاركوا فيه،حتى لو انكروا،حتى لو قالوا انه كان مجرد اجتماع وماصار شي،بمجرد تجتمع لهدف معين وعلى اساس طائفي يكفي ان تكون مشارك في هالجريمة.
انا اقول لابناء الدائرة الاولى الشرفاء،انه لازم يكونون على قدر المسؤولية،وان تكون اصواتهم للقوي الامين،وأن لايشتتون أصواتهم على اصحاب الشعارات،وبياعين الكلام،انما على اصحاب المبادئ اللي بالفعل يدافعون عن المواطن ايا كان مذهبه.
عيال الدائرة الاولى اليوم امام مسؤوليات كبيرة،إما ان يكونوا او لا يكونوا،اما ان يختاروا من يقف امام الهجمة التكفيرية،ويواجه الكلمة بالكلمة والفعل بالفعل،ويكون شوكة في بلعومهم،أو يعيشون في أحلامهم،وياخذون حبوب الوطنية الوهمية اللي يبيعونها الطائفيين،حتى يمررون مخططاتهم الدنيئة.
ياعيال الدائرة الاولى انتبهوا،حتى لا تقولوا مثل ما قالوا عيال الجهرا «الاولى وخذت»!

إقرأ المزيد...

خوش داخلية

خوش داخلية

29/1/2012

وزارة الداخلية مهتمة جدا بشؤون المواطنين، ومهمتها محاربة الفاسدين، والقبض على المجرمين، ومخالفة المتجاوزين، وملاحقة المطلوبين ولهذا السبب وزارة الداخلية، قررت تضبط الحدود الشمالية، وتطلع حرتها بزوار الإمام الحسين.

والحدود الجنوبية من يومين زحمة، ووزارة الداخلية مو عارفة شلون تتصرف مع الزحمة، وهي تعاني من تخلفها، ولهذا السبب تطلع حرتها في المواطنين اللي زايرين العتبات المقدسة في الحدود الشمالية.
الموطنين يشتكون من كثرة المراهقين اللي يستعرضون بسياراتهم بالبر وبالشاليهات والشوارع، وما يصدقون نقطتين مطر ويستعرضون ويعرضون الارواح للخطر، ولهذا السبب، الداخلية يستعرضون عضلاتهم على القادمين من كربلاء والنجف.
الناس تشتكي من أن بعض دوريات المرور بدل ما يساعدون المرور يزيدون من الزحمة، ومشغولين بالمغازل، وبعضهم ما يوقفون إلا سيارات البنات، ولهذا السبب وبسبب الشكاوى، الداخلية قاموا يذلون الزائرين، لانهم اعداء الديرة، ولازم سحقهم ومحقهم..
الناس تقول ليش وزارة الداخلية تعاني من سوء الخدمات في مراكز المرور، من تجديد المركبات والدفاتر وغيرها، فترد الداخلية ان السبب في الحدود الشمالية، وان الناس اللي تسافر الى العراق، وخاصة في محرم وصفر هم السبب، وهم اللي لازم يتعاملون معاهم كتعاملهم مع المجرمين واللصوص.
المواطن يسأل الوزارة عن سبب حقدهم على زوار الحسين، ويطالبونها انها تحط ناس محترمين في الحدود، لانه اللي ما يحترم الناس ما يحترمونه، فاضبطي ورعانك يا وزارة!

إقرأ المزيد...

وايد وايد شفاف

وايد وايد شفاف

26/1/2012

بعض المرات تنخدع وانت ما تعرف انك مخدوع لان المخادع يكون ذكي، ويعرف شلون يخدعك بوسائل وطرق جديدة، وبعض المرات تنخدع وانت تعرف انها خدعة بس عادي تمشيها علشان لا تحرج من يخدعك، حالتنا مثل حالة الي يقدم العاب سحرية وخفة يد على المسرح، ويطلع حمامة من الكبوس، طبعا أهو يدري انها حركة ولعبة، واحنا ندري انها خدعة وخفة يد، بس مع ذلك، نصفق للساحر الي طلع الحمامة من الكبوس.

هالايام ساحرنا اسمه «الشفافية»، و«الشفافية» مثل الساحر الي يستعمل الحيل، وكلنا نعرف انها خفة يد ومو صج، هم يقولون انهم مستقلين غير تابعين لاحد، ولا لها علاقة باحد، ولا يعرفون احد، صحيح ان كل المشاركين فيها عندهم انتماء لعدس وشركائه، او كان عندهم انتماء وتقاعدوا في سن مبكرة، وبالصدفة كل العدسيين المتقاعدين اجتمعوا وياهم، وشكلوا هالمجموعة الشفافة الي الى الان لا شافت شي، ولا صارت شفافة لشي، والناس ناطرتها تطلع بيان توضح، او تحذر، او تقول فلان يبيع فلان يشتري، او هني في فرعي لفلان وعلان، وهناك في تزكية طائفية...وراح تنطر وايد، لانه هالشي ما يصير ولا راح يصير...ليش؟
اولا لان اغلب الفرعيات الي صارت في الدوائر الرابعة والخامسة، كانت تحت اشراف العدسيين، يعني مو معقولة يبلغون على روحهم، وثانيا التزكية او التشاورية الطائفية، في الدائرة الاولى كلها قاعدة تتم علشان رفيجهم فلتة الزمان، وعبقري الامة، يفوز بالانتخابات ويقعد على الكرسي الاخضر.
«الشفافية» تعيد نكتة استقلاليتها وحيادها كل يوم بنفس الطريقة، ولكن النكتة يقولونها مو حتى نضحك عليها، لا طبعا،حتى يضحكون علينا!

إقرأ المزيد...

كله كلام كله كلام

كله كلام كله كلام

17/1/2012

لو نسوي مسابقة عن أكثر حكومة تتكلم بالعالم، وتعطي وعود للناس، يمكن تطلع حكومة الكويت في المرتبة الاولى، مو يمكن، إلا أكيد حكومتنا تطلع الاولى وبفارق الف نقطة، لانه بالفعل حكومتنا حكومة كلام.. وعلى قولة «غلام» في درب الزلق، وهو يرد على حسينو الشري مع وعوده المتكررة بدفع معاشه «كله كلام»، «كله كلام»!



حكومتنا الرشيدة هم ماشية على نفس الطريقة، كله كلام، كله كلام، يا حكومتنا الحبيبة مو معقولة المشاريع واقفة من سنوات، او انتهت، وبدون صلاحية استخدام، فترد الحكومة «لاشك هناك تأخير في بعضها، ولكن من خلال رؤيتنا التطويرية، سنقوم بتجديد وتطوير وتحوير وتسوير المشاريع».. ويقعد الوزير يتكلم عشرين ساعة ما توصل من كلامه الى شي مفيد.
تقوله يا الحبيب، يا حكومة، مشكلة البدون، سبعين سنة على نفس الحالة، يقولك لا، إحنا لازم نسوي لجان نحدد اللي يستحق واللي مايستحق، ونقسمهم فئات، والفئات نسويهم فئات ثانية، طيب وبعدين الازمة تكبر ما تصغر والموضوع صار بايخ، ومحرج، ومتعب بالنسبة للكويت؟ يقولك الحين شكلنا لجنة جديدة غير اللجنة القديمة، وهذه هي اللي تعدل شغل كل اللجان اللي طافت، واللي من خلالها يتمحور الموضوع، وتنتج عنها لجان فرعية نوزع عليهم البدون وبعدين نجمعهم مع بعض، ونقسمهم على اثنين.
الحكومة تتكلم والناس نازلة الشارع تتظاهر، الحكومة تتكلم وتزيد المشاكل الاجتماعية والسياسية، الحكومة تتكلم، وكل مالها الامراض تزيد في الديرة، الحكومة اهم شي تتكلم.. وحتى لو نسأل الحكومة، يا حبايبنا متى بتشتغلون بدل الكلام ...يردون «هذا السؤال يبيله اجتماع ومحاضرات وندوات بعنوان «متى نعمل بصمت» ونبين آليات العمل بصمت من خلال لجان ومحاضرات وندوات ومؤتمرات بس هالمرة الحكومة ما تتكلم نحضر ضيوف من برة يتكلمون بدالنا...!».

إقرأ المزيد...

سنة الهدامة

سنة الهدامة

16/1/2012

شرايكم نتكلم عن التاريخ، نرجع الى سنة 1934، في هذه السنة صارت احداث مهمة، في هذي السنة كانت القوى الوطنية ممثلة بعض العوائل، وطالبوا من الحكم انه يسوون مجلس منتخب للبلدية وللمعارف يعني للتربية،



المهم في هالسنة بعد موافقة الامير، صارت عملية الانتخابات، يعني ما كانت انتخابات مثل الحين، انما كان مجموعة صغيرة من الناس يروحون للديوان ويختارون بعض الاسماء، بدون ترشيح، انما بعض الاعيان يدشون وينتخبون، المهم في سنة 1934مقارنة مع بقية الدول كانت هالعملية تعتبر قمة في التطور الديموقراطي، ومجال مفتوح للمشاركة في الحكم وتحمل المسؤولية.
وبالفعل صارت ولكن طبعا ما استمرت، ولكنها كانت اول انتخابات سرية تقريبا الى حد ما اول مشاركة فعالة.
وفي سنة 1934 كانت الكارثة، صارت أمطار غزيرة في الكويت، وبسبب شدة الامطار يقال بانه تهدم اكثر من خمسمية بيت، وتشرد اكثر من عشرين الف نسمة من اهل الكويت، وقاموا ينامون في المساجد والمقرات الحكومية، وصارت فيها اصابات كثيرة، وعرفت هالسنة عند الكويتيين بسنة «الهدامة»، وخاصة انها صارت مع اواخر السنة، والى الان الكويتيين يعتبرون سنة الهدامة جزء من ذاكرة الكويتيين، وتاريخهم الاجتماعي، اللي بين فيها تلاحم اهل الكويت، ووقفتهم مع بعض!
وايضا، وفي نفس هالسنة، في سنة الهدامة، ولد عميد الاعضاء والمرشحين في مجلس الامة الكويتي العم أحمد عبد العزيز السعدون.
إقرأ المزيد...

المستندات .. حلم

المستندات .. حلم


11/1/2011

صاحبنا ما غيره، من سنة وهو يتكلم عن القبّيضة، وفيه قبّيضة، وناس تقبض وناس تدفع، وانه في راشي ومرتشي، وان رئيس الوزراء السابق سمو الشيخ ناصر المحمد، هو اللي يدفع، وانه عنده المستندات وعنده الادلة والاوراق..

والناس صدقت، واللي يصفق له، واللي يشيله على ظهره ويفتر في البراحة، واللي يكتب فيه شعر غزل، واللي مصوره وحاط صورته بغرفة النوم مع شاكيرا، واللي مسوي فوتو شوب لصوره وحاطه مع «اندر تيكر» يعني قوي، واللي مسوي فيلم وثائقي عن أهم أقواله، وطبعا ما لقى غير السب والشتم فسوى بداله قاموس خاص للمصطلحات السوقية.
المهم انه بعد ما قال اللي قاله، في ايام الانتخابات، لازم يمر الدواوين، والدواوين مو يهال يصفقون له على كل كلمة، ولا طلبة جامعات يصدقون كلامه .. ما أطوّلها في الجامعة بعد ما عطاهم من كلام الشعارات في محاضرته .. سأله طالب: هل عندك دليل مادي ملموس؟ رد الاخ الهمام وقال: لا ما عندي، بس بالعقل عرفت انه في رشاوى وفي مرتشين! يا سلام، ياعيني، رقاصة وبترقص، نورت المحكمة، كل هالكلام اللي قلته عن المستندات، طلع حلم، وطلع بالعقل، يعني كل كلامك بالعقل، رشوة وفساد وتحويلات كله بالعقل، بذمتكم هذا شي يدش العقل، لمن نائب حامي فلوس الامة، يقول كلامي كله كان بالعقل، ليش اخوي انيشتاين ولا نائب، اللي صاير تكتشف النظريات بعقلك! اسمحوا لي، ياللي لوعتوا جبودنا، لانه بعد كل اللي صار، وطلع كله بالعقل، انه اللي يمشي وراه ويصدقه، لازم نصنفه بما يستحق .. واللي بيزعل جدامه برج الاتصالات، يقدر يقط روحه من فوق!

إقرأ المزيد...

نصيحة بجمل

نصيحة بجمل

8/1/2012

تبون نصيحة بوشيخة وبوشيخة صاج، اذا تبي تنتخب: لا تنتخب المرشح اللي كل يوم على ماية يوم معاك يوم ضدك، يوم معارض يوم مؤيد، يوم اسلامي ويوم هتلي، يوم صاعد يوم نازل، يوم ياكل كباب ويوم شباتي.. لانه هذا مسرع ما يبيعك!

ولا تنتخب المرشح بوعشرين وجه وقناع كل ديوانية غير، مع الدينيين يصير دين ويصوم بالعيد، مع الجمبازية جمبازي، ومع الرياضيين مارادونا وميسي، لانه هذا اذا دش المجلس مع الوزير يصير حكومي، مع النواب يصير معارض ومع نفسه مرتشي ونصاب وفاسد!
ولا تنتخب الوايد نظيف لانه ماكو أحد نظيف واللي تشوفه وايد مسوي روحه نظيف اكيد هذا خاش شي لانه مافي احد يدش لعبة السياسة وهو نظيف ومؤدب ومحترم وزين وما يرفع صوته علشان ياخذ، فحطوا بالك من النظيف وايد!
ولا تنتخب اللي يقرق وايد ويقعد بالديوانية ساعة ونص وهو يتكلم ويقرق ويقول كل شي ويعرف كل شي لانه اولا يقرق لانه ما يبيك تسأله وتورطه، وثانيا اللي يتكلم وايد ما يعرف شي وحلاته المرشح يقول كلمتين وتعرفه تالي بالنقاش والحوار مو بالخطب العصماء!
ولا تنتخب العنصري والطائفي واللي يلعب على هالاوراق لانه هذا بيستغل عواطف الناس علشان يوصل ولانه هذا مستعد يبيع ديرته والوحدة الوطنية علشان الكرسي هذا مو كفو الكرسي ولا كفو مجلس الشعب الكويتي!
ادري صعب انه تلقى مرشح زين بس في ولو خليت خربت المهم انت اختار مو أحد ثاني يختار بدالك فانت قبل كل شي مسؤول عن اختيارك لمستقبل عيالك!

إقرأ المزيد...

دائرة الأحرار

دائرة الأحرار

6/1/2012

هي دائرة الابطال، ودائرة المقاومة ، ودائرة الرجال الي وقفوا امام العدوان الصدامي، اذا يبون ينسون الناس هالحقيقة، التاريخ ما ينسى، واذا يبون يقصون على الناس، بكلمتين، الناس ما ينقص عليهم. الا الي يكون ناقص عقل!

الان كل واحد مبطل حلجه، ويتكلم عن الدائرة الاولى وخيارات الدائرة، واقول لهم ان خيارات الدائرة الاولى هي خيارات الكويت واهل الكويت!
اشاعوا انها دائرة القبيضة واكتشفنا ان الي اشاعوا هالشي كانوا يغطون على عوراتهم، وكانوا اول من قبض، واول واحد واقف في طابور الرشاوى، يعني يركب سيارته ويروح يقبض، ويرجع، وطلع الفساد منهم وفيهم، عليهم!
اشاعوا قالوا دائرة طائفية، والي يشوف مخرجات الدوائر الثانية، يعرف منو الطائفي، ويعرف منو اللي قاعد يختار على اساس طائفي، يختارون مرشحين تكفيريين كل همهم محاربة مذهب اهل البيت، وبعدين يتهمون الدائرة الاولى الي تدافع عن الوحدة الوطنية بكل جوارحها بانهم طائفيين!
اشاعوا وقالوا بان الدائرة الاولى مختطفة ونكتشف ان الدوائر الثانية مخطوفة، وبعضها مبيوعة بالجملة، وبعضها بالمفرق، وما لقوا حتى يغطون على جريمتهم الا اتهام اهل الدائرة الاولى بالاختطاف!
ياعيال دائرة الاحرار في الاولى، اختياركم هو الي يحدد مصيركم ومصير البلد، ويبين بالفعل ان كنتم واعين او من النوع الي يتأثر بالكلام الفاضي والاشاعات الي يطلعونها عصابة الفاسدين، فاما ان تكونون رؤوس تفكر وتختار، او اذيال تتبع الصوت العالي، ولا يغركم كلامهم.. فان في قلوبهم حقد وحسد.. اللهم بلغت، اللهم فاشهد!
إقرأ المزيد...

ما تغير شي

30/12/2011

عندي سؤال للجميع: شنو صار بعد استقالة سمو رئيس الوزراء؟
لو نبي نشوف الواقع ما صار شي، في الآخر تبي تتشكل حكومة من الوزراء، وبنفس الطريقة، يعني ما راح يتصلون على وكالة ناسا يدورون لهم على وزير، الفرق يمكن يغيرون بعض اللاعبين وبعض النواب، اللي كان معارض يمكن يصير مؤيد، والمؤيد يقلب معارض، وفي النهاية همه النواب، والتحالفات، والبلوكات النيابية هي نفسها ما تتغير.
ولا الموظفين بيقومون الفجر ويروحون الدوام، ولا اللي كان يتميرض راح يداوم حتى لو مريض، ولا اللي كان يختلس راح يتوب ويروح الحج ويتبرع بفلوسه لافريقيا، ولا اللي كان يستنفع من المال العام راح يصير شريف روما.
واذا صارت انتخابات جديدة، راح تشوفون نفس الناس يتحدثون عن الوحدة الوطنية، والمساواة، والقوانين، ونفس النواب بنفس الطريقة.
ونفس هالناخب راح ينتخب فلان لانه من عائلته، وفلان ما ينتخبه لان اهله ما يحبونه، وفلان زين لانه يمر ويسلم عالربع، وفلان مو زين لانه ما تعشى عندنا، وهذا علشان الطائفة، وهذا علشان القبيلة، وذاك علشان العائلة .. وهذا كل اللي راح يصير وباجر نشوف .. وسلامتكم.
twitter.com/bushi5a


إقرأ المزيد...

فرعي ولد فرعي


26/12/2011

حبيبي الفرعي واللي داش علينا واللي طبيت من سور الفرعي لا تصرح باجر انك من دعاة الاصلاح وانك مع الدستور ولا تروح بعدين ساحة الارادة تطالب بتطبيق القانون ولا ترفع علينا شعارات الا الدستور والاصلاح.. يعني عرفناك بالاسم الصريح والواضح، انك فرعي ولد فرعي فماله داعي تمثل علينا دور ابو القانون، ولا تمثل علينا دور التقي النقي الورع، فخلك على فرعيتك وخلنا على قانونا ولا تحط خشمك في شي ما خصك.. والقانون يا طويل العمر هو الشي اللي ما يخصك لانك اساسا دست عليه مع اول يوم اعلان عن فتح باب الترشح للانتخابات!
بتقوللي هذي مو فرعية هذي تشاورية، ولا تبي تقول هذي تزكية او زكية زكريا هم كيفك سمي اللي تحب على مولودك المشوه بس احنا نعرفه انه اسمه فرعي ولد فرعي من عائلة الفرعيات المجيدة وهذا اسمه الكامل في البطاقة المدنية!
حبيبي الفرعي واللي نجحت بالفرعي واللي بتدش المجلس بفرعي تكفه ما نبي منك لا تعتصم ولا تصرخ ولا تتهاوش بس اقعد وخلك ساكت بالمجلس واقبض معاشك او غير معاشك حتى نحترمك ونقول عنك والله كان خوش ريال.. دش ساكت وطلع ساكت!
twitter.com/bushi5a



إقرأ المزيد...

كل الفيلم.. كرسي

22/12/2011

وينهم النواب اللي دوخونا شعارات ودستور وقانون، وصاعدين ونازلين، وإلّا الدستور، وإلّا القانون، وإلا الديوانية، والّا الصمون فلافل وبطاط؟
احد النواب قبل، عسى ما نام الموظف في الدوام طالب رئيس الوزراء يمر الدوام ويقومه من النوم، واذا لف عليه سايق بنغالي، طالب رئيس الوزراء بقطع العلاقات مع بنغلادش، وتسفير كل البنغاليين، واذا ولده كح شوية طالب الرئيس باقالة وزير الصحة او الاستجواب والمنصة، واذا صار غبار قال وينه رئيس الوزراء؟ أكيد الغبار سببه خطط الحكومة! واذا مواطن طاف الاشارة الحمرا دق على رئيس الوزراء يهدده لانه لازم استجواب ومعاه وزير الداخلية لانه ما تجرأ الولد على ان يطوف الحمرا لو انه غير مشارك ومتواطئ مع رئيس الوزراء.
استقال رئيس الوزراء وارتاح، كمحارب يحتاج الى راحة حتى يكمل قتاله، الوضع ما تغيّر الوضع على حاله، الشوارع ازدحام، المستشفيات مليانة مرضى، الفوضى في كل مكان، حل فيه شك دستوري وخلل قانوني، وبنوك تلعب سياسة وآخرها قمع القوات للناس «البدون» في الجهراء... ونوابنا لا راحوا «الارادة» وقالوا «ارحل» ولا طالبوا، ولا هددوا، واكتفوا بشوية تصريحات ما تصلح للاستعمال الآدمي، وبدل ان يتنادوا ويروحون «الارادة» على الاقل يعبرون عن تضامنهم مع هالبشر، ولكن مع الاسف نوابنا على قولة المصريين «زي قلتهم» ما ينفعون حتى للكلام الفاضي، وتبين انه كل هالفيلم لا علاقة له لا بحريات ولا قانون، ولا دستور، كل الفيلم.. «كرسي».
twitter.com/bushi5a










إقرأ المزيد...

رمز البطيخ

21/12/2011

في مصر المحروسة، أم الدنيا مثل ما يقولون، عندهم طريقة خاصة بالانتخابات، هالطريقة يحطونها علشان تساعد الناس الاميين اللي ما يعرفون يقرون ويكتبون حتى يختارون النائب اللي يبونه في البرلمان وهالطريقة هي طريقة الرموز يعني كل نائب يحطون جدام اسمه رمز معين ورسمة خاصة فيه يختارونه طبعا بالقرعة وكل واحد وحظه.
مرة النائب يطلع رمزه الاسد ومرة البيت ومرة الحصان ومرة الفيل... وانت رايح، وبما انه انت رايح انا اقترح نحط جدام كل تجمع او نائب رمز او رسمة تعبر عنه علشان يختار الناس على الرمز!
فمثلا اقترح نحط رمز الميكرفون ورمز اللمبة ورمز المسدس ورمز السيكل ورمز الدرنفيس ورمز الحصان ورمز الزرافة ورمز الصاروخ وانتو اختاروا رمز لكل مرشح..
أما الوضع السياسي ككل.. فالمفروض ينحط له رمز البطيخ.
twitter.com/bushi5a












إقرأ المزيد...

حرب على نواب الأولى

20/12/2011

من يحارب النواب الشيعة، هم مجموعة من الطائفيين العنصريين الفئويين الي يتصورون بان الديرة ملكهم الخاص، وان بقية الناس يشتغلون عبيد عندهم، ويتصورون بان الناس لازم يمشون وراهم مو عندهم كتف بكتف.
الي يحاربون النواب والمرشحين الشيعة تحت مسميات الانبطاحيين والقبيضة والمرتشين والفاسدين... لا يهمهم يكون في صلاح واصلاح لان همه اساس كل فساد، وهمه من يديرون الفساد، وهمه الي نشروا الفساد بكل انواعه في الديرة، وندري انه ما تهمهم الانبطاحية او الانسداحية، لانهم اول ناس يسوون صفقات مع الحكومة علشان يحصلون على المناقصات والمعاملات وغيرها، وندري انه ما تهمهم الوحدة الوطنية لانهم اول ناس يغنون على انغام الطائفية ولا اغاني ام كلثوم في الحب، بس علشان يحصلون على كم صوت زايد، وندري انهم ما يخافون على الديرة انما يخوفون ربعهم من المواطنين ومن النواب لمجرد انهم شيعة، وكأن النائب الشيعي وحش او ديناصور يبي يخرب الديرة ويبيعها للأجنبي.
ماادري متى يتعلمون هالبشر بان المواطن الشيعي مثل السني وان النائب الشيعي مثل السني، قلبه على ديرته، حاله من حال غيره، والردي ردي سواء كان شيعي او سني او بدوي او حضري.. وفي النهاية عمل الانسان هو الي يقيمه لان نسبه ومذهبه.
اقول لهؤلاء الانتهازيين الي يبيعون الناس كلام فاضي، نعم ممكن تقصون على كم واحد مغرر فيهم، ولكن لا يمكن تقصون على الشعب الكويتي بهالدعاوى، ولا يمكن الناخب ينقص عليه بالكلام الفاضي، الايام بيننا وستثبت صناديق الاقتراع منو على حق ومنو على باطل، وشلون وعي الناخب في الدائرة الاولى، الي دائما تظل اولى في حبها للكويت ولاهل الكويت.
twitter.com/bushi5a










إقرأ المزيد...

ذكرى ديوان

16/12/2011

حسبالنا نكتة سووها صج، النواب قرروا في الذكرى السنوية لاحد الدواوين المعروفة تحويل البيت الى متحف وطني، واعتبار اليوم عزاء وطني تعطل فيه الدوائر وتسكر فيه المدارس وتبند فيه المخابز.
حسبالنا نكتة وطلع صج ان مطبخ بجدوره وصحونه وملاليسه من اهم المعروضات في المتحف لان النواب اجتمعوا في المطبخ في هذه الليلة، ولهذا يمكن اعتبار اي شي في المطبخ من الاشياء المباركة المقدسة اللي لازم تنعرض في المتحف ويفتخر فيها الشعب!
حسبالنا نكتة وطلع صج في المتحف يمكن يحطون عقال منتف وقحفية مخرومة وجوتي مسحك وغترة مقضوضة للنواب وهذي اهم مقتنيات النواب اللي يفتخرون فيها وما حلوة نسوي متحف مافيه قحفية وفانيلة ومكسر لنواب الامة!
حسبالنا نكتة سووها صج من باجر راح نشوف شباك التذاكر عند باب ديوان لانه ما يصير نسوي متحف ببلاش لازم بفلوس ونوزع ريعها للمعارضة الكويتية واي معارضة في العالم حتى ننمي من التوجهات المعارضة الشعبية عبر البحار والمحيطات والخلجان.
حسبالنا نكتة وسووها صج يقولون داقين على المخرج سبيلبيرغ علشان يسوون فيلم خاص بيسموه «ليلة في ديوان» ويمكن يمثل فيه توم كروز ويشاركون بالفيلم في مهرجان كان وراح يشارك النواب في التمثيل لانهم محترفين تمثيل للامة طبعا.
مع احترامنا الكبير والعظيم للنواب في ديوان الحربش اعتقد ان تحويل الديوانية الى متحف قوية شوي .. انا اقترح تسوون نصب تذكاري، ولازم النصب يكون كبير.
twitter.com/bushi5a







إقرأ المزيد...

النائب الجمبازي

16/12/2011

سلام الله على الحسين .. كم من البركات تصير باسمه، وسلام الله على الحسين اللي جمع قلوب الجميع على حبه واحترامه وتقديسه والتشرف بذكر اسمه ويتبرك الناس الطيبين بذكر اسمه وزيارته.
بس عندي رجاء من بعض الكلكجية انه يوخرون عن الامام وعن ذكر اسمه لانه اكتشفت هاليومين ومع حل مجلس الامة ان النواب كلهم صاروا يحبون الامام الحسين، اللي صرح يمدح في ثورة الامام الحسين، واللي ينزل بيان واللي يعطينا دروس عن الامام.. طبعا هذه الامثلة حقيقية يعني مو جايبها من جيبي، فقط حتى أبين لكم شلون النائب الجمبازي اللي صار له سنين بالمجلس عمره ما ذكر اسم الحسين الحين فجأة صار مؤمن بقضيته!
واحد من النواب نجح بأصوات الشيعة، ومع ذلك كل مواقفه مع المؤزمين، هاد دائرته ورايح صوب دوائر ثانية، وعسى ما صار تجمع راح صفط معاهم وصفق لهم .. الحين فجأة قام يقلقس ويتكلم عن ثورة الحسين ويحاول يلزق نفسه بالامام الحسين!
واحد ثاني طلع بنظرية جديدة قال ان الامام الحسين هو اول من خرج للشارع .. يا سلام عليك بس كان ناقص يقول ان ساحة الارادة مثل اللي كربلاء!، معقولة الى هذه الدرجة تستغل المقدسات علشان شوية أصوات، مع ان هالنائب هو اول واحد صفق ووقف مع استجواب البحرين بدوافع طائفية!
ما أدري هالنواب المؤزمين حسبالهم الناخبين الشيعة بهالسذاجة اللي ينقص عليهم بكلمتين وانهم ما يتابعون فضايحكم وما يتابعون أعمالكم ومواقفكم.. فرجاء خلوا الحسين في قلوبنا ولا تلوثوه بلسانكم.. هذا اللي ناقص بعد!
twitter.com/bushi5a













إقرأ المزيد...

قل أدبك تاخذ حقك

15/12/2011

جرب تقعد بالبيت، واشتر لك مية كتاب في الاقتصاد، ومية كتاب في السياسة، ومية كتاب في علم الاجتماع السياسي، ومية كتاب في التاريخ والجغرافيا، وحتى في الديناصورات والاحافير...
بعدين فكر تكمل دراستك وتسافر وتصير دكتور، وتحضر المؤتمرات، وتكتب البحوث وتطور من ثقافتك، يعني تجمع بين العلم وبين الاخلاق والادب والتربية الصالحة ... بهالطريقة انت تعتبر انسان فاهم وواعي، وفاهم شنو تبي تسوي، وشنو تبي تقول، وتعرف وين مشاكل البلد، ووين علاجها.
انت بعد كل هذا، لو تروح وتقدم اي شي للحكومة، محد راح يسمع صوتك، ولا احد راح يعبرك، ولا احد يعطيك وجه، او حتى يفتح لك الباب لانك ببساطة انسان فاهم، والاهم انك تتكلم بهدوء وعقلانية، وتحط المشاكل وتحط الحلول، ومن الطبيعي بما انك فاهم وتتكلم بهدوء وادب انه محد يعطيك وجه.
هذي الحالة هم تنطبق عليك اذا كنت نائب في مجلس امتنا المنحل، لو تقعد اربع سنين تتكلم بهدوء كونك معارض أو مؤيد، محد راح يسمع لك، ويمكن حتى سلام ما يسلمون عليك، لسبب بسيط انك ما تخرع وما تخوف احد.
المطلوب من أي واحد يبي حقه او حتى باطله، يوقف جدام باب المجلس ويصرخ صرختين، ويسب ويلعن وزيرين، وما يخلي أهل إلا ويسبهم، واذا هم دش وكسر احسن واحسن، وإذا قال غصبا على شواربكم يمكن يزيدون من عطاياهم، واذا يبون الف يعطونهم الفين، اذا يبي كرسي يعطونه كرسي وسرير ومكتب، واذا يبي يشيلون الوزير اللي يبيه، علشان لا يزعل..
الفايدة من القصة، اذا تبي شي من الحكومة، عندك طريج واحد «صرخ، عصب، قل أدبك..» تحصل على اللي تبيه وزيادة.
twitter.com/bushi5a









إقرأ المزيد...

طعنوا بظهر القبيلة


14/12/2011

ما ادري ليش يقولون عن المرشح اللي يفوز بالفرعيات انه «خرج من رحم الفرعيات» شمعنا طالع من رحم مع انه مو قاعد في رحم الفرعيات تسعة اشهر، ولا الفرعيات مسوينها في مستشفى الولادة، ولا المرشح بعد ما يطلع من رحم الفرعيات يسوون له استقبال، ولا يوزع كاكاو وحلاو ولازقين صورته وهو مبتسم.
المهم نوابنا ملوت الفرعيات فجأة نزل عليهم القانون، وصاروا خوش ناس، وقالوا انه ما راح ندش التشاورية، وطبعا لمن يقولون ما راح ندش التشاورية تعني ثلاثة شغلات:
الاولى، انهم يعترفون ان المرة اللي طافت دخلوا التشاوريات، وفازوا فيها، وانهم يعترفون انهم خالفوا القانون والدستور، وانهم بالفعل نواب عليهم شبهة لانهم دخلوها من باب الدوس على القانون وهمه مسويين روحهم حماتها وحراسها.
الثانية، انهم يعترفون بحصولها حاليا، وكانهم يبلغون الحكومة، ان في هناك تشاوريات بين مرشحين القبائل، وهذه تعتبر طعنة في خاصرة القبيلة اللي رزتهم، واوصلتهم الى الكرسي النيابي، وارتزوا على الكرسي الاخضر، يعني بس ناقص يبلغون الحكومة وين ومتى الفرعيات.
الثالثة، ان النواب اللي طلعوا من التشاوريات وفازوا، الحين هم اول ناس يطعنون بظهر القبيلة، وينزلون من شأن القبيلة اللي رزتهم، ليش؟ لانهم خايفين من السقوط في الفرعيات، خاصة وان اغلبهم لا مواقف، ولا معاملات، ولا عماة عين، كل اللي كانوا يسوونه، شوية شعارات وكلام فاضي، ما يودي ولا يجيب، ولانهم يدرون انهم داشين بسواد الوجه لقبيلتهم، ولهالسبب يبون يبينون روحهم انهم ابطال، وانهم ضد الفرعيات مع انهم ما يبونها لانهم يخافون من السقوط.
هذي حالة نوابنا التشاوريين، المعارضة، الابطال.. صيحة ونجرة دافعا عن القبائل، صارت الانتخابات، وصاروا اول ناس يطعنون القبيلة!
twitter.com/bushi5a










إقرأ المزيد...

مطالب نائب

13/12/2011

نائب قعد بمكتبه وكتب مطالبه على الورقة ودزها بالفاكس على مكتب مجلس الوزراء بعد أن استقالت الحكومة لأن الأقلية ما يبونهم .. المهم صاحبنا كتب مطالبه الجديدة وهي:
- أطالب بأن يمر الخط السريع عند باب بيتي لانه مالي خلق أفتر بالشوارع على ما اوصل الخط السريع.
- أطالب تصير عطل الاسبوع أربعة ايام وايد اريح وفي فرصة اروح دبي وارجع.
- أطالب بأن يسوون موكب رسمي لي في الشارع ويسكرونه علشاني لاني ما احب الزحمة.
- أطالب بأن يسوون وزارة باسمي وأحط الوزير اللي أبيه واستجوبه متى ما أبي.
- أطالب بأن يسمون شارع المطار باسمي علشان أي واحد يدش لازم يقرا اسمي بالشارع ويوقف بسيارته ويطق تحية.
- أطالب بأن يكون راتبي مثل راتب بيل غيتس لأن إنجازاتي اكثر من انجازاته وصوتي أحلى من صوته.
- أطالب بأن يدمجون الدوري الكويتي مع الانجليزي ولازم النادي العربي ياخذون كأس إنجلترا.
- أطالب بأن أترس بنزين سيارتي ببلاش لمدة عشرين سنة مع سيارات الربع في الديوانية ولازم تنكر البنزين يمرني البيت لاني مالي خلق أروح محطة البنزين.
- أطالب اي وزير يتعين لازم يغديني الأول على حسابه، اذا عجبني الغدا أدعمه واذا مو شي أقدم فيه استجواب.
- أطالب مع كل ناقلة نفط يعطوني عشرين درام نفط عمولة أبيعهم على حسابي لاني من الشعب وكيفي!
- حاليا بس هذي مطالبي أروح البيت وأدز لكم باجي المطالب!
twitter.com/bushi5a









إقرأ المزيد...

الحكومة الصمنديقية

12/12/2011


قالوا بأنها حكومة تصريف العاجل، وحكومة مؤقتة، الى ان يتبين الخيط الابيض من الاسود، يعني الى ان يتبين امام بياض وجه الناس لمن يختارون من يمثلهم تمثيل حقيقي، او يتبين سواد الوجه، لمن يختارون إللي كانوا السبب في ازماتنا إللي نعيشها طول السنين إللي طافت.
حكومة تصريف العاجل، قالوا عنها بأنها حكومة تمشي الامور، وتمتنع عن الندب والنقل والتعيين.. حتى لا يتم استغلال الوزارات لمصالح انتخابية، كلام حلو وجميل ومرتب ومصفف.
بس حكومة تصريف العاجل لا تعني ان الوزير يداوم وزارته، مأخذ معاه المخدة والكنبل وينام بمكتبه لانه تصريف عاجل، ولا معناته ان الوزير في وزارته يكون «صمنديقة» لا يهش ولا ينش، لا يحل ولا يربط.
ولا معناته ان وزارة الداخلية تنام على قصة الفرعيات، وتسوي روحها ما تدري، لانها ما تبي تزعل احد، وتبي تراضي الكل على حساب حكم المحكمة الدستورية، وعلى حساب القانون إللي لازم تكون وزارة الداخلية حريصة عليه، ولكن الظاهر ان الانتخابات من اولها بطيخ، يعني راح يكون هناك شك في نزاهتها، خاصة مع معرفتنا بوجود الفرعيات، ومع معرفتنا ان الحكومة مطنشة مع سبق الاصرار والترصد!
القضية، مو تسوي روحك ما تدري وتسكت، والقضية انه بهالطريقة انت تؤكد للناس ان الحكومة مشاركة في الجريمة، ومشاركة في الفساد، ومشاركة يمكن حتى في تنظيم الانتخابات الفرعية.
الظاهر، والله اعلم، حكومة تصريف العاجل بتصير حكومة تصريف العاجل من الفساد السياسي.. وتصبحون على اصلاح!

كلمة رأس
لما نقول حكومة صمنديقية ما ظلمناكم .. الريال صعد المنبر وشتم خلق الله وكفر فئة كبيرة من الكويتيين وللحين قاعدين تداولون شنو راح تسوون وياه .. مو قلنالكم صمنديقية؟!



إقرأ المزيد...