بو شيخــــــة

رعاع


22/11/2011

ابي واحد فاهم وعاجل وخبير دستوري من ربعهم ويا كثرهم الخبراء الدستوريين.. يقعد ويفهمني علاقة اقتحام مجلس الأمة بمحاربة الفساد والقبيضة والاصلاح، كلكم شفتوا الصور الي وزعوها الجرايد والمحطات، ناس باشكال وملابس تنكرية.
صورة واحد داش ومتربع على كرسي الوزراء، وقاعد يصب لروحه القهوة، وشايل المطارة... شنو علاقتها بالديمقراطية؟
صورة النائب السابق الامين الصادق فهد الخنة، وهو يتعبث بالاوراق، ويقرا شنو مكتوب فيها.. شنو علاقتها بالفساد والاصلاح ومحاربة القبيضة؟
صورة الشاب الي قاعد على كرسي رئيس الوزراء، وشكله دايخ، وماخذ له درزن كبتي... شنو علاقتها بالايداعات المليونية؟
صورة النائب فيصل المسلم، وهو حاط ايده على رقبة حرس المجلس، علشان لا يروحون صوب الناس، ولا يمنعون الناس... شنو علاقتها بمحاربة الفساد في البلدية والشؤون والاشغال؟
صورة الي شايل مطرقة رئيس المجلس السيد جاسم الخرافي، ومودي معاه البيت، والي يفتخرون انه بيعرضه بالمزاد العلني... شنو علاقتها بمطالبهم الاصلاحية؟
صورة الي داش المجلس، وواقف على طاولة الرئاسة بكل قلة حيا وقلة احترام... شنو علاقتها بمحاربة القبيضة والقضاء عليهم؟
صورة الي يدز باب قاعة عبدالله السالم، ويكسر قفل الباب، ويدش المجلس كأنه مقتحم أسوار القسطنطينية... شنو علاقتها بالحياة الدستورية؟
صورة الرعاع الي دخلوا بيت الأمة، شنو علاقتها بالشعارات الي رفعوها... أبي خبير دستوري من الي تارسين البلد يشرح لي علاقة الفوضى بالدستور والقانون، ما يحتاج يتكلمون وايد، ويبربرون أكثر.. الصور واضحة وصريحة ان كل الي صار جريمة بحق الديرة وبالجرم المشهود، والمجرمين هم الي ليل نهار يتكلمون عن دولة القانون.
twitter.com/bushi5a