شنسوي بالصيف؟
4/7/2011
تالي الليل وانا اتابع النجوم، مع اني ما شفت لا نجوم ولا قمر في هالغبرة سألت نفسي هالسؤال، شنو نسوي في الاربعة اشهر الجاية، خاصة ان نوابنا بيسافرون وحكومتنا بتنام! يعني لا راح نسمع هواش ولا مسيرات ولا ساحة ارادة، ولا تصريحات ولا تهويشات النواب!
انا اقترح علشان يشغل الشعب وقت فراغه، نسوي بعض الاشياء:
-1 مثلا نشتري تركيب او «بازل» ونركب في هالصور المقصصة ونسوي فيهم لوحات طبيعية حلوة!
-2 مثلا نسوي رجيم، ونروح نشترك في النادي والحافي يدور له ممشى يمشي فيه، حاله من حال هالعالم لازم يمشون وما يضعفون!
-3 مثلا ندور على موقع في اي مجمع ونقعد من الصبح لي اسبوع جدام، ونشوف منو رايح ومنو جاي ونحسبهم ونسوي احصائية لهم!
-4 مثلا نقعد ونتابع المباريات في العالم عندك كاس اميركا الجنوبية، وكاس العالم للشباب، وكاس العالم للحريم، هم زين مادام ماكو شي!
-5 مثلا نقدر نشتري مجلات كلمات متقاطعة ونقعد نحل في الجداول!
-6 مثلا نفتح حساب في التويتر، ونقعد نسب الناس يعني حنا وطنيين وخايفين على الديرة فلازم نسب الناس اللي ما نحبهم!
-7 مثلا نحط لنا بسطة بسوق الجمعة ونبيع الاغراض الي عندنا بالمخزن، بدل ما نحطهم بدون استعمال ولا فايدة بالبيت!
-8 مثلا نقدر نوقف بالغبار لمدة شهر بدون انقطاع، ويطلع اسمنا في كتاب غينيس للارقام القياسية ونصير مشهورين هذا إذا عشنا لمدة شهر تحت الغبار!
-9 واخيرا نقدر نأخذ حبة منومة وننام، وما نقوم الا بعد اربعة اشهر على صوت النواب وصراخهم! وسلامتكم وكل صيف وانتو بخير!
