كم نملة في الكويت؟
13/7/2011
ما ادري، في أحد قايل للنواب، انهم يشتغلون في لجان الاختبارات في وزارة التربية؟ لانه مو معقولة كل نائب سائل الوزراء الف سؤال، واسئلة صعبة مثل اسئلة الاختبارات اخر السنة، وبعضها مو موجودة في المنهج!
يعني عادي تشوف النائب سائل وزير النفط عن مزارع العبدلي، او نائب سائل وزير الاسكان عن هوشة المنتخب الكويتي مع اللبناني، او نائب سائل وزير الكهرباء عن نتائج اختبارات الثانوية، المهم عندهم انه يسألون، مو مهمة الاجابة!
ولو كانت الاسئلة محترمة، وعليها القيمة، وتفيد الناس هم ممكن الواحد يعذرهم، لا طبعا، تشوف الاسئلة من النوع اللي ما تفيد احد، ولا هو يستفيد، المهم سؤال وخلاص، علشان يقول لناخبينه انا سالت الوزراء وتابعتهم وراقبتهم، فيسأل وزير الاشغال مثلا عن اسامي العمال اللي رصفوا شارع الخليج قبل ثلاث سنوات، وشنو تغدوا يومها! وطبعا الوزير لازم يجاوب، والا هناك استجواب سريع، شلون الوزير ما يعرف اسماء العمال، ولا يعرف شنو اكلو على الغدا!
او انه يسال الوزراء اسئلة ما تشيلها خمسين بعير، فيسأل عن اسماء الموظفين وترقياتهم، وعيالهم، وشهادات عيالهم، ومن اي جمعية يشترون اغراضهم، وشنو نوع سياراتهم، وكم واحد فيهم متأخر في دفع اقساطه.. يعني الوزراء لازم يقعدون سبع سنين بس يجاوبون على اسئلة النائب المحترمة.
طيب ليش كل هالاسئلة التعجيزية الحلمنتيشية! لسبب بسيط اولا لانهم قايلين له، اذا انت سألت وايد يعني انت خوش نائب، والشي الثاني لان الوزير ما وقع له على المعاملات اللي عنده وبس!.. يعني الوزير أو يوقع لا مانع، او يقعد سبع سنين يجاوب على اسئلة النائب!
twitter.com/bushi5a
