دوّر واسطة وبعدين بوق
10/7/2011
«اللي مالوش كبير يشتري له كبير» .. هذا مثل مصري واضح وصريح لكل الناس في الكويت، اللي ما عنده نائب يدور له على نائب، واللي ما عنده واسطة يشتري له واسطة!
ليش اقول هالكلام؟ لانه مع اي قضية وسالفة تطلع لنا الاخبار الدقيقة والصحيحة، واللي دايما ينفونها النواب، مع ان الكل شايفهم داشين وطالعين من المخافر، واخرها قضية الطيار في «الكويتية»، واحنا هني ما نتكلم عن الطيار ولا مشكلته، هذي راجعة للقضاء في النهاية، بس احنا نتكلم عن النواب، اللي سمعنا ثلاثة اربعة منهم تطوعوا للتدخل، فلأنه نائب فلازم يتدخل ويقول رايه ويطلع ويتوسط وقبل سالفة الطيار في عشرات السوالف!
اللي يتوسط يطلع تاجر مخدرات شايل معاه كم طن حشيش، واللي يدش المخفر حسباله بيت ابوه، ويبي يطلع المجرم من النظارة، واللي يسأل رئيس المخفر عن احوال منهم باغتصاب الاطفال، عادي الديرة ماشية جذي، ونوابنا شغلتهم مخافر ومحاكم، واللي ما عنده واسطة يدور له على واسطة، يمشّي شغله ويطلّع نفسه من السجون والمحاكم! ونصيحة لكل شاب طموح: اذا فكرت تبوق اول شيء بالخطة تجهز لك نائب يساعدك ويطلعك منها او يدبر لك شهادة من الطب النفسي، او اذا فكرت تهرّب مخدرات هم لازم تضمن ان النائب اي وقت تدق عليه يرد عليك، ويكون عندك برسم الخدمة، يعني اول شيء في الديرة انك تشتري كبير يدافع عنك، لأن الصغير الوحيد اللي صاير في الديرة هو القانون اللي الكل يدوس ببطنه!!
