عيني عليكم حارة

14/1/2010
عندي واحد من الربع عينه حارة بشكل مو طبيعي.. ينقش نقش ويطيح الطير من السما.. ولأني رابي معاه صارت عندي مناعة ضد عينه.. خذته معاي قبل مدة المجلس وقعدنا مع الجمهور نشوف الجلسة.. ويومها كانت جلسة القروض منعقدة.. فالريال اختب واغتر وقالها بعينه قبل لسانه.. بل بل بل شهالجمهور اللي ما عنده شغل مجابل الجلسات وبل بل بل عفية عليهم نواب ووزراء لهم خلق يقعدون من الصبح جنهم دياجة ويجابلون المجلس.. من يومها والمجلس مو مترقع، لا جمهور ولا نصاب في الجلسات. طبعا العالم ما يدرون عن صاحبي اللي ساقهم بعينه ويعتقدون ان الحكومة مقصرة والحكومة تشوف النواب مقصرين والجرايد تحلل والكتّاب يتفننون بالتحليلات الدايخة.. عاد أنا ملك النحاسة خذت صاحبي بلفة على الاتحادات وشلخهم بنظره فوقف النشاط. وامس رحنا مبنى الهيئة ولما شاف المبنى قال.. بل بل بل كل هالتريكات والزينة حق المدير ونائبه وستعش عضو بمجلس الادارة.. ولي الحين ما شفت ردة الفعل؟ يا إن صاحبي عينه طلعت فالصو ومتخصص بالمجلس.. او ان في بالهيئة واحد عينه أقوى من عين بو صلوح صاحبي..