22/12/2009
في القصص القديمة كلنا نعرف قصة قيس بن الملوح وجنونه في حب ليلى العامرية وعشقه واهيا بنت عمه...وأطلقوا عليه لقب مجنون ليلى لأنه ما قدر يتزوجها لعدة أسباب..أهم سبب انه شهّر فيها وقال فيها شعر ماله معنى وضرها أكثر من ما نفعها...لكن يبقى الريال ما ضر غير روحه ولا فضح الا بنت عمه اللي من لحمه ودمه..لكن الخفيف الطويل اللي هاليومين صاير عادل امام الكويت سعادة النائب الرمز رئيس السلطة التشريعية الاسبق اللي الخرافي خلاه يشوف الليات كلها باللون الاحمر..استخف وصار مجنون الكرسي.. عندنا حنا اهل الكويت عيب الشايب يكون خفيف، وما يصير يستخف دمه الا اذا خرف او اصابته لوثة عقلية..لكن «مجنون الكرسي» عداده افتر وخسارته للكرسي الاخضر اصابته بداء.... وقام يشوف كل شي احمر..والا ريال اليوم عمره فوق السبعين يمشي وينكت حاله حال مراهق يمشي بالسوق ويتحرش ببنات خلق الله بصفاقة ودم ثجيل؟ يا رجل احترم سنك..احترم تاريخك..احترم وضعك..احترم الناخبين اللي صوتوا لك..احترم ديرتك اللي سوتك ريال لك قيمة..احترم بشتك اللي ما تفصخه الا عالسرير..احترم الاجيال اللي قاعدة تراقب مسيرتك الداثرة..على الاقل تعلم من مسلم البراك اللي موديك يمين يسار..تعلم من الطاحوس هذا الشاب اللبق ..بسك دندرة وعن الثوالة..مرة تصرح ان استجواب رئيس الحكومة بالقرعة..يا خفيف ترى القرعة اللي خلتك تمتلكوا.... بالجهراء انت تعرفها عدل..ومرة تقول الخط الاحمر بنمسحه! انت تقدر تمسح حرف من تعديك على الدستور وتحديك للرغبة الاميرية؟ ومرة تقول ان الليت بيصير احمر ونطفيه! شفيك ينيت علامك يا رمز علامك يا شايب؟ أي ليت احمر تقصد وانت مافيك شدة تركب ليت بغرفتك؟ عيب اركد..وتعلم من اللي حولك..وبعدين الناس تلوم الجويهل وزمرته..انت اساس الحوار الهابط..انت اساس انحدار مستوى العمل البرلماني فلا تلوم الناس..هزلت هذا رمز وجذيه يسوي عيل لو كان شسمه شيسوي بالله عليكم..جبح طول طول نخلة..
• كلمة راس
والله يبا زمن اللي خلا «مجنون الكرسي» يأخذ اوامره من وزير لا يستجوب..مو منه يقولون الانسان كل ما يكبر بالعمر يزيد طمع بالمال .
